Sreesanth: శ్రీశాంత్ అదిరిపోయే రనౌట్.. సూపర్ ఓవర్ కు వెళ్లిన మ్యాచ్

2007 టీ20 ప్రపంచకప్ ఫైనల్లో పాకిస్థాన్ స్టార్ బ్యాటర్ మిస్బాఉల్ హక్ క్యాచ్ పట్టి.. టీమిండియాకు అద్భుత విజయం ఖాయం చేసిన మాజీ పేసర్ శ్రీశాంత్ మరోసారి మెరిశాడు. 2011 వన్డే ప్రపంచకప్ గెలిచిన భారత జట్టులోనూ సభ్యుడైన ఈ కేరళ స్పీడ్ స్టర్ ఐపీఎల్లో ఫిక్సింగ్ ఆరోపణలు ఎదుర్కొని.. అంతర్జాతీయ క్రికెట్ కు దూరమయ్యాడు. అనంతరం నిషేధం ఎత్తివేయడంతో తిరిగి క్రికెట్ ప్రారంభించిన శ్రీశాంత.. కేరళ దేశవాళీల్లో ఆడి ఆకట్టుకున్నాడు. ప్రస్తుతం జింబాబ్వే- ఆఫ్రో టీ10 లీగ్ లో అదరగొడుతున్నాడు. ఈ లీగ్ లో హరారే హరికేన్స్ జట్టుకు ప్రాతినిధ్యం వహిస్తున్న శ్రీశాంత్.. కేప్ టౌన్ ఆర్మీతో జరిగిన మ్యాచ్ లో చక్కటి బౌలింగ్ ప్రదర్శన కనబర్చాడు. ప్రత్యర్థి జట్టు విజయానికి చివరి ఓవర్ లో 8 పరుగుల చేయాల్సిన దశలో బంతిని అందుకున్న శ్రీశాంత్.. 7 పరుగులే ఇచ్చి రెండు వికెట్లు పడగొట్టాడు.

శ్రీశాంత్ సూపర్ బౌలింగ్ తో మ్యాచ్ సూపర్ ఓవర్ కు దారితీసింది. మొదట బ్యాటింగ్ చేసిన హరారే జట్టు నిర్ణీత 10 ఓవర్లలో 6 వికెట్లకు 115 పరుగులు చేసింది. ఇయాన్ మోర్గాన్ (3), మహమ్మద్ నబి (4), రాబిన్ ఊతప్ప (0), ఎవిన్ లూయిస్ (3) వంటి అంతర్జాతీయ ఆటగాళ్లు విఫలమైన చోట.. ఫెర్రీరా (33 బంతుల్లో 87 నాటౌట్; 6 ఫోర్లు, 8 సిక్సర్లు) అజేయ అర్ధశతకం తో రాణించాడు. ఛేదనలో కేప్ టౌన్ 10 ఓవర్లలో 5 వికెట్ల నష్టానికి సరిగ్గా 115 రన్స్ చేసింది. రహ్మానుల్లా గుర్బాజ్ (56; 2 ఫోర్లు, 6 సిక్సర్లు) రాణించాడు.

చివరి ఓవర్ లో కేప్ టౌన్ విజయానికి 8 పరుగుల అవసరం కాగా.. అప్పుడే బంతినందుకున్నఇంపాక్ట్ ప్లేయర్ శ్రీశాంత్.. తొలి బంతికే కరీమ్ జనత్ (16) క్లీన్ బౌల్డ్ చేశాడు. రెండో బంతికి సింగిల్ రాగా.. మూడో బంతికి బౌండ్రీ వచ్చింది. దీంతో సమీకరణం మూడు బంతుల్లో 3 పరుగులకు చేరింది. ఈ దశలో ఒక లెగ్ బై పరుగు రాగా.. ఐదో బంతికి సీన్ విలియమ్స్ ను శ్రీశాంత్ రనౌట్ చేశాడు. సింగిల్ తీసే ప్రయత్నంలో సీన్ విలియమ్స్ కొట్టిన బంతిని పిచ్ మధ్యలో అందుకున్న శ్రీశాంత్.. కింద పడి ఎడమ వైపుకు తిరుగుతూ వికెట్లను గురి చూసి కొట్టాడు. రనౌట్ అనంతరం తనదైన శైలిలో సంబురాలు జరుపుకున్న శ్రీ.. చివరి బంతికి సింగిల్ మాత్రమే ఇచ్చాడు. దీంతో ఇరు జట్ల స్కోర్లు సమమై మ్యాచ్ టై అయింది.

ఫలితం తేల్చేందుకు నిర్వహించిన సూపర్ ఓవర్లో మొదట బ్యాటింగ్ చేసిన కేప్ టౌన్ ఆర్మీ వికెట్ నష్టానికి 7 పరుగులు చేయగా.. చేజింగ్ లో హరారే హరికేన్స్ జట్టు వికెట్ నష్టపోకుండా 8 పరుగులు చేసి విజయం సాధించింది. శ్రీశాంత్ సూపర్ బౌలింగ్ తో చివరి ఓవర్ లో పోటీలోకి వచ్చిన హరారే జట్టు.. అదే జోరు కనబరుస్తూ గెలుపొందింది.

First over in the tournament ☝️
8 runs to defend 😬@sreesanth36 rolls the clock back to take the game to the Super over 😵‍💫 🕰️#ZimAfroT10 #CricketsFastestFormat #T10League #InTheWild #CTSAvHH pic.twitter.com/tMjN1FGdJw

— ZimAfroT10 (@ZimAfroT10) July 25, 2023