శార్దూల్ ఠాకూర్ అరుదైన ఘనత! ఏకంగా బ్రాడ్ మాన్ రికార్డు సమం!

డబ్ల్యూటీసీ ఫైనల్ ఊహించని మలుపులు తీసుకుంటోంది. ఆస్ట్రేలియా-ఇండియా జట్ల మధ్య జరుగుతున్న ఈ మ్యాచ్ లో.. 296 పరుగుల టీమిండియా తొలి ఇన్నింగ్స్ ముగిసింది. దీంతో ఆసీస్ కి 173 పరుగుల తొలి ఇన్నింగ్స్‌ ఆధిక్యం లభించినట్టు అయ్యింది. నిజానికి ఒకానొక దశలో భారత్ 200 పరుగులు కూడా సాధించడం అసాధ్యంగా కనిపించింది. అలాంటి స్థితిలో రహానేకి జతకట్టిన శార్దూల్‌ ఠాకూర్‌ అద్భుతమైన బ్యాటింగ్ తో బాధ్యతను పంచుకున్నాడు. రహానే క్లాస్ కి, శార్దూల్‌ మాస్ తోడు కావడంతో టీమిండియా ఈ మాత్రం స్కోర్ అయినా సాధించగలిగింది. ఈ క్రమంలో రహానే సెంచరీ సాధించే అవకాశాన్ని కోల్పోయినా.. శార్దూల్‌ ఠాకూర్‌ మాత్రం ఓ అరుదైన రికార్డుని సొంతం చేసుకుని.. ఏకంగా లెజండ్రీ క్రికెటర్ బ్రాడ్ మాన్ సరసన నిలవడం విశేషం.

ఈ టెస్ట్ లో శార్దూల్‌ ఠాకూర్‌ 109 బంతులు ఎదుర్కొని 51 పరుగులు సాధించాడు. నిజానికి ఈ మ్యాచ్ జరుగుతున్న ఓవల్ క్రికెట్ గ్రౌండ్ లో శార్దూల్‌ కు ఇది వరుసగా మూడవ హాఫ్ సెంచరీ. ఓవల్ అంటేనే ఫాస్ట్ బౌలర్స్ కు స్వర్గధామం. ఇలాంటి పిచ్ పై వరుసగా 3 హాఫ్ సెంచరీలు సాధించడం ఆషామాషీ విషయం కాదు. చరిత్రలోకి వెళ్లి లెక్కలు చూసుకున్నా ఈ విషయం ఋజువు అవుతోంది. ఈ గ్రౌండ్ ఇప్పటి వరకు.. డాన్ బ్రాడ్ మాన్, అలన్ బోర్డర్ మాత్రమే హ్యాట్రిక్ హాఫ్ సెంచరీలు సాధించి ఉన్నారు. అలాంటి ఇద్దరు లెజండ్రీ బ్యాటర్స్ రికార్డుని శార్దూల్‌ సమం చేయడంతో క్రీడా పండితులు కూడా ఆశ్చర్యపోతున్నారు.

గత కొంతకాలంగా టెస్ట్ ఫార్మేట్ లో శార్దూల్‌ ఠాకూర్‌ మంచి ప్రదర్శన చేస్తూ వస్తున్నాడు. టీమ్ కష్టాల్లో ఉన్న ప్రతిసారి బ్యాటింగ్ లో కూడా తన వంతు సాయం చేస్తూ.. ఆల్ రౌండర్ అన్న ట్యాగ్ కి న్యాయం చేస్తున్నాడు. ఈ కారణంతోనే శార్దూల్‌ కి టెస్ట్ జట్టులో తప్పక స్థానం ఉంటూ వస్తోంది. ఇక రహానే, శార్దూల్‌ పోరాటం కారణంగా టీమిండియా గౌరవ ప్రదమైన స్కోర్ చేయగలిగి, ఫాలో ఆన్ గండం నుండి బయట పడింది. ఒక వేళ భారత్ బౌలర్లు మెరిసి.. సెకండ్ ఇన్నింగ్స్ లో ఆసీస్ ని తక్కువ స్కోర్ కే పరిమితం చేస్తే.. మనకీ గెలుపు అవకాశాలు లేకపోలేదు. మరి.. శార్దూల్‌ ఠాకూర్‌ ఏకంగా బ్రాడ్ మాన్ రికార్డు సమం చేయడంపై మీ అభిప్రాయాలను కామెంట్స్ రూపంలో తెలియజేయండి.