ముంబై వదిలేసిందన్న కసితో రెచ్చిపోయిన పొల్డార్‌! 3 ఫోర్లు, 4 సిక్సులతో..

వెస్టిండీస్‌ విధ్వంసకర ఆటగాడు కీరన్‌ పొలార్డ్‌ తనలో ఇంకా పవర్‌ తగ్గలేదని నిరూపించాడు. అబుదాబి టీ10 లీగ్‌లో సత్తా చాటాడు. 19 బంతుల్లో తన పవర్‌హిట్టింగ్‌ పవరేంటో చూపించాడు. పొలార్డ్‌కు పొట్టి ఫార్మాట్‌లో బిగ్‌మ్యాన్‌గా పేరుంది. ఆ పేరును మరోసారి నిలబెడుతూ.. సంచలన ఇన్నింగ్స్‌ ఆడాడు. బుధవారం లీగ్‌ ఆరంభ మ్యాచ్‌లో బంగ్లా టైగర్స్‌తో న్యూయార్క్‌ స్ట్రైకర్స్‌ జట్టు తలపడింది. ఈ మ్యాచ్‌లో తొలుత బ్యాటింగ్‌ చేసిన బంగ్లా టైగర్స్‌ నిర్ణీత 10 ఓవర్లలో 5 వికెట్లు కోల్పోయి 131 పరుగుల భారీ స్కోర్‌ చేసింది. ఎవిన్ లూయిస్ 22 బంతుల్లో 2 ఫోర్లు, 7 సిక్సులతో 58 పరుగులు చేసి దుమ్మురేపాడు. మున్రో కూడా 17 బంతుల్లో 3 ఫోర్లు, 2 సిక్సులు 30 పరుగులు చేసి రాణించాడు.

ఇక 132 పరుగుల లక్ష్యంతో బరిలోకి దిగిన న్యూయార్క్‌ స్ట్రైకర్స్‌ 75 పరుగులకే 6 వికెట్లు కోల్పోయి పీకల్లోతు కష్టాల్లో పడింది. అంతకు ముందు అజమ్‌ ఖాన్‌ 13 బంతుల్లో 4 ఫోర్లు, 2 సిక్సులతో 34 పరుగులు చేశాడు. కానీ.. రన్‌ రేట్‌ దారుణంగా పడిపోవడంతో.. బిగ్‌ మ్యాన్‌ పొలార్డ్‌ రంగంలోకి దిగాడు. ఫోర్లు, సిక్సులతో బంగ్లా టైగర్స్‌ బౌలర్లపై విరుచుకుపడ్డాడు. 19 బంతుల్లోనే 3 ఫోర్లు, 4 సిక్సులతో 45 పరుగులు బాదేశాడు. కానీ.. అప్పటికే లక్ష్యం మరీ దూరమైపోయింది. విజయానికి 19 పరుగుల దూరంలో న్యూయార్క్‌ స్ట్రైకర్స్‌ నిలిచిపోయింది. పొలార్డ్‌ 45 పరుగులతో నాటౌట్‌గా నిలిచాడు. పొలార్డ్‌ ఐదో స్థానంలో కాకుండా మరింత ముందుగా బ్యాటింగ్‌కు వచ్చి ఉంటే.. ఫలితం వేరేలా ఉండేది.

ఇక అంతర్జాతీయ క్రికెట్‌కు గుడ్‌ చెప్పిన పొలార్డ్‌.. ఐపీఎల్‌ 2022లో అంతగా రాణించలేదు. దీంతో.. అతని వయసైపోయిందని భావించిన ముంబై ఇండయన్స్‌ యాజమాన్యం.. ఐపీఎల్‌ 2023 కోసం పొలార్డ్‌ను జట్టు నుంచి రిలీజ్‌ చేసింది. ఐపీఎల్‌లోకి అడుగుపెట్టినప్పటి నుంచి ముంబై ఇండియన్స్‌కే ఆడుతున్న పొల్డార్‌.. రోహిత్‌ శర్మ లేని సమయంలో ఆ జట్టుకు కెప్టెన్‌గా కూడా వ్యవహరించాడు. అలాంటి ప్లేయర్‌ను ముంబై వయసు కారణంగా వదిలేసేందుకు సిద్ధపడింది. కానీ.. పొలార్డ్‌ మాత్రం ఆడితే ముంబైకే ఆడతానని, ముంబై వద్దనుకున్న తర్వాత.. తాను అసలు ఐపీఎలే ఆడనని.. ఐపీఎల్‌కు రిటైర్మెంట్‌ ప్రకటించాడు. కానీ.. ముంబై వదిలేస్తుందని ఊహించి ఉండడు. ఆ కసితోనే తనలో ఇంకా బ్యాటింగ్‌ పవర్‌ తగ్గలేదని చూపించేందుకు ఈ ఇన్నింగ్స్‌ ఆడినట్లు క్రికెట్‌ అభిమానులు భావిస్తున్నారు.

Kieron Pollard 19 balls 45* Runs in Abu Dhabi T10 league. pic.twitter.com/lVOguNk0Mm

— MOHIT SHUKLA (@MohitShukla1030) November 23, 2022

Kieron Pollard scored 45* runs from 19 balls in the T10 League.

— Johns. (@CricCrazyJohns) November 23, 2022