నారా బ్రాహ్మణి పొలిటికల్ ఎంట్రీ.. ఆ నియోజకవర్గం నుంచేనా?

టీడీపీ అధినేత చంద్రబాబు నాయుడు కోడలు, నారా లోకేష్ సతీమణి, బాలకృష్ణ కూతురు నారా బ్రాహ్మణి రాజకీయాల్లోకి ఎంట్రీ ఇస్తున్నారన్న వార్త ప్రస్తుతం జోరుగా ప్రచారం జరుగుతోంది. నారా బ్రాహ్మణి ప్రస్తుతం కుటుంబ వ్యాపార బాధ్యతలు చూసుకుంటున్నారు. అయితే గతంలో ఎన్నికల సమయంలో టీడీపీ తరఫున ప్రచారం చేశారు. మంచి వాగ్దాటి కూడా. రాజకీయాల్లో మహిళలకు ఉన్న మైలేజ్ వేరే. ప్రచారానికైనా, ఒకరిపై పోటీగా నిలబెట్టడానికైనా మహిళలదే అస్త్రం అన్న సంగతి తెలిసిందే. తాజాగా నారా బ్రాహ్మణిని కూడా రాజకీయాల్లోకి అరంగేట్రం చేయించాలని చూస్తున్నారట. వచ్చే ఎన్నికల బరిలోకి ఆమెను పోటీకి దింపాలని భావిస్తున్నారట.

బాలకృష్ణ ప్రాతినిధ్యం వహిస్తున్న హిందూపురం ఎమ్మెల్యే టికెట్ ని బ్రాహ్మణికి ఇవ్వాలన్న యోచనలో ఉన్నట్లు వార్తలు వస్తున్నాయి. 2024 ఎన్నికల్లో హిందూపురం నుంచి పోటీ చేస్తారని టీడీపీ వర్గాల్లో చర్చ నడుస్తోంది. దీనికి కారణం లేకపోలేదని అంటున్నారు. హిందూపురం అసెంబ్లీ నియోజకవర్గం ఏర్పాటయ్యాక అక్కడ పురుష అభ్యర్థులే గెలిచారు తప్ప మహిళలు ఒక్కసారి కూడా గెలవలేదు. అగ్ర రాజకీయ పార్టీలు కూడా మహిళలకు టికెట్ ఇచ్చింది లేదు. దీంతో ఈసారి హిందూపురం నియోజకవర్గంలో మహిళా అభ్యర్థిని నిలబెట్టాలని వైసీపీ భావిస్తున్నట్లు తెలుస్తోంది. వరుసగా రెండు సార్లు ఎమ్మెల్యేగా గెలిచిన బాలకృష్ణపై మహిళా సెంటిమెంట్ ని ప్రయోగిస్తే ఆ వైసీపీ అభ్యర్థిని గెలిపించుకోవచ్చునన్న ఆలోచనలో వైసీపీ ఉన్నట్లు తెలుస్తోంది.

ఈ కారణంగా టీడీపీ కూడా మహిళా సెంటిమెంట్ ని వాడుకోవాలని భావిస్తోందట. బాలకృష్ణ స్థానాన్ని నారా బ్రాహ్మణితో భర్తీ చేయించాలని యోచిస్తున్నట్లు టాక్ వినిపిస్తుంది. బాలయ్య స్థానంలో ఆయన సతీమణి వసుంధరను నిలబెట్టాలని మొదట అనుకున్నారట. ఆమెకు హిందూపురం క్యాడర్ పరిచయం ఉంది.. బాలకృష్ణతో పాటు అక్కడ ఎన్నికల్లో తిరిగారు. జనాలకు తెలుసు కాబట్టి మొదట వసుంధరనే అనుకున్నారట. కానీ ఆమె కంటే ఆమె కూతురు బ్రాహ్మణి అయితే బాగుంటుందన్న యోచనలో టీడీపీ ఉన్నట్లు సమాచారం. ఒకవేళ ఇదే నిజమైతే హిందూపురం టికెట్ ని బ్రాహ్మణికి ఇస్తే.. బాలకృష్ణకు ఏ నియోజకవర్గం టికెట్ ఇస్తారో అనేది ఇప్పుడు ఆసక్తిగా మారింది. మరి ఈ వార్తల్లో నిజం ఉంటే బ్రాహ్మణి హిందూపురం నియోజకవర్గం నుంచి పోటీ చేసి ఎమ్మెల్యేగా గెలుస్తారో లేదో చూడాలి. దీనిపై మీ అభిప్రాయమేమిటో కామెంట్ చేయండి.