స్నేహితురాలిని కలిసేందుకు బుర్ఖాలో కాలేజీకి వెళ్లిన కుర్రాడు.. తర్వాత ఏం జరిగిందంటే?

తన స్నేహితురాలిని కలిసేందుకు మాస్టర్‌ ప్లాన్‌ వేసిన ఒక కుర్రాడు అడ్డంగా బుక్కయ్యాడు. మహిళా కళాశాలలో చదువుకుంటున్న స్నేహితురాలిని రహస్యంగా కలిసేందుకు ఆడపిల్లలా బుర్ఖా ధరించి కాలేజీలోకి ప్రవేశించాడు. స్నేహితురాలి గదిలోకి ప్రవేశిస్తుండగా అక్కడున్న ఓ మహిళా ఉద్యోగికి అనుమానం వచ్చింది. ఈ అమ్మాయి నడక తీరు ఏంటి ఇలా ఉంది అనుకుని సెక్యూరిటీని పిలిచి విచారించింది. సెక్యూరిటీ సిబ్బంది బుర్ఖా తొలగించి చూడ్డంతో అసలు విషయం బయటపడింది.

ఈ ఘటన మధ్యప్రదేశ్‌ రాష్ట్రంలోని బుర్హాన్‌పూర్‌లో గురువారం చోటు చేసుకుంది. బుర్హాన్‌పూర్‌లోని సేవా సదన్ కళాశాలలోని తన స్నేహితురాలిని కలిసేందుకు బుధ్వారా నివాసి అయిన మొహ్సిన్ సాహాబ్ ఈ బుర్ఖా ధరించి ప్రవేశించాడు. కథ అడ్డం తిరగడంతో బుక్కయ్యాడు. కళాశాల యాజమాన్యం పోలీసులకు ఫిర్యాదు చేసింది. పోలీసులు వచ్చి అతడిని అదుపులోకి తీసుకున్నారు. కేవలం తన స్నేహితురాలిని కలిసేందుకే తను మారు వేషంలో వచ్చానని మొహ్సిన్ చెబుతున్నాడు.