పాకిస్తాన్ లో నిరుద్యోగానికి నిదర్శనం.. కానిస్టేబుల్ రాత పరీక్ష కోసం నిండిన స్టేడియం!

దాయాది దేశం పాకిస్తాన్ లో పరిస్థితులు మరింత దిగజారుతున్నాయి. దేశ ఆర్థిక వ్యవస్థ దెబ్బతినడమే కాకుండా.. అప్పుల ఊబిలో కూరుకుపోయింది. ఇప్పుడు ఆ దేశాన్ని నిరుద్యోగ సమస్య కూడా వెంటాడుతోంది. అందుకు సంబంధించిన ఒక వార్త ఇప్పుడు నెట్టింట వైరల్ అవుతోంది. పాకిస్తాన్ లో కానిస్టేబుల్ పోస్టుల భర్తీకి నోటిఫికేషన్ జారీ చేయగా వేలల్లో అభ్యర్థులు హాజరయ్యి అధికారులకు షాకిచ్చారు. ప్రస్తుతం వారి రాత పరీక్షకు సంబంధించిన వీడియోలు, చిత్రాలు వైరల్ అవ్వడంతో ఈ విషయం వెలుగు చూసింది.

పాకిస్తాన్ పోలీసు డిపార్టుమెంట్ లో గత ఐదేళ్లుగా భర్తీ కాకుండా ఉన్న 1667 పోస్టుల భర్తీకి నోటిఫికేషన్ జారీ చేశారు. ఇస్లామాబాద్ లో రాత పరీక్ష నిర్వహించారు. అయితే అప్లై చేసుకున్న వారి సంఖ్యను చూసి ఒకింత పోలీసులు షాకయ్యారు. వారందరికి రాత పరీక్ష నిర్వహించాలంటే చాలానే ఖర్చు అవుతుంది. అసలే దేశం అప్పుల్లో ఉంది. అందుకే వారందరిని ఇస్లామాబాద్ లోని ఓ స్టేడియానికి రావాల్సిందిగా కోరారు. అందరూ స్టేడియానికి వచ్చిన తర్వాత అక్కడే వారికి రాత పరీక్ష నిర్వహించారు.

మొత్తం 1,667 పోస్టులకు నోటిఫికేషన్ జారీ చేయగా.. దాదాపు 30 వేలకు పైగా యువతీయువకులు రాత పరీక్షకు హాజరయ్యారు. ఈ దృశ్యాలు సోషల్ మీడియాలో వైరల్ కాగా.. పాక్ లో నిరుద్యోగ సమస్యకు ఈ దృశ్యాలు నిదర్శనం అంటూ కామెంట్ చేస్తున్నారు. పాకిస్తాన్ ఇన్ స్టిట్యూట్ ఆఫ్ డెవల్మెంట్ ఎకనామిక్స్ లెక్కల ప్రకారం.. పాకిస్తాన్ లో 31 శాతం మంది యువత నిరుద్యోగులుగా ఉన్నారు. వారిలో 51 శాతం మంది యువతులు కాగా.. 16 శాతం మంది యువకులు డిగ్రీలు చేసి ఉద్యోగాలు లేకుండా ఉన్నారు. మొత్తం పాకిస్తాన్ జనాభాలో 60 శాతం మంది 30 ఏళ్లలోపు యువతే ఉన్నారు.

ఉన్న సమస్యలకు తోడు ఇప్పుడు ఈ నిరుద్యోగం కూడా వారికి పెద్ద సవాలుగా మారుతోంది. ఈ వార్తలు చూసిన తర్వాత పాకిిస్తాన్ దేశంపై కొన్ని విమర్శలు కూడా వినిపిస్తున్నాయి. దేశంలో ఉన్న సమస్యలను పరిష్కరించుకోకుండా మిగిలిన దేశాలపైకి ఒంటికాలుతో దూకుతూ ఉంటుందని విమర్శిస్తున్నారు. ముఖ్యంగా భారతదేశం అంటే పాకిస్తాన్ లో ఉన్న రాజకీయ నాయకులు, క్రికెటర్లు, సెలబ్రిటీలు అంతా నోరు పారేసుకుంటారని పెదవి విరుస్తున్నారు. పక్క దేశాలను విమర్శించడం మానేసి సొంత దేశంలో నెలకొన్న సమస్యలను పరిష్కరించేందుకు పూనుకోవాలంటూ హితవు పలుకుతున్నారు.

More than 30,000 male and female candidates from all over Pakistan are taking the exam in the stadium for the recruitment of vacant posts in the Islamabad Police. pic.twitter.com/eozxJP4KfH

— hurriyatpk (@hurriyatpk1) December 31, 2022