follow us:
ఆ మధ్య గరికపాటి నరసింహారావు, చిరంజీవిపై చేసిన వ్యాఖ్యలు తీవ్ర దుమారం రేపిన విషయం తెలిసిందే. తాజాగా ఓ బుక్ లాంఛ్ ఈవెంట్ లో ఫోటో సెషన్ లో పాల్గొంటూ.. ‘ఇక్కడ వారు లేరు కదా’ అంటూ చిరంజీవి సెటైర్ వేశారు. దీంతో ఆ డైలాగ్ కాస్తా వైరల్ గా మారింది. ఈ క్రమంలో గరికపాటికి సంబంధించిన వీడియో ఒకటి సోషల్ మీడియాలో వైరల్ అవుతోంది. ఆ వీడియోలో గరికపాటి మాట్లాడిన వ్యాఖ్యలు ఎప్పటివో తెలియదు గానీ ప్రస్తుత పరిస్థితులకు సరిపోయే విధంగా ఉన్నాయి. దయచేసి మమ్మల్ని అలాంటి ఫంక్షన్స్ కి పిలవకండి అని గరికపాటి చేసిన వ్యాఖ్యలు ఇప్పుడు సోషల్ మీడియాలో వైరల్ అవుతున్నాయి.
మొన్నా మధ్య గరికపాటి వారిని అలయ్ బలయ్ కార్యక్రమానికి ఆహ్వానించిన విషయం తెలిసిందే. ఆ కార్యక్రమంలో ఆయన ప్రవచనం చెప్తుంటే.. చిరంజీవి ఫోటో సెషన్ లో బిజీగా ఉన్నారు. అప్పుడు గరికపాటి వారు అసహనం వ్యక్తం చేసిన సంగతి తెలిసిందే. ఆ తర్వాత అది పెద్ద దుమారం రేపింది. గరికపాటి తాజాగా చిరంజీవి విషయంలో జరిగిన దానికి ఇప్పుడు స్పందించినట్టు ఒక వీడియో వైరల్ అవుతోంది. ఆ వీడియోలో దయచేసి మమ్మల్ని ఫంక్షన్స్ కి పిలవకండి అంటూ గరికపాటి చెప్పడం ఇప్పుడు చర్చనీయాంశంగా మారింది. చిరంజీవిని ఉద్దేశించే ఈ కామెంట్స్ చేశారంటూ వైరల్ చేస్తున్నారు.
సాధారణంగా ప్రవచనాలు చెప్పే పెద్ద వాళ్ళను కొంతమంది ఆహ్వానిస్తుంటారు. అయితే కొంతమంది మాత్రం ప్రవచన కర్తలను కేవలం తమ కుటుంబ సభ్యుల ఆశీర్వాదం కోసం మాత్రమే పిలుస్తున్నారు. ఈ విషయంపై గరికపాటి నరసింహారావు సీరియస్ అయ్యారు. ప్రవచనాలు చెప్పడానికి తనను ఎవరూ పిలవరని.. మా ఇంట్లో పెళ్ళికి రండి, మా మనవడి బారసాలకి రండి, మా వాళ్ళను ఆశీర్వదించడానికి మాత్రం పిలుస్తారని మండిపడ్డారు. డబ్బు ఎంతైనా ఇస్తామని, ఆశీర్వదించండి అని తమని ప్రలోభ పెట్టే ప్రయత్నం చేస్తారని అన్నారు. తమని సెలబ్రిటీల్లా చూడకండని, తాము సెలబ్రిటీలం కాదని అన్నారు.
‘సెలబ్రిటీతో నీకేంటి సంబంధం.. నువ్వేమైనా నా మేనత్త కూతురువా? మేనత్త మొగుడివా? ఎందుకు రావాలి మీ ఇంట్లో ఫంక్షన్ కి? డబ్బులిస్తే ఆశీర్వచనాలు ఇవ్వాలా? ఇదేమైనా వ్యాపారమా?’ అంటూ ఆయన విమర్శించారు. డబ్బు కోసం ఆశీర్వచనాలు అమ్ముకుని బతకాలా? అంత కర్మ తనకు పట్టలేదని గరికపాటి అన్నారు. సొంత కుటుంబ సభ్యులు ఇచ్చే ఆశీర్వచనాలు కంటే గొప్ప ఆశీర్వచనాలు మావి కాదని ఆయన అన్నారు. అయితే కొంతమంది ఈ కామెంట్స్ ని.. చిరంజీవి విషయంలో రేగిన వివాదాన్ని దృష్టిలో ఉంచుకునే ఇలా కామెంట్స్ చేసారని భావిస్తున్నారు. అయితే ఇది పాత వీడియో అని మరి కొంతమంది అభిప్రాయపడుతున్నారు.
