నన్ను ఇండస్ట్రీ నుంచి పంపించేయాలని చూస్తున్నారు: కిరణ్ అబ్బవరం

సినీ పరిశ్రమలో అవకాశాలు రావడమే కష్టం. చాన్సులు వచ్చినా వాటిని సద్వినియోగం చేసుకుని నిలదొక్కుకోవాలంటే ఎంతో ప్రతిభ ఉండాలి. స్టార్లుగా మారాలంటే వరుసగా హిట్లను ఇస్తూ పోవాలి. డైరెక్టర్లు, హీరోలు, హీరోయిన్లు ఇలా అందరికీ ఇది వర్తిస్తుంది. అయితే కెరీర్‌లో ఎదిగే క్రమంలో ఎన్నో అవాంతరాలనూ ఎదుర్కోవాల్సి ఉంటుంది. నెగెటివ్ కామెంట్స్, ట్రోలింగ్స్‌ను కూడా ఫేస్ చేయాల్సి వస్తుంది. యంగ్ హీరో కిరణ్ అబ్బవరంది కూడా ఇప్పుడు ఇదే పరిస్థితి. ఎటువంటి బ్యాగ్రౌండ్ లేకుండా చిత్ర పరిశ్రమలోకి వచ్చిన ఆయన.. తనకంటూ ప్రత్యేక గుర్తింపును తెచ్చుకున్నారు.

‘రాజావారు రాణివారు’, ‘ఎస్ఆర్ కల్యాణమంపడం’, ‘నేను మీకు బాగా కావాల్సినవాడిని’ లాంటి సినిమాల ద్వారా ప్రేక్షకులకు దగ్గరయ్యారు కిరణ్ అబ్బవరం. నటుడిగానే కాదు రచయితగానూ తానేంటో ఆయన నిరూపించుకున్నారు. ‘ఎస్ఆర్ కల్యాణమండపం’ చిత్రానికి కిరణే కథను అందించారు. ఇప్పుడు ‘వినరో భాగ్యము విష్ణుకథ’తో ఆడియెన్స్‌ను పలకరించేందుకు సిద్ధమవుతున్నారు. ఈ నేపథ్యంలో మూవీ ప్రమోషన్స్‌లో భాగంగా మీడియాతో ముచ్చటించిన కిరణ్ అబ్బవరం.. తనపై వస్తున్న నెగెటివ్ కామెంట్స్, ట్రోల్స్ మీద ఆసక్తికరమైన వ్యాఖ్యలు చేశారు.

‘నేను ఇంకా స్టార్ హీరోను కాలేదు. ఇప్పుడిప్పుడే గుర్తింపు తెచ్చుకుంటున్నా. నాపై ఎందుకు నెగెటివిటీని ప్రచారం చేస్తున్నారో అర్థం కావడం లేదు. నేను రెస్పాండ్ అవ్వకపోవడం వల్లే ఇలా జరుగుతోంది. ఇదంతా కావాలనే చేస్తున్నారు. నన్ను మూవీ ఇండస్ట్రీ నుంచి పంపించేద్దామని అనుకుంటున్నారేమో? ఒక సినిమాలో నేను వేసుకోకపోయినా పవర్ స్టార్ అనే ట్యాగ్ ఎడిట్ చేసి మీమర్స్ వేశారు. అది నేను పెట్టుకున్నానని అనుకుని కొందరు దారుణంగా ట్రోల్ చేశారు. దీనిని కూడా చాలా మంది నమ్మేస్తున్నారు. ఏంటి ఇలా ఎందుకు చేస్తున్నావంటూ నన్ను ప్రశ్నిస్తున్నారు‘ అంటూ కిరణ్ అబ్బవరం చెప్పుకొచ్చారు. కాగా, కిరణ్ గత చిత్రం ‘నేను మీకు బాగా కావాల్సినవాడిని‘ టైమ్‌లో ఆయన ఇంట్రడక్షన్ సీన్‌లో కిరణ్ అబ్బవరం అనే టైటిల్ కార్డుపై పవర్ స్టార్ అని ఎడిట్ చేసి సోషల్ మీడియాలో షేర్ చేశారు. దీనిని చూసిన కొందరు నెటిజన్స్ నిజం అనుకుని ఆయన్ను విపరీతంగా ట్రోల్ చేసిన విషయం విదితమే. మరి, తనపై కావాలనే నెగెటివిటీని ప్రచారం చేస్తున్నారన్న కిరణ్ అబ్బవరం వ్యాఖ్యలపై మీ అభిప్రాయాలేంటో తెలియజేయండి.