ప్రముఖ నటుడు చలపతిరావు కన్నుమూత!.. ఇండస్ట్రీలో విషాదం

టాలీవుడ్ ను వరుస విషాదాలు కుదిపేస్తున్నాయి. ఒకరి తరువాత మరొకరు సినీ ప్రముఖులు మృత్యువాత పడుతున్నారు దీంతో వారి కుటుంబాల్లోనే కాక ఇండస్ట్రీలో కూడా తీవ్ర విషాదం నెలకొంటోంది. రెండు రోజుల క్రితం ప్రముఖ నటుడు కైకాల సత్యనారాయణ అనారోగ్యంతో కన్నుమూసినసంగతి తెలిసిందే. ఆయన కన్నా ముందు కృష్ణ, కృష్ణంరాజులు తుది శ్వాస విడిచారు. ఈ విషాదాల నుంచి కోలుకొక ముందే మరో ప్రముఖ నటుడు చలపతిరావు కన్నుమూశారు. ఆదివారం హైదరాబాదులోని ఆయన ఇంట్లో గుండెపోటుతో హఠాన్మరణం చెందారు. ఆయన మృతి పట్ల సినీ ప్రముఖులు సంతాపం తెలుపుతున్నారు.

చలపతిరావు స్వస్థలం కృష్ణా జిల్లా పామర్రు మండలం బల్లిపర్రు. ఆయన 1944 మే 8న జన్మించారు. సీనియర్ నటుడు ఎన్టీఆర్ ప్రోత్సాహంతో ఇండస్ట్రీలోకి ఎంట్రీ ఇచ్చిన చలపతి రావు.. తన కెరీర్ లో 600కు పైగా చిత్రాలలో నటించారు. సీనియర్ ఎన్టీఆర్ మొదలు జూనియర్ ఎన్టీఆర్ వరకు మూడు తరాల నటులతో పనిచేశారు. చలపతిరావు తన కెరీర్ ప్రారంభంలో ఎక్కువగా విలన్ పాత్రలే పోషించారు. ఆ తర్వాత క్యారెక్టర్ ఆర్టిస్ట్ గా, కమెడియన్ గా గుర్తింపు తెచ్చుకున్నారు. ఆయన నిర్మాతగా మారి కొన్ని చిత్రాలను నిర్మించారు.

చలపతి రావు మూడు తరాల నటులతో నటించారు. ఇటీవల ఆయన ఆరోగ్యం బాగాలేకపోవడంతో ఇండస్ట్రీకి దూరంగా ఉంటూ వస్తున్నారు. ఆయన ఆరోగ్యం పూర్తిగా విషమించడంతో బంజారాహిల్స్ లోని ఆయన స్వగృహంలో తుదిశ్వాస విడిచారు. నటుడు, నిర్మాతగా కూడా ఆయన మంచి గుర్తింపు తెచ్చుకున్నారు. చలపతిరావు నిర్మాతగా ఏడు చిత్రాలు నిర్మించారు. దిగ్గజ నటుడు కైకాల సత్యనారాయణ అంత్యక్రియలు ముగిసిన 24 గంటల్లోనే తెలుగు ఇండస్ట్రీలో మరో నటుడు మృతి చెందడంతో విషాదఛాయలు నెలకొన్నాయి. చలపతిరావు మృతి పట్ల సినీ ప్రముఖులు సంతాపాన్ని వ్యక్తం చేస్తున్నారు.

చలపతిరావుకు ఇద్దరి సంతానం. కుమార్తె అమెరికాలో ఉంటుండగా, కుమారుడు రవిబాబు టాలీవుడ్ లో నటుడిగా దర్శకుడిగా రాణిస్తున్నారు. ప్రస్తుతం చలపతిరావు కుమారుడి దగ్గర ఉంటున్నారు. ఆయన మృతితో వారి కుటుంబంలో తీవ్ర విషాదం నెలకొంది. చలపతిరావు అంత్యక్రియలు బుధవారం జరగనున్నాయి. ఆయన కుమార్తె అమెరికా నుంచి రావడానికి సమయం పడుతుండడంతో బుధవారం అంత్యక్రియలు జరిగే అవకాశం ఉన్నట్లు తెలుస్తోంది.

చలనచిత్ర రంగ సీనియర్ నటుడు చలపతిరావు గారి మరణం తెలుగు చిత్ర సీమకి తీరని లోటు.ఈ సంద‌ర్భంగా చలపతిరావు గారి కుటుంబ సభ్యులకు,ఆత్మీయులకు నా ప్రగాఢ సానుభూతి తెలియ‌జేస్తున్నాను. ఆయన ఆత్మకు శాంతి చేకూరాలని కోరుకుంటున్నాను. ఓం శాంతి🙏 @actorRavibabu#ChalapathiRao pic.twitter.com/jz7iV23wQz

— Devineni Avinash (@DevineniAvi) December 25, 2022