“మిస్ ఇండియా” దర్శకుడు నరేంద్రనాధ్ సక్సెస్ జర్నీ

థింక్ బిగ్.. డ్రీమ్ బిగ్..అండ్ అచీవ్ బిగ్.. మాజీ రాష్ట్రపతి అబ్దుల్ కలాం గారు అన్న మాటలు ఇవి. అయితే.. ఒక్క ఛాన్స్ ప్లీజ్ నా టాలెంట్ చూపిస్తా అంటూ సినిమా ఆఫీసుల చుట్టూ తిరుగుతూ, ఏ చిన్న అవకాశం వచ్చినా వదులుకోకూడదని, ఎదో ఒకటి చేసేసి చివరికి.. ఉట్టికి, స్వరానికి కాకుండా మిగిలిపోతున్నారు చాలా మంది యువకులు. కానీ.., ఇలాంటి పరిస్థితిల్లో కూడా ఓ యువ దర్శకుడు మాత్రం తాను అనుకున్న కథను.. తాను ఊహించినట్టుగానే భారీ స్థాయిలో తెరకెక్కించి, తన చిరకాల స్వప్నానాన్ని సాకారం చేసుకున్నాడు.

భారీ బడ్జెట్ తో, భారీ తారాగణంతో దర్శకుడిగా తన తొలి చిత్రాన్ని తెరకెక్కించి విజయాన్ని దక్కించుకున్నాడు. ఒక ప్రాంతీయ భాషలో తాను దర్శకత్వం వహించిన సినిమా.. ప్రతిష్టాత్మక ఓటీటీ ప్లాట్ ఫామ్ అయిన నెట్ ఫ్లిక్స్ ద్వారా విడుదలై.. ఇప్పుడు ప్రపంచ వ్యాప్తంగా ప్రశంశలు అందుకుంటోంది. నెట్ ఫ్లిక్స్ లో తెలుగు, తమిళ, మలయాళ వెర్షన్ కి మంచి రెస్పాన్స్ రాగ, యూట్యూబ్ లో విడుదలైన హిందీ వెర్షన్ మూడు రోజుల్లోనే మూడన్నర కోట్ల వ్యూస్ సాధించి, హీరోయిన్ ఓరియంటెడ్ చిత్రాల్లో సరికొత్త రికార్డ్ నెలకొల్పింది. ఇంతకు ఎవరా యువ దర్శకుడు? ఎవరా భారీ తారాగణం? ఏమిటా సినిమా? అన్నదేగ మీ సందేహం.. తొలి సినిమాతోనే ఇండియన్ ఫిల్మ్ ఇండస్ట్రీ అటెన్షన్ ని తవ వైపుకి తిప్పుకున్న ఆ యువ దర్శకుడు అచ్చ తెలుగువాడైన నరేంద్రనాధ్ కాగ, ఆ సినిమా “మిస్ ఇండియా”.

మహానటి తరువాత ఒక్కసారిగా ఓవర్ నైట్ స్టార్ గా ఎదగడమే కాకుండా, నేషనల్ అవార్డు గెలుచుకున్న హీరోయిన్ కీర్తి సురేశ్ టైటిల్ రోల్ పోషించగా, జగపతిబాబు, రాజేంద్ర ప్రసాద్, నరేశ్, నదియా, నవీన్ చంద్ర వంటి తారాగణం ప్రముఖ పాత్రలలో నటించిన “మిస్ ఇండియా”. ఈ మూవీని ఇండియన్ చాయ్ కి, అమెరికన్ కాఫీకి మధ్య జరిగే వెర్బల్ ఫైట్ లాంటి ఒక విభిన్న కథాంశంతో రూపొందించడం విశేషం.

కరోనా కారణంగా థియేట్రికల్ రిలీజ్ సాధ్యం కాకపోవడంతో ఓటీటీ, యూట్యూబ్ ద్వారా ప్రేక్షకుల ముందుకి వచ్చిన ఈ సినిమా వ్యూస్ పరంగా, లైక్స్ పరంగా సరికొత్త రికార్డులు క్రియేట్ చేస్తోంది. గోల్డ్ మెయిన్ టెలీ ఫిలిమ్స్ వారు ఈ మూవీ హిందీ వెర్షన్ ని జూలై 4న యూట్యూబ్ లో రిలీజ్ చేయగా, తొలి మూడు రోజుల్లనే 30 మిలియన్స్ పైగా వ్యూస్ దక్కించుకోవడంతో మిస్ ఇండియా దర్శకుడు నరేంద్రనాధ్ పై ప్రశంశల జల్లు కురుస్తోంది. మహానటి తరువాత కీర్తి సురేశ్ దాదాపు 22 కథలు విని, చివరకి ఫైనల్ చేసిన స్క్రిప్ట్ ఇదే కావడం విశేషం. ఈ నేపథ్యంలో యువ దర్శకుడు నరేంద్రనాధ్ మిస్ ఇండియా గురించి తెలిపిన వివరాలు, విశేషాలు ఏమిటో ఆయన మాటల్లోనే తెలుసుకుందాం.

1)ఇండియన్ చాయ్ హీరో, అమెరికన్ కాఫీ విలన్.. ఇలాంటి ఒక డిఫరెంట్, టిపికల్ కాన్సెప్ట్ ని కథగా ఎంచుకోవాలన్న ఆలోచన మీకు ఎలా కలిగింది?

• ఇప్పుడున్న కాంపిటేటివ్ ర్యాట్ రేసులో మనల్ని మనం ప్రూవ్ చేసుకోవాలంటే ఏదో ఒక కొత్త కాన్సెప్ట్ తో, కొత్త ప్రజంటేషన్ తో రావడం అవసరం. ఆ అవసరాన్ని గుర్తించాను కాబట్టే ఇలా కొత్త కథ తయారు చేసుకున్నాను.

2) సాధారణంగా తొలి సినిమా లవ్ స్టోరీలే సక్సెస్ ఫార్ములా అనుకుంటారు. మరి.. ఈ కథతో ప్రయోగం చేస్తున్నానని మీకు అనిపించలేదా?

నో డౌట్. ఇది ముమ్మాటికీ ప్రయోగమే. అయితే.., కచ్చితంగా సక్సెస్ అవుతుందన్న నమ్మకంతో చేసిన ప్రయోగం. డిఫరెంట్ పాయింట్, రొటీన్ కి భిన్నమైన నావల్టీ ఉండబట్టే కదా? ఇంత మంది ప్రముఖులు ఈ కథని ఓకే చేసింది.

 

3) ఈ కథను ముందు సమంత, నయనతారకి కూడా వినిపించారట కదా? మరి.. వారందరిని దాటుకుని ఈ కథ కీర్తి సురేశ్ దగ్గరికి రావడానికి కారణం ఏమిటి?

• సాధారణంగా ఒక కథ నచ్చకపోతేనే అది వేరే వాళ్ళ దగ్గరికి పోతుంది. కానీ.., “మిస్ ఇండియా” విషయంలో ఇలా జరగలేదు. నయనతార గారికి “మిస్ ఇండియా” కథ బాగా నచ్చింది. కానీ.., డేట్స్ అడ్జెస్ట్ కాక ఆమె అంగీకరించలేదు. ఆ తరువాత రంగస్థలం సినిమా సెట్స్ లో సమంతాని కలసి ఈ కథ చెప్పా. ఆమెకి కూడా “మిస్ ఇండియా” కథ బాగా నచ్చింది. ఆమె కూడా రెండు నెలలు మాతో ట్రావెల్ చేశారు. కానీ.., సమంత కూడా డేట్స్ అడ్జెస్ట్ చేయలేక ఈ ప్రాజెక్ట్ నుండి తప్పుకుంది. ఆ తరువాత కీర్తి సురేశ్ ని అప్రోచ్ అయ్యాను. “మహానటి” తరువాత 22 స్క్రిప్ట్స్ విన్న కీర్తి సురేశ్ మొదటి సిట్టింగ్ లోనే ఈ కథని ఒకే చేశారు. ఇలా ఒకవైపు హీరోయిన్స్ కి కథ చెప్తూనే, మరోవైపు నిర్మాత మహేశ్ గారికి ఈ సబ్జెక్ట్ నరేట్ చేశాను. అలా ఇద్దరు ఒకే చెప్పడంతో ఈ ప్రాజెక్ట్ ట్రాక్ ఎక్కింది. ఆ విధంగా “మహానటి” లాంటి గొప్ప హిట్ తరువాత.. కీర్తి సురేశ్ ఒప్పుకున్న మూవీ ఇదే కావడంతో మా ప్రాజెక్ట్ పై మంచి హైప్ ఏర్పడింది.

4) ఇంత పెద్ద సినిమా ఎప్పుడు రిలీజ్ అయ్యిందో కూడా తెలియదు. యూట్యూబ్ లో రిలీజ్ అయ్యి, మినిమమ్ వ్యూస్ వచ్చే వరకు చాలా మందికి తెలియకపోవడం ఏమిటి?

• ఈ పరిస్థితికి కారణం కరోనా. కరోనా కారణంగా ఈ సినిమా రిలీజ్ జనం దృష్టిలో పడలేదు. కానీ.., సినిమా ఓపెనింగ్ ని మాత్రం మా నిర్మాత మహేశ్ కోనేరు గారు చాలా వైభవంగా జరిపించారు. 2019 జనవరి 10న అన్నపూర్ణ స్టూడియోలో సినీ ప్రముఖుల సమక్షంలో అద్భుతంగా జరిపించారు.అయితే.. రిలీజ్ వరకు ఎలాంటి పబ్లిసిటీ వద్దు అన్నారు. తీరా 2020 మార్చ్ కి ఫస్ట్ కాపీ రెడీ అయ్యి, మంచి పబ్లిసిటీ ప్లాన్ తో రిలీజ్ కి సన్నాహాలు ప్రారంభమయ్యే నాటికి కరోనా విజృంభించింది. దాంతో.. వెయిట్ చేసి, చేయి చేసి.. చివరికి 2020 నవంబర్ 4న నెట్ ఫ్లిక్స్ లో రిలీజ్ చేశారు నిర్మాత. అయితే. ఈ ఏడాది జులై 4న గోల్డ్ మైన్ టెలి ఫిలిమ్స్ వాళ్ళు హిందీ వెర్షన్ హక్కులు దక్కించుకుని దాన్ని యూట్యూబ్ లో అప్లోడ్ చేశారు. అక్కడ కోట్లాది వ్యూస్ తో బ్లాస్ట్ అయ్యింది మూవీ. తొలి మూడు రోజుల్లోనే 30 కోట్ల వ్యూస్ రాగ, రెండు వారాలకు 60 మిలియన్ వ్యూస్, మిలియన్ పైగా లైక్స్ రావడం చాలా ఆనందంగా అనిపించింది. ఈ విషయంలో మా నిర్మాత మహేశ్ కోనేరు గారికి థాంక్స్ చెప్పుకోవాలి.

5) ఇంత మంచి సినిమా థియేటర్ లో రిలీజ్ ఉంటుందా?

• కొన్ని విషయాలు ఆలోచిస్తే చాలా బాధగా ఉంటుంది అండి. అయితే.. కరోనా ఏ ఒక్కరికో వచ్చిన సమస్య కాదు. యావత్ ప్రపంచాన్ని స్తంభింపచేసిన పెద్ద విపత్తు. ఈ విషయంలో ఎవ్వరం ఏమి చేయలేము. అయితే.. ఓటీటీ ద్వారా వరల్డ్ వైడ్ మైలేజ్ దక్కడం కాస్త ఊరటగా అనిపించింది.

6) నరేంద్రనాధ్ గతంలో ఎవరి దగ్గరైన అసిస్టెంట్ డైరెక్టర్ గా పని చేశారా?

 

• లేదండి.. బేసికల్ గా నేను ఒక షార్ట్ ఫిల్మ్ మేకర్ ను. ముంబయిలోని న్యూయార్క్ అకాడమీలో డైరెక్షన్ వర్క్ షాప్ చేశాను. అలాగే లండన్ ఫిల్మ్ స్కూల్ వాళ్ళ స్క్రీన్ రైటింగ్ లో ఆన్లైన్ వర్క్ షాప్ చేశాను. అవి చేస్తూనే 15 షార్ట్ ఫిలిమ్స్ డైరెక్ట్ చేశాను. ఇదే ఈ సినిమాకి ముందు నా అనుభవం

7) తొలి ప్రయత్నంలోనే విమెన్ సెంట్రిక్ ఫిల్మ్ చేయడానికి మీ ఇన్స్పిరేషన్ ఎవరు?

• మా అమ్మగారే. నాకు అమ్మే ఫస్ట్ ఇన్స్పిరేషన్. ఒక సాధారణ గృహిణిగా.. చిన్న ఎంప్లొయె గా కెరీర్ స్టార్ట్ చేసిన మా అమ్మ పద్మజ గారు.. ఇప్పుడు ఒక ప్రముఖ మీడియా సంస్థకు సీఈఓ గా పని చేస్తున్నారు. ఇలాంటి కథలు రాయడానికి ఇంతకంటే ప్రాక్టికల్ ఇన్స్పిరేషన్ ఇంకెవరు కావాలి..!?

8) తదుపరి ప్రయత్నాలు మొదలు పెట్టే ఉంటారు.. ఆ వివరాలు ఏమిటి?

• ఈసారి స్టార్ ఓరియంటెడ్ సబ్జెక్ట్ తోనే వస్తున్నాను. ఇద్దరు ప్రముఖ హీరోలకు సబ్జెక్టు చెప్పాను. అవి వర్కౌట్ అయితే త్వరలోనే మరొక మంచి ప్రాజెక్ట్ తో మీ ముందుకి వస్తాను. అంటూ.. ఇంటర్వ్యూ కి ముగింపు పలికారు సక్సెస్ ఫుల్ యంగ్ డైరెక్టర్ నరేంద్రనాధ్.