follow us:
ప్రస్తుతం ఎక్కడ చూసినా ఆర్‌ఆర్‌ఆర్‌, నాటు నాటు పాటపైనే చర్చ. మరో మూడు రోజుల్లో.. రిజల్ట్‌ రాబోతుంది. నాటు నాటు పాట ఆస్కార్ గెలుస్తుందా లేదా అన్నది మరి కొద్ది రోజుల్లో తెలిసిపోతుంది. కానీ దేశ ప్రజలంతా ఆస్కార్ రావాలని మనస్ఫూర్తిగా కోరుకుంటున్నారు. వీరిలో గరికపాటి కూడా ఉన్నారు. ఆవివరాలు..
రాజమౌళి దర్శకత్వంలో.. జూనియర్‌ ఎన్టీఆర్, రామ్ చరణ్ హీరోలుగా తెరకెక్కిన చిత్రం ఆర్‌ఆర్‌ఆర్‌. మరో రెండు వారాలు గడిస్తే.. ఈ చిత్రం విడుదలయ్యి ఏడాది పూర్తవుతుంది. సినిమా విడుదలయ్యి సంవత్సరం కావొస్తున్న.. ఇప్పటికి ఆర్‌ఆర్‌ఆర్‌ హవా కొనసాగుతూనే ఉంది. పాన్ ఇండియా రేంజ్‌లో అత్యధిక వసూళ్లు సాధించని చిత్రంగా రికార్డు క్రియేట్‌ చేయడమే కాక.. మరి కొన్ని అరుదైన రికార్డులను తన ఖాతాలో వేసుకుంది ఈ సినిమా. ఆర్‌ఆర్‌ఆర్‌తో తెలుగు సినిమా ఖ్యాతీ విశ్వవ్యాప్తమైంది. ఈ సినిమాలోని నాటు నాటు పాట ఏకంగా ఆస్కార్ బరిలో నిలిచింది. బెస్ట్ ఒరిజినల్ సాంగ్ విభాగంలో నాటు నాటు పాట ఆస్కార్‌కు నామినేట్ అవ్వడంతో.. జక్కన్న, జూనియర్‌, రామ్ చరణ్ పేర్లు విదేశాల్లో సైతం మారుమోగిపోతున్నాయి.
ఇక ఈనెల 13న 95వ అకాడమీ అవార్డులను ప్రకటించనున్నారు. ఈ క్రమంలో తెలుగు వారితో పాటు భారతీయులంతా.. నాటు నాటు పాటకు ఆస్కార్ అవార్డు రావాలని బలంగా కోరుకుంటున్నారు. ఇక ట్రిపుల్‌ ఆర్‌కు ఆస్కార్ రావాలని కోరుకుంటున్న వారిలో ప్రముఖ ప్రవచనకర్త గరికపాటి నరసింహారావు కూడా ఉన్నారు. నాటు నాటు గురించి ఆయన చేసిన వ్యాఖ్యలు నెట్టింట వైరల్‌గా మారాయి. ఆ వివరాలు..
ప్రవచన కర్త గరికపాటి నరసింహరావు గురించి తెలుగు ప్రజలకు ప్రత్యేక పరిచయం అక్కర్లేదు. పురణాలు, వేదాల్లోని అంశాలనే కాక.. సమాజంలో చోటు చేసుకుంటున్న సంఘటనల గురించి కూడా ఆయన తన ప్రవచనాల్లో ప్రస్తావిస్తుంటారు. ఈ క్రమంలో తాజాగా తన ప్రవచనంలో భాగంగా గరికపాటి నరసింహారావు ‘నాటు నాటు’ పాట గురించి ప్రస్తావించారు. అచ్చ తెలుగులో రాసిన ‘నాటు నాటు’ పాట ఆస్కార్‌కు నామినేట్ కావడం సంతోషించాల్సిన విషయమని అన్నారు. అంతేకాక ఆ పాటలో నటించిన ఎన్టీఆర్, రామ్ చరణ్‌లపై ఆయన చేసిన కామెంట్స్‌ ప్రస్తుతం వైరలవుతున్నాయి.
నాటు నాటు పాటలో జూనియర్‌, మెగా పవర్‌ స్టార్‌ ప్రదర్శన గురించి వివరిస్తూ.. ‘‘అచ్చ తెలుగులో రాసిన పాటకు ఆ ఇద్దరు నటులు చేసిన అద్భుత నటనతో పాటు, కీరవాణి సంగీతం, రాజమౌళి దర్శకత్వ ప్రతిభ కారణంగా నేడు ఈ పాటకు ప్రపంచ స్థాయి బహుమతి రాబోతోంది. నాకు నిన్నటి వరకు ఆ పాట గురించి తెలీదు. అయితే ఎక్కడ చూసినా ఈ పాట గురించే చర్చించుకుంటున్నారు. దాంతో నేను మా అబ్బాయి పిలిచి ఆ పాటేంటో పెట్టరా అని చెప్పి.. దాదాపు అరగంట పాటు అలానే కూర్చొని నాటు నాటు పాట విన్నాను. ఆ పాట ఎందుకంత స్థాయికి వెళ్లిందో తెలుసుకోవాలి కదా. పాట పూర్తిగా విన్న తర్వాత.. నాకు అనిపించింది ఒక్కటే. అచ్చ తెలుగు పాట.. ఎక్కడా ఒక్క ఇంగ్లిష్ మాట లేదు. ఇంత చక్కగా రాసిన చంద్రబోస్‌కి నమస్కారం. చాలా మంచి పాట రాశారు’’ అంటూ గరికపాటి ప్రశంసలు కురిపించారు.
ఇక నాటు నాటు పాట ఆస్కార్‌కు నామినేట్ అవ్వడమే చాలా గొప్ప విషయమని.. ఆ భగవంతుడి దయవల్ల మార్చి 13వ తేదీన.. ఇక పురస్కారం కూడా వస్తే మనంత అదృష్టవంతులు ఇంకొకరు ఉండరన్నారు గరికపాటి. అంతేకాక ‘‘నాటు నాటు పాటకు ఆస్కార్ పురస్కారం రావాలని కాంక్షిద్దాం. సరస్వతీ దేవిని పూజిద్దాం. గుడికి వెళ్లే వారు నాటు నాటుకు ఆస్కార్ రావాలని దేవుడికి దండం పెట్టండి. ఆ పురస్కారం వస్తే మనమంతా గర్వంగా తిరుగుతాం’’ అని సూచించారు గరికపాటి.
అంతేకాక ‘నాటు నాటు’ పాటలో ఎన్టీఆర్, రామ్ చరణ్ డ్యాన్స్‌ పర్ఫార్మెన్స్‌పై కూడా గరికపాటి ప్రశంసలు కురిపించారు. వయసులో చిన్నవారైనా వాళ్లకు నమస్కారం అనడం విశేషం. ‘‘నాటు నాటు పాటలో ఆ ఇద్దరి నటుల నటన ఎలా ఉందంటే.. ఈయన బెల్ట్ తీస్తే ఆయనా తీశాడు, ఈయన కుడికాలు తిప్పితే ఆయనా కుడికాలే తిప్పాడు, ఇద్దరూ అలా కూడబలుక్కుని నటన చేయడం ఏదైతే ఉందో కవలలై పుట్టినవారికి కూడా సాధ్యం కాదు. రెండు వేర్వేరు కుటుంబాల్లో పుట్టిన మహానటులు ఇద్దరూ అటువంటి అద్భున నటన ప్రదర్శించారంటే.. వాళ్లు నా కంటే చిన్నవాళ్లైనా సరే.. ఇద్దరికీ నమస్కారం చేస్తున్నాను’’ అంటూ గరికపాటి ఎంతో గొప్పగా ప్రశంసించారు.
‘‘నేను కాస్త కష్టపడితే ఈ పాట రాయగలనేమో కానీ.. వాళ్లలాగా నేను ఎగరలేను కదా అని అనిపించింది నాకు’’అంటూ తనదైన శైలిలో ఛలోక్తులు విసిరారు గరికపాటి. ప్రస్తుతం ఈ వీడియో యూట్యూబ్‌లో వైరల్ అవుతోంది. ఎంతో గొప్ప మేధావి అయిన గరికపాటి నరసింహారావు.. వయసులో తనకంటే ఎంతో చిన్నవాళ్లైన ఎన్టీఆర్, రామ్ చరణ్‌లకు నమస్కారం చెప్పడంపై ఆయన అభిమానులు పొంగిపోతున్నారు. ఇదీ గరికపాటి సంస్కారం అంటూ ప్రశంసిస్తున్నారు. మరి గరికపాటి చేసిన వ్యాఖ్యలపై మీ అభిప్రాయాలను కామెంట్స్‌ రూపంలో తెలియజేయండి.
