follow us:
టాలీవుడ్ లో సెకండ్ ఇన్నింగ్స్ మొదలుపెట్టాక పవర్ స్టార్ పవన్ కళ్యాణ్ రేంజి మరోస్థాయికి చేరుకున్న సంగతి తెలిసిందే. రీఎంట్రీతోనే వకీల్ సాబ్ సినిమా చేశాడు.. ఇటీవల భీమ్లా నాయక్ తో ప్రేక్షకులను పలకరించాడు. అలాగే మరో రెండు సినిమాలు హరిహర వీరమల్లు, భవదీయుడు భగత్ సింగ్ లైనప్ చేశాడు. ప్రస్తుతం తమిళ హిట్ సినిమా ‘వినోదయ సిత్తం’ రీమేక్ చర్చల దశలో ఉంది.
ఇదిలా ఉండగా.. పవన్ కళ్యాణ్ తో సినిమా అంటే దర్శకులు ఓ సెంటిమెంట్ ఫాలో అవుతున్నట్లుగా తెలుస్తుంది. ఇప్పటివరకు ఇండస్ట్రీలో ఎంట్రీ ఇచ్చిన దర్శకులంతా పవన్ కళ్యాణ్ తో సినిమా చేయాలనీ ఆరాటపడుతుంటారు. కానీ పవన్ తో ఎన్నో సినిమా చేస్తే బాగుంటుంది అనే విషయంలో దర్శకులు చాలా క్లారిటీగా ఉంటున్నారని.. అదే సెంటిమెంట్ ఇప్పటివరకు వర్కౌట్ అవుతూ వచ్చినట్లు సమాచారం.
అసలు విషయానికి వస్తే.. పవన్ కళ్యాణ్ తో సినిమా వస్తే చాలు అనుకునే దర్శకులకంటే.. పవన్ తో చేస్తే మూడో సినిమా చేయాలని భావించేవారు ఎక్కువగా ఉన్నారట. ప్రస్తుతం అగ్రదర్శకులుగా వెలుగుతున్న వారంతా పవన్ తో మూడో సినిమా చేసి హిట్లు కొట్టాలని సినీవర్గాలు చెబుతున్నాయి. అలా ఎలా సాధ్యం అనుకుంటే.. అన్నింటికీ ప్రూఫ్స్ ఉన్నాయని అంటున్నారు ఫ్యాన్స్.
ఎవరెవరు పవన్ తో మూడో సినిమా చేసి హిట్స్ కొట్టారంటే.. ‘శుభమస్తు’, శుభాకాంక్షలు సినిమాలతో హిట్ కొట్టిన డైరెక్టర్ భీమనేని శ్రీనివాసరావు.. మూడో సినిమాగా పవన్ తో ‘సుస్వాగతం’ తీసి సూపర్ హిట్ కొట్టాడు. తమిళంలో వాలి, ఖుషి సినిమాలు చేసిన డైరెక్టర్ ఎస్.జె. సూర్య.. పవన్ తో మూడో సినిమాగా ‘ఖుషి’ తీసి బ్లాక్ బస్టర్ అందుకున్నాడు. అలాగే డైరెక్టర్ త్రివిక్రమ్.. నువ్వే నువ్వే, అతడు సినిమాల తర్వాత పవన్ తో ‘జల్సా’ సినిమా చేసి హిట్ ఖాతాలో వేసుకున్నాడు.
అదేవిధంగా షాక్, మిరపకాయ్ సినిమాలు చేసి హిట్ అందుకున్న హరీష్ శంకర్.. పవన్ తో ‘గబ్బర్ సింగ్’ తీసి ఇండస్ట్రీ హిట్ కొట్టాడు. అలాగే కొంచం ఇష్టం కొంచం కష్టం, తడాఖా సినిమాల తర్వాత పవన్ తో ‘గోపాల గోపాల’ చేశాడు దర్శకుడు కిశోర్ పార్థసారథి(డాలీ). ఓమైఫ్రెండ్, ఎంసిఎ సినిమాలు చేశాక పవన్ తో ‘వకీల్ సాబ్’ చేసి హిట్ అందుకున్నాడు డైరెక్టర్ వేణు శ్రీరామ్.
ఇక లేటెస్ట్ భీమ్లా నాయక్ సినిమా చేసిన సాగర్ చంద్రకి కూడా ఇది మూడో సినిమా కావడం విశేషం. అప్పట్లో ఒకడుండేవాడు, అయ్యారే సినిమాలు చేసిన సాగర్.. పవన్ తో భీమ్లా నాయక్ చేశాడు. ప్రస్తుతం ఈ సినిమా విజయవంతంగా థియేటర్లలో రన్ అవుతోంది. ఈ విధంగా టాలీవుడ్ దర్శకులకు పవన్ తో మూడో సినిమా సెంటిమెంట్ గా వర్కౌట్ అవుతుందని నమ్ముతున్నట్లు ఇండస్ట్రీ టాక్. విషయం ఏంటంటే.. పవన్ చేసిన ఈ దర్శకుల సినిమాలలో ‘జల్సా’ తప్ప మిగతా సినిమాలన్నీ రీమేక్ లే కావడం గమనార్హం.
ఇక సెకండ్ ఇన్నింగ్స్ లో సినిమాల పరంగా స్పీడ్ పెంచాడు పవన్. మినిమమ్ ఏడాదికి రెండు సినిమాలు ప్లాన్ చేస్తున్నాడట. ప్రస్తుతం పవన్ ఫ్యాన్స్ అందరి చూపు కూడా హరిహర వీరమల్లు, భవదీయుడు భగత్ సింగ్ సినిమాలపై ఉంది. ఎందుకంటే.. కెరీర్ లో ఫస్ట్ టైమ్ పవన్ చేస్తున్న పీరియాడిక్ సినిమా వీరమల్లు.. ప్రస్తుతం షూటింగ్ శరవేగంగా జరుపుకుంటుంది. క్రియేటివ్ డైరెక్టర్ క్రిష్ ఈ సినిమాని తెరకెక్కిస్తున్నాడు. ఇక భవదీయుడు భగత్ సింగ్ తో.. గబ్బర్ సింగ్ కాంబినేషన్ రిపీట్ కాబోతుంది. చూడాలి మరి ఏం జరగనుందో.. మరి పవన్ తో మూడో సినిమా సెంటిమెంట్ పై మీ అభిప్రాయాలను కామెంట్స్ లో తెలియజేయండి.
