నానాటికి ఎత్తు పెరుగుతున్న శివలింగం.. తీర్థంతో రోగాలు మటుమాయం..!

భారత్ తొలి నుండి హిందూ దేవాలయాలకు ప్రసిద్ధి గాంచింది. గ్రామ దేవత నుండి చారిత్రాత్మకత కలిగిన దేవాలయాలు అనేకం ఈ దేశంలో నెలవై ఉన్నాయి. మొత్తం 33 కోట్ల మంది దేవతలు, దేవుళ్లు ఉన్నారని చెబుతుంటారు పెద్దలు. ఒక్కో దేవత లేదా దేవుళ్లకు ఒక్కో ఇతిహాస గాధ, ఇతర ఆధ్యాత్మికత కథలతో ముడిపడి ఉంటాయి. వాటికంటూ ప్రత్యేక ప్రాశస్త్యం ఉంది. మహిమలు ఉన్నాయి. ఆ గుడికి వెళితే పాపాలు పోతాయని, లేదా ఎప్పటి నుండో వెంటాడుతున్న రోగాలు మటుమాయం అవుతాయని చెబుతుంటారు. అటువంటి దేవాలయాల్లో ఇప్పుడు మనం చెప్పుకోబోయే శివాలయం కూడా ఒకటి. ఇంతకు ఆ శివాలయం ఎక్కడుందంటే..?

దేశంలోని అతి పురాతన శివాలయాల్లో ఒకటి బుద్వా మహాదేవ్. బీహార్‌లోని భోజ్‌పూర్ జిల్లాలోని అరా నగరంలో ఈ శివాలయం ఉంది. ఈ గుడికి మహా భారతానికి సంబంధం ఉందని స్థానికులు భావిస్తుంటారు. పాండవులు అజ్ఞాతవాసంలో ఉన్నప్పుడు ఇక్కడ శివుడిని పూజించేవారని ప్రతీతి. మధ్యయుగంలో, రాజా భోజ్ బుద్వా మహాదేవ్ ఆలయంలో పూజలు నిర్వహించేవారని నమ్ముతారు. అయితే ఈ ఆలయానికి సంబంధించిన మరో ఆసక్తికర విషయం ఏంటంటే.. వేల సంవత్సరాల క్రితం ఈ ఆలయంలో స్థాపించిన శివలింగం కాలక్రమేణా పొడవుగా పెరుగుతుందని విస్తృతంగా స్థానికులు నమ్ముతుంటారు. స్థానికులు చెబుతున్న దాని ప్రకారం.. శివలింగం గతంలో చాలా చిన్నదిగా ఉండేదని, కానీ ఇప్పుడు అది 4 అడుగుల ఎత్తుకు పెరిగిందని చెబుతున్నారు.

అలాగే ఆలయ పూజారి మహంత్ అజిత్ మిశ్రా కూడా ఇదే చెబుతున్నారు. తన పూర్వీకులు తరతరాలుగా ఆలయానికి ప్రధాన పూజారులుగా ఉన్నారని, శివలింగం ఎత్తు పెరగడం అందరూ చూశారని తెలిపారు. అంతేకాదూ.. ఈ శివలింగం నుండి వచ్చే తీర్థం తీసుకుంటే చర్మ వ్యాధులు తగ్గిపోతాయట. వేలాది మంది శివ భక్తులు ప్రతి రోజు ఈ ఆలయాన్ని దర్శించుకుని, శివలింగానికి అభిషేకం చేస్తారు. కార్తీక మాంసం, మహాశివరాత్రి సమయంలో బుద్వా మహాదేవ్ ఆలయం భక్తులతో రద్దీగా ఉంటుంది. ఈ ఆలయాన్ని ఎప్పుడు ఎవరు నిర్మించారో చరిత్రకారులు అంచనా వేయలేకపోతున్నారు.