దేశీయ జీవిత బీమా సంస్థ ఎల్ఐసీలో ఎన్నో రకాల పాలసీలు, పథకాలు అందుబాటులో ఉన్నాయి. అందులో మంచి రాబడిని ఇచ్చే పాలసీలను ఎంచుకోవడం అన్నది చాలా ముఖ్యం. అలా సరైనది ఎంచుకున్నప్పుడే మీరు ఎక్కువ ప్రయోజనం పొందుతారు. ఇప్పుడు అలాంటి ఎక్కువ ప్రయోజనాలు అందిస్తున్న ఒక పాలసీ గురుంచి మీకు వివరాలు అందిస్తున్నాం..
రిస్క్ లేకుండా ఖచ్చితమైన రాబడి పొందాలని ఆలోచించే వారికి లైఫ్ ఇన్సూరెన్స్ కార్పొరేషన్ ఆఫ్ ఇండియా(ఎల్ఐసీ) పాలసీలు అద్భుతమైనవని చెప్పాలి.కస్టమర్లను ఆకట్టుకునేందుకు ఎల్ఐసీ ఎప్పటికప్పుడు కొత్త కొత్త పాలసీలను అందుబాటులోకి తీసుకొస్తుంది. అయితే వాటిల్లో మనకు ఎలాంటి పాలసీ సరిపోతుంది అనేది ఎంచుకోవడం చాలా ముఖ్యం. చాలావరకు అందరూ ఏజెంట్లు చెప్పిన పాలసీలనే తీసుకుంటుంటారు. ఇది ఒకరకంగా మంచికే అయినా.. ఉన్న ప్రతి పాలసీ గురుంచి తెలుసుకొని అందులో మీకు నచ్చింది ఎంచుకోవడం ఇంకా మంచి పద్ధతి. ఇప్పుడు ఎల్ఐసీ బీమా రత్న పాలసీ గురించి తెలుసుకుందాం.. ఇందులో ఇన్వెస్ట్ చేయడం ద్వారా బీమాకు బీమా.. రాబడికి రాబడి ఉంటుంది. మెచ్యూరిటీ నాటికి పెద్ద మొత్తంలో చేతికి డబ్బులు అందుతాయి.
ఎల్ఐసీ బీమా రత్న అనేది మనీ బ్యాంక్ పాలసీ. ఇందులో కచ్చితమైన బోనస్ లభిస్తుంది. ఇందులో ఇన్వెస్ట్ చేయడం ద్వారా మెచ్యూరిటీ సమయానికి ఏకంగా రూ.76 లక్షల పొందే వీలుంది. అయితీ ఈ పాలసీని రూ.5 లక్షల కనీస మొత్తంతో తీసుకోవాల్సి ఉంటుంది. గరిష్ఠ పరిమితి అంటూ ఏమీ లేదు. 90 రోజుల నుంచి 55 ఏళ్ల వరకు వయసు కలిగిన వారు ఎవరైనా ఈ పాలసీ తీసుకోవచ్చు. ప్రీమియం మొత్తాన్ని నెల, మూడు నెలలు, ఆరు నెలలు, వార్షిక పద్ధతుల్లో చెల్లించవచ్చు. ఈ పాలసీని 15 ఏళ్లు, 20 ఏళ్లు, 25 ఏళ్ల టెన్యూర్‌తో తీసుకోవచ్చు. ఇందులో మీకు నచ్చింది ఎంచుకోవచ్చు. ఎంచుకున్న టెన్యూర్ కంటే నాలుగేళ్లు తక్కువగా ప్రీమియంను చెల్లించాల్సి ఉంటుంది. అంటే 15 ఏళ్ల మెచ్యూరిటీ పీరియడ్ ఎంచుకుంటే ప్రీమియం 11 ఏళ్లు కట్టాలి. అలాగే 20 ఏళ్ల టెన్యూర్ ఎంచుకుంటే 16 ఏళ్లు, 25 టెన్యూర్ ఎంచుకుంటే 21 ఏళ్లు ఏళ్ళు ప్రీమియం చెల్లించాలి.
ఉదాహరణకు 25 ఏళ్ల కాలవ్యవధితో రూ.20 లక్షల హామీ మొత్తంతో పాలసీ తీసుకుంటే ఏడాదికి రూ.1.18 లక్ష ప్రీమియం పడుతుంది. అంటే రోజుకు 323 రూపాయలు. వీరికి సర్‌వైవల్ బెనిఫిట్ కింద 23వ ఏడాది, 24వ ఏడాదిలో రూ.5 లక్షల చొప్పున అందుతాయి. అలాగే 25 ఏళ్ల టెన్యూర్ గడిచాక.. గ్యారంటీ అడిషన్స్ కింద రూ.28.5 లక్షలు, మెచ్యూరిటీ బెనిఫిట్ కింద మరో రూ.38.5 లక్షలలు చేతికి అందుతాయి. ఈ పాలసీపై రుణ సౌకర్యం కూడా ఉంటుంది.
ఒకవేళ పాలసీదారడు అర్ధాంతరంగా పాలసీ కాలవ్యవధిలో మరణిస్తే, నామినీకి హామీ ఇవ్వబడిన హామీ మొత్తం మరియు బోనస్ ఇవ్వబడుతుంది. అటువంటి పరిస్థితిలో, బేసిక్ సమ్ అష్యూర్డ్‌లో 125 శాతం వరకు లేదా వార్షిక ప్రీమియం కంటే 7 రెట్ల వరకు, ఏది ఎక్కువైతే అది నామినీకి చెల్లిస్తారు.
గమనిక: ఈ కథనం కేవలం సమాచారం కోసం మాత్రమే. సంప్రదాయ బీమా పాలసీల్లో వచ్చే రాబడి కొద్దిగా తక్కువగా కూడా ఉండవచ్చు. కావున ఏదేని పాలసీని కొనే ముందు ఆ పాలసీ డాక్యుమెంట్ పూర్తిగా చదవడం లేదా ఎల్ఐసీ సిబ్బందిని సంప్రదించి పూర్తి వివరాలు తెలుసుకోవడం మంచిది.
