‘నిర్మా’వాషింగ్ పౌడర్ యాడ్ గుర్తుందా.. ఆ పాప వెనుక పెను విషాదం..!

ప్రస్తుత కాలంలో టీవీలో వచ్చే యాడ్స్‌ ఎక్కువ కాలం గుర్తుండవు. జింగిల్స్‌ చాలా వరకు తగ్గిపోయాయి. అసలు జింగిల్స్‌ అంటే ఈకాలం పిల్లలకు పెద్దగా తెలియదు కూడా. జింగిల్ అంటే ప్రకటనలు, ఇతర వాణిజ్య అవసరాల కోసం ఉపయోగించే చిన్న పాట లేదా ట్యూన్. ప్రస్తుత కాలంలో.. యాడ్‌ అంటే స్టార్‌ హీరోలే గుర్తుకు వస్తారు. కానీ 1990 కాలంలో యాడ్స్‌ అంటే మోడల్స్‌, చిన్నాచితకా నటీనటులు చేసేవారు. ఇక 1990లలో దేశం మొత్తాన్ని ఊర్రూతలూగించిన యాడ్‌.. నిర్మా వాషింగ్‌ పౌడర్‌ ప్రకటన. ఆ కాలం పిల్లలు అంతా ఈ జింగిల్‌ వింటూ పెరిగిన వాళ్లే. వాషింగ్‌ పౌడర్‌ నిర్మా.. పాలలోని తెలుపు.. నిర్మాతో వచ్చింది.. రంగుల బట్టలు తళతళగా మెరిసాయి.. నిర్మా అంటూ టీవీలో వచ్చే ఈ యాడ్‌.. అప్పట్లో ఓ రేంజ్‌లో వైరలయ్యింది. చిన్నారులు మొదలు వృద్ధుల వరకు అందరి నోట ఈ జింగిల్‌ వినిపించేది.

ఈ జింగిల్‌ ప్రకటన తర్వాత.. నిర్మా డిజర్జెంట్‌ విక్రయాలు కూడా బాగా పెరిగాయట. అయితే నిర్మా వాషింగ్‌ పౌడర్‌ యాడ్‌తో పాటు.. ప్యాకెట్‌ మీద ఉండే ఓ పాప ఫోటో కూడా అందరిని ఆకట్టుకునేది. వైట్‌ డ్రెస్‌లో.. రౌండ్‌గా తిరుగుతున్నట్లు కనిపించేది పాప. అయితే ఈ పాప ఎవరైన చిన్నారి మోడలా.. యాడ్‌ ఇంత పాపులర్‌ అయ్యింది కదా.. ఆ తర్వాత పాప ఏం చేసింది.. మళ్లీ ఏదైనా సీరియల్స్‌, సినిమాల్లో నటించిందా అనే అనుమానాలు సహజం. కానీ అవేం జరగలేదు. ఎందుకంటే.. నిర్మా వాషింగ్‌ పౌడర్‌ మీద ఉన్న ఆ చిన్నారి.. అప్పటికే మృతి చెందింది. పైగా తను నిర్మా వాషింగ్‌ పౌడర్‌ కంపెనీని స్థాపించిన యజమాని కుమార్తె కావడం గమనార్హం. ఈ యాడ్‌ని కుమార్తె జ్ఞాపకార్థం ఆమె తండ్రి రూపొందించాడు.

అయితే ప్యాకెట్‌ మీద చిరునవ్వులు చిందిస్తూ ఉండే ఆ చిన్నారి వెనక ఎంతో విషాదం దాగి ఉంది. ఇక ఈ నిర్మా వాషింగ్‌ పౌడర్‌ సంస్థను స్థాపించిన వ్యక్తి కర్సన్‌భాయ్‌ పటేల్‌. వీరిది గుజరాత్‌. కెమికల్‌ ఇంజనీర్‌ చేసిన కర్సన్‌భాయ్‌.. ప్రభుత్వ ఉద్యోగం చేస్తూ.. రకరకాల ప్రయోగాలు చేసేవాడు. ఆ క్రమంలోనే 1969లో సోడా యాష్‌కి మరికొన్ని కెమికల్స్‌ కలిపితే మాసిన బట్టలను తళతళ మెరిసేలా చేయగలిగే పౌడర్‌ ఆయన ఆలోచనల నుంచి రూపుదిద్దుకుంది. ఇంటి వెనుకాల షెడ్డులోనే డిటర్జెంట్‌ పౌడర్‌ తయారీ చేపట్టారు కర్సన్‌భాయ్‌. ప్రయోగాలు, ఉద్యోగం.. ఇలా బిజీ బిజీగా గడిపేవాడు. ఊపిరిసలపని పనుల్లో​.. ఏమాత్రం సమయం దొరికినా.. ఆయన గారాల పట్టి.. నిరుపమతో ఆటపాటల్లో మునిగిపోయేవాడు. కుమార్తెని నిర్మా అంటూ ముద్దుగా పిలుచుకునేవాడు. ఇక కుమార్తెతో కలిసి రకరకాల ఆటలు ఆడేవాడు. పని, బిడ్డతో సంతోషంగా గడపడం.. ఇదే అతని లోకం అయ్యింది.

కారు ప్రమాదంతో పెను విషాదం..

అయితే సంతోషంగా సాగుతున్న వారిని చూసి.. విధికి కన్ను కుట్టింది. కారు యాక్సిడెంట్‌ రూపంలో.. విషాదం వారి ఇంటి తలుపు తట్టింది. ఈ ప్రమాదంలో.. నిర్మా కన్నుమూసింది. దాంతో వారి కుటుంబంలో అంధకారం అలుముకుంది. ఇక కర్సన్ భాయ్ గురించి చెప్పాల్సిన పనే లేదు. కుమార్తె మరణం ఆయనను మానసికంగా కుంగదీసింది. బిడ్డతో పాటే ఆయన సంతోషం కూడా వెళ్లిపోయింది. దేనిమీదా ఆసక్తి లేదు.. తినడం, పడుకోవడం అన్ని మర్చిపోయాడు. జీవితం శూన్యం అయిపోయినట్లు భావించాడు. కుటుంబ సభ్యులు అతడి పరిస్థితి చూసి భయపడ్డారు. ఎలాగైనా మార్పు తీసుకురావాలని భావించారు. మళ్లీ ప్రయోగాలు చేసే దిశగా.. కర్సన్‌ను ప్రొత్సాహించారు. కాలం గడుస్తున్న కొద్ది.. కర్సన్‌ క్రమంగా బాధ నుంచి తేరుకోగలిగాడు. అయితే బిడ్డను మర్చిపోలేక.. తన పేరు చిరస్థాయిగా నిలిచిపోయేలా ఏమైనా చేయాలని భావించాడు. ఆ ఆలోచనల్లోంచి పుట్టిందే.. నిర్మా వాషింగ్‌ పౌడర్‌ కంపెనీ. 1969లో దీన్ని స్థాపించాడు కర్సన్‌.

ఉద్యోగానికి రాజీనామా చేసి వ్యాపారంపై దృష్టి..

బిడ్డ పేరుతో తయారు చేసిన వాషింగ్‌ పౌడర్‌ను నిర్మాను ఎలాగైనా ప్రజలందరికి చేరువ చేయాలనే లక్ష్యంతో ప్రభుత్వ ఉద్యోగానికి రాజీనామా చేశాడు కర్సన్‌. దానిలో భాగంగా సైకిల్‌ మీద ఊరువాడా… మారు మూల వీధుల్లోకి కూడా తిరిగి.. గడపగడపకూ నిర్మా వాషింగ్‌ పౌడర్‌ను పరిచయం చేశాడు. ప్రారంభంలో నిర్మా డిటర్జెంట్‌ పౌడర్‌ను కేజీ రూ.3 లకే (అప్పటి ధర) అమ్మాడు. ధర తక్కువగా ఉండటమే కాక.. నాణ్యంగా ఉండటంతో.. మహిళలంతా నిర్మా వాషింగ్‌ పౌడర్‌నే కొనడం ప్రారంభించారు. దాంతో గుజరాత్‌లో కొనుగోళ్లు విపరీతం పెరిగాయి.

తన వాషింగ్‌ పౌడర్‌ను దేశమంతా పరిచయం చేయాలనుకున్నాడు కర్సన్‌. అందుకోసం ఏం చేయాలా అని ఆలోచిస్తుండగా.. అతడి దృష్టి టీవీ మీద పడింది. 80వ దశాబ్దంలో దూరదర్శన్‌ ప్రసారాలు దేశమంతటా విస్తరించటంతో.. తన వాషింగ్‌ పౌడర్‌ మార్కెట్‌ కోసం దాన్ని చక్కగా ఉపయోగించుకున్నారు కర్సన్‌భాయ్‌. ఈ క్రమంలో నిర్మా వాషింగ్‌ పౌడర్‌ కోసం ప్రత్యేకంగా యాడ్‌ రూపొందించారు. ‘‘వాషింగ్‌ పౌడర్‌ నిర్మా.. వాషింగ్‌ పౌడర్‌ నిర్మా’’ అనే జింగిల్‌.. దేశమంతా మారుమోగింది. యాడ్‌లోని‘‘పాలలోని తెలుపు నిర్మాతో వచ్చింది’ అనే స్లోగన్‌ మహిళలను విపరీతంగా ఆకట్టుకుంది. ఈ జింగల్‌ ఎఫెక్ట్‌తో నిర్మా వాషింగ్‌ పౌడర్‌.. దేశంలోనే నంబర్‌ వన్‌ బ్రాండ్‌గా మారిపోయింది. ముఖ్యంగా మధ్య తరగతి ప్రజలకు బడ్జెట్‌లో లభిస్తుండటంతో.. నిర్మా అమ్మకాలు బాగా పెరిగాయి.

కూతురు రూపం చిరస్థాయిగా నిలిచిపోయేలా యాడ్‌..

నిర్మా యాడ్‌ ఆ స్థాయిలో సక్సెస్‌ కావడానికి కారణం.. కర్సన్‌భాయ్‌కు కూతురిపై ఉన్న ప్రేమ. అప్పటికే నిర్మా పేరుతో జనం మధ్యన కనిపిస్తున్న తన కూతురు రూపం చిరస్థాయిగా నిలిచిపోయేలా యాడ్‌ను డిజైన్‌ చేయించాడు కర్సన్‌ భాయ్‌. ఇక జింగిల్‌ చివర్లో.. ముందుగా తెల్ల గౌనులో ఓ చిన్నారిపాపను గుండ్రంగా తిప్పించి.. ఆ స్టిల్‌ ఫ్రీజ్‌ చేసే సమయంలో తన కూతురు ఫొటో వచ్చేలా డిజైన్‌ చేశాడు. ఈ ప్రయోగం సక్సెస్‌ అయ్యింది. అలా తన కూతురు రూపుని.. నిర్మా వాషింగ్‌ పౌడర్‌ ప్యాకెట్‌ మీద ముద్రించాడు కర్సన్‌. ఇక ఆనాటి నుంచి ఈనాటి వరకూ కూడా ఎన్ని బ్రాండెడ్ వాషింగ్ పౌడర్లు ఉన్నా.. నిర్మా అలానే కొనసాగుతోంది. ఇక అప్పట్లో పేరు తెలియని వారు.. తెల్లగౌను వేసుకున్న పాప బొమ్మ ఉన్న డిటెర్జెంట్‌ పౌడర్‌ అడిగి మరీ కొనుక్కునేలా ఆ యాడ్‌ క్లిక్‌ అయ్యింది.

అంచెలంచెలుగా ఎదుగుతూ.. అలా 2004 నాటికల్లా దేశంలో నంబర్‌ వన్‌ బ్రాండ్‌గా కొనసాగుతూ 8 లక్షల టన్నుల డిటర్జెంట్‌ పౌడర్‌ తయారు చేస్తున్న సంస్థగా నిర్మా రికార్డు సృష్టించింది. నిర్మా కంపెనీ ప్రత్యక్షంగా 14 వేల మందికి ఉపాధి కల్పిస్తూ.. పరోక్షంగా లక్ష మందికి పైగా జీవనాధారమయ్యింది. అలా కుమార్తె మీద ప్రేమతో ఓ తండ్రి చేసిన ప్రయోగం ఎందరికో జీవితాన్నిచ్చింది. వారి నవ్వులో.. తన కుమార్తె ముఖాన్నిచూసుకుంటున్నారు కర్సన్‌ భాయ్‌.