స్పై సినిమా రివ్యూ

‘కార్తికేయ 2’ తో సాలిడ్ హిట్ కొట్టి ఊహించని విధంగా పాన్ ఇండియా స్థాయిలో గుర్తింపు తెచ్చుకున్న యంగ్ హీరో నిఖిల్ సిద్ధార్థ్ నటించిన లేటెస్ట్ ఫిలిం.. ‘స్పై’. నేతాజీ సుభాష్ చంద్రబోస్ మరణం వెనుకగల రహస్యాలను చూపించనున్నట్లు ప్రోమోలతో హైప్ క్రియేట్ చేశారు టీం. ఈ మూవీతో ‘క్షణం’, ‘గూఢచారి’, ‘ఎవరు’, ‘హిట్ (1&2) సినిమాలకు ఎడిటర్‌గా వర్క్ చేసిన గ్యారీ బీహెచ్ దర్శకుడిగా ఇంట్రడ్యూస్ అవుతున్నాడు. ఐశ్యర్వ మీనన్ హీరోయిన్. రాజ శేఖర్ రెడ్డి ప్రొడ్యూసర్. ప్రేక్షకుల్లో అంచనాలు పెంచేసిన ‘స్పై’ అందుకు తగ్గట్టుగానే భారీస్థాయిలో బిజినెస్ జరుపుకుంది. నిఖిల్ కెరీర్‌లో హయ్యస్ట్ బిజినెస్ అలాగే ఓవర్సీస్‌ ప్రీమియర్స్ నుండి థియేట్రికల్ రిలీజ్ వరకు ఇదే ఎక్కువ. ‘జూన్ 29న పాన్ ఇండియా స్థాయిలో గ్రాండ్‌గా రిలీజ్ అయిన ‘స్పై’ ఎలా ఉంది? అనేది రివ్యూలో చూద్దాం.

కథ:

‘రా’ ఇంటిలిజెన్స్‌లో ఏజెంట్‌గా పని చేసే జై (నిఖిల్) శ్రీలంకలో ఓ మిషన్ కంప్లీట్ చేసి ఇండియా తిరిగొస్తాడు. ‘రా’ ఛీఫ్ శాస్త్రి (మకరంద్ దేశ్ పాండే) ఓ మిషన్‌లో ప్రాణాలు కోల్పోయిన ఏజెంట్ ఆనంద్ వర్థన్ (ఆర్యన్ రాజేష్) ఫైల్ జైకిచ్చి, అతని చావు గురించి తెలుసుకోమని ఆర్డర్ వేస్తాడు. ఈ మిషన్‌ని ఛాలెంజింగ్‌గా తీసుకున్న జై పలు సవాళ్లను ఎదుర్కొంటాడు. ఇందులో భాగంగా తనకెదురైన ఖాదిర్ ఖాన్, అబ్దుల్ రెహ్మాన్ ఎవరు?, జై ఎలాంటి నిజాలు తెలుసుకున్నాడు?, చివరికి ఆ మిషన్ ఎలా సక్సెస్ అయ్యింది? అనేది ‘స్పై’ కథ.

విశ్లేషణ:

జనరల్‌గా ‘స్పై’ మూవీస్ అనగానే కథ ఎలా ఉంటుందనేది తెలిసిపోతుంది. ఇప్పటివరకు ఈ తరహా సినిమాలు చాలానే చూశాం. ఓ ఏజెంట్ (హీరో) ఉంటాడు, రా డిపార్ట్‌మెంట్, దానికి ఓ ఛీఫ్, అతను హీరోకి ఓ మిషన్ అప్పగిస్తాడు. హీరో చివరికి విలన్‌ని ఎలా చంపాడు, మిషన్ ఎలా ముగిసింది అనేది కథ. దీన్ని ‘స్పై’ అక్షరాలా ఫాలో అయిపోయింది. ఫస్టాఫ్ విషయానికొస్తే.. జోర్డాన్‌లో వెపన్స్ సగ్మింగ్ల్ చేసే ఖాదిర్ ఖాన్‌ని రా ఏజెంట్ సుభాష్ కాల్చి చంపగా, వెంటనే సుభాష్‌ని ఇంకెవరో చంపేస్తారు. కట్ చేస్తే శ్రీలంకలో జై ఎంట్రీ, మిషన్ కంప్లీట్ చేసి స్వదేశానికి రావడం, సుభాష్ డెత్ గురించిన మిషన్ అప్పజెప్పగా నేపాల్ వెళ్లడం, అక్కడ ఏజెంట్ వైష్ణవి (ఐశ్వర్య మీనన్) వీళ్లతో జాయిన్ అవడం, గతంలో జైతో ఆమెకో రొటీన్ లవ్ స్టోరీ, ఓ మంచి ఇంటర్వెల్ బ్యాంగ్.. ఇక సెకండాఫ్‌కి వచ్చే సరికి ఖాదిర్ ఖాన్ గురించి వెళ్లిన జై అండ్ టీంకి చాలా షాకింగ్ అండ్ సర్‌ప్రైజింగ్ ఫ్యాక్ట్స్ తెలుస్తాయి. మన దగ్గర మిస్ అయిన సుభాష్ చంద్రబోష్ డెత్ మిస్టరీ ఫైల్ ఎవరి చేతికి చిక్కింది?, ఫైనల్‌గా జై ఏం తెలుసుకున్నాడు? అనే విషయాలు తెలుసుకోవాలాంటే థియేటర్‌కి వెళ్లాల్సిందే.

నటీనటుల పనితీరు:

నిఖిల్ ఏజెంట్ జై క్యారెక్టర్‌కి చక్కగా సూట్ అయ్యాడు. ఫస్ట్ టైం ఇలాంటి జానర్‌లో నటిస్తుండడంతో మంచి ఈజ్, ఎనర్జీతో చేసుకుంటూ వెళ్లిపోయాడు. అభినవ్ గోమటం ఏజెంట్ కమల్ పాత్రలో చేసిన కామెడీ బాగానే ఉంది. ఏజెంట్ వైష్ణవిగా ఐశ్వర్య మీనన్ ఓకే. సురేష్, ఆర్యన్ రాజేష్, సచిన్ ఖేడ్కర్, పోసాని కనిపించింది తక్కువ సేపే అయినా ఆకట్టుకున్నారు. ఇక రానా దగ్గుబాటి కాసేపు మెరిశాడు. శ్రీ చరణ్ పాకాల బ్యాగ్రౌండ్ స్కోర్ ప్లస్ అయింది. విశాల్ చంద్రశేఖర్ పాటలు పెద్దగా గుర్తుండేలా లేవు. సినిమాటోగ్రఫీ బాగుంది కానీ కొన్ని చోట్ల గ్రాఫిక్స్ తేలిపోయాయి. యాక్షన్ సీక్వెన్సెస్ బాగున్నాయి. డైరెక్టర్ గ్యారీ స్వతహా ఎడిటర్. కానీ ఫస్ట్ హాఫ్‌లో సీన్స్ ట్రిమ్ చేసుంటే బాగుండేదనిపిస్తుంది. దాని వల్ల ల్యాగ్ అనిపిస్తుంది.

బలాలు:

• నిఖిల్ నటన
• నేపథ్య సంగీతం
• మొదటి భాగం

బలహీనతలు:

• రొటీన్ కథ, కథనాలు
• చాలా చోట్ల సినిమాటిక్ లిబర్టీ తీసుకోవడం
• కొన్ని సన్నివేశాలు నిడివి ఎక్కువగా ఉండడం

చివరి మాట: ‘స్పై’ తరహా సినిమాలను ఇష్టపడే వారు ఓసారి చూడొచ్చు.

రేటింగ్: 2/5

గమనిక: ఇది సమీక్షకుడి వ్యక్తిగత అభిప్రాయం మాత్రమే!