follow us:
టీమిండియా రెండు సార్లు విశ్వ విజేతగా నిలవడంతో యువరాజ్ సింగ్ పాత్ర మరువలేనిది. అయితే ఈ మాజీ స్టార్ ఆల్ రౌండర్ మాత్రం భారత్ వరల్డ్ కప్ గెలవదని షాకింగ్ కామెంట్స్ చేసాడు.
వన్డే వరల్డ్ కప్ కి కౌంట్ డౌన్ స్టార్ట్ అయింది. మరో రెండు నెలలు సమయం మాత్రమే మిగిలి ఉంది. దాదాపు పుష్కర కాలం తర్వాత స్వదేశంలో వరల్డ్ కప్ జరుగుతుండడంతో టీమిండియాపై భారీ అంచనాలే ఉన్నాయి. వరల్డ్ కప్ చరిత్రలోనే తొలిసారి పూర్తి స్థాయిలో భారత్ వేదికగా వరల్డ్ కప్ నిర్వహించబోతున్నారు. అక్టోబర్ 5 నుంచి ప్రారంభం కానున్న ఈ టోర్నీ నవంబర్ 19 న జరిగే ఫైనల్ తో ముగుస్తుంది. దీంతో ఎక్స్ పర్ట్స్, క్రికెట్ లెజెండ్స్ భారత్ ని టైటిల్ ఫేవరేట్ గా భావిస్తుంటే టీమిండియా మాజీ స్టార్ ఆల్ రౌండర్ యువరాజ్ సింగ్ మాత్రం భారత్ వరల్డ్ కప్ గెలవదని షాకింగ్ కామెంట్స్ చేసాడు.
టీమిండియా రెండు సార్లు విశ్వ విజేతగా నిలవడంతో యువరాజ్ సింగ్ పాత్ర మరువలేనిది. 2007 టీ20 ప్రపంచకప్ లో తన విధ్వంసక బ్యాటింగ్ తో తొలి సారే టీమ్ఇండియా విశ్వ విజేతగా నిలువడం లో కీలక పాత్ర పోషించిన యువారజ్.. 2011 వన్డే వరల్డ్ కప్ లో జట్టు విజయానికి తన రక్తాన్ని ధారపోశాడనే విషయం తెలిసిందే. క్యాన్సర్ బారిన పడి ఇబ్బంది పడుతున్నా.. ఏమాత్రం వెరువకుండా.. అటు బ్యాట్ తో ఇటు బంతితో సత్తాచాటి.. జట్టు రెండో సారి టైటిల్ జగజ్జేతగా నిలవడంలో ప్రధాన పాత్ర వహించాడు. అయితే ఆ తర్వాత జట్టులో స్థానం కోల్పోయిన యువరాజ్ సింగ్ ప్రస్తుతం క్రికెట్ కి దూరంగా ఉంటున్నాడు. ఇదిలా ఉండగా తాజాగా ఒక ఛానల్ కి ఇచ్చిన ఇంటర్వ్యూలో టీమిండియా లోపాలను ఎత్తి చూపాడు. జట్టులో చాలా బలహీనతలు ఉన్నాయని.. ఈ జట్టుతో వరల్డ్ గెలవదని ముందుగానే జోస్యం చెప్పాడు.
యువరాజ్ సింగ్ మాట్లాడుతూ ” ప్రపంచ కప్ గెలిచేందుకు కావాల్సిన అర్హతలు విభారత జట్టులో లేవు. జట్టులో ఎన్నో లోపాలు కనిపిస్తున్నాయి. ముఖ్యంగా మిడిల్ ఆర్డర్ మరింత బలహీనంగా కనిపిస్తుంది.కేఎల్ రాహుల్, శ్రేయస్ అయ్యర్, రిషభ్ పంత్ లేని లోటు స్పష్టంగా కనిపిస్తుంది. వారి స్థానాలను సరైన ఆటగాళ్లతో భర్తీ చేయకపోతే టీమిండియాకు కష్టాలు తప్పవు. కీలక మ్యాచుల్లో ప్రయోగాలు చేయడం కూడా కరెక్ట్ కాదని నేను భావిస్తున్నా. మిడిల్ ఆర్డర్ లో ఆడాలంటే చాలా స్కిల్ కావాలి. ఒత్తిడిని అధిగమిస్తూ బ్యాటింగ్ చేయాల్సి ఉంటుంది. భారత పౌరుడిగా ప్రపంచ కప్ గెలుస్తుందని చెప్పి నేను దేశభక్తిని చాటుకోవచ్చు. కానీ సరైన ప్లేయర్లతో పాటు మేనేజ్‌మెంట్ లేనప్పుడు ప్రపంచకప్ గెలుస్తామని ఎలా చెప్పగలం?’అని యువరాజ్ సింగ్ ఈ సందర్భంగా చెప్పుకొచ్చాడు. మరి యువీ ఇండియా వరల్డ్ కప్ గెలవదు అని చెప్పడం మీకేవిధంగా అనిపించిందో కామెంట్ల రూపంలో తెలపండి.
