follow us:
స్తబ్దుగా సాగుతున్న మ్యాచ్ లో కాస్త ఉత్సాహం నింపేందుకు ఇంగ్లండ్ పేసర్ స్టువర్ట్ బ్రాడ్ చేసిన పని ఇప్పుడు చర్చనీయాంశంగా మారింది. బెయిల్స్ మార్చితే వికెట్ల పడటం వెనుక ఉన్న ఆసక్తికర అంశాలేంటో తెలుసా?
ఆస్ట్రేలియా, ఇంగ్లండ్ మధ్య జరిగిన యాషెస్ సిరీస్ లో పలు ఆసక్తికర విశేషాలు చోటు చేసుకోగా.. అందులో ముఖ్యంగా ఒక విషయం క్రికెట్ అభిమానులను కట్టిపడేసింది. 146 ఏళ్ల ఘన చరిత్ర ఉన్న టెస్టు క్రికెట్ లో మైండ్ గేమ్ ప్రముఖ పాత్ర పోషిస్తుందనే విషయం తెలిసిందే. ఓ ఆటగాడి అత్యుత్తమ ఆటతీరును లెక్కించాలంటే.. అది సుదీర్ఘ ఫార్మాట్ తోనే సాధ్యమని ఎన్నోసార్లు నిరూపితమైంది. ఎర్రబంతితో సుదీర్ఘంగా సాగే టెస్టులే.. ఓ ఆటగాడి శక్తి సామర్థాలకు అసలైన పరీక్ష పడుతాయి. గంటల తరబడి క్రీజులో పాతుకుపోగల నైపుణ్యం, ఎలాంటి బంతినైనా డిఫెండ్ చేయగల నేర్పు, అవసరమైతే ధాటిగా ఆడగల దమ్ము ఇలా ఓ ప్లేయర్ ను పరిపూర్ణం చేయడంలో టెస్టు క్రికెట్ దే పెద్ద పాత్ర. మరి ఐదు రోజుల పాటు ప్రత్యర్థితో తలపడుతున్నప్పుడు.. శరీరంతో పాటు మనసును లగ్నం చేయక తప్పదు.
ఇందులో భాగంగా.. కొన్నిసార్లు ప్రత్యర్థి ప్లేయర్లపై పైచేయి సాధించేందుకు ఆటగాళ్లు మైండ్ గేమ్స్ ఆడుతుంటారు. అవతలి బ్యాటర్ ఏకాగ్రతను దెబ్బ తీసేందుకు కొన్ని సార్లు ఫీల్డర్లు.. మాటల దాడి చేస్తే.. మరి కొన్నిసార్లు బౌలర్లు కావాలనే టైమ్ వేస్ట్ చేస్తూ లయ కోల్పేయేలా చేసేందుకు ప్రయత్నిస్తుంటారు. తాజా యాషెస్ సిరీస్ లోనూ దాదాపు ఇలాంటి ఘటనే చోటు చేసుకుంది. ఆస్ట్రేలియా తొలి ఇన్నింగ్స్ లో బ్యాటింగ్ చేస్తున్న సమయంలో ఉస్మాన్ ఖాజా, మార్నస్ లబుషేన్ క్రీజులో పాతుకుపోయారు. ముఖ్యంగా వన్ డౌన్ బ్యాటర్ లబుషేన్ ఇంగ్లండ్ ప్లేయర్లకు కొరుకుడు పడని కొయ్యలా మారాడు. రెండు గంటలకు పైగా క్రీజులో గడిపిన లబుషేన్.. 82 బంతులు ఎదుర్కొని కేవలం 9 పరుగులు మాత్రమే చేశాడు. అటు ఖాజా, ఇటు లబుషేన్ ఏ మాత్రం పొరబాట్లకు తావివ్వకపోవడంతో.. ఇంగ్లిష్ బౌలర్లు వికెట్ తీసేందుకు నానా తంటాలు పడ్డారు. ఆ సమయంలో మ్యాచ్ లో ఓ మ్యాజిక్ చోటు చేసుకుంది.
అప్పటికే పలుమార్లు లబుషేన్ తో మైండ్ గేమ్స్ ఆడిన బ్రాడ్.. ఎంతకీ ఔట్ కాకపోతుండటంతో వికెట్ల మీద ఉండే బెయిల్స్ అటు ఇటు మార్చాడు. దీన్ని సరదాగా తీసుకున్న లబుషేన్.. నవ్వుతూ కనిపించాడు. అయితే విచిత్రంగా.. ఆ తదుపరి బంతికే మార్క్ వుడ్ బౌలింగ్ లో లబుషేన్ స్లిప్ లో క్యాచ్ ఇచ్చి పెవిలియన్ కు చేరాడు. దీంతో బ్రాడ్ చేసిన పనికి జట్టు సభ్యులంతా అతడిని అభినందించగా.. రెండు గంటలకు పైగా క్రీజులో నిలిచిన ఓ ప్లేయర్ ను ఓ చిన్న ట్రిక్ ప్లే చేయడం ద్వారా వెనక్కి పంపాడని వ్యాఖ్యాతలు అభిప్రాయపడ్డారు. అయితే సాధారణంగా ఒక అంశాన్ని ఒకే కోణంలో చూస్తున్నప్పుడు అందులో ఏ మార్పు కనిపించకపోయినా.. ద్రుష్టి కోణాన్ని మారిస్తే ఫలితాలు భిన్నంగా వస్తాయనే సింపుల్ సైన్స్ ఇందులో దాగుంది. ఈ క్రమంలో యాషెస్ సిరీస్ లో 150 వికెట్లు పడగొట్టిన తొలి ఇంగ్లండ్ బౌలర్ గా రికార్డు నెలకొల్పిన బ్రాడ్.. ఈ సిరీస్ తో అంతర్జాతీయ క్రికెట్ కు వీడ్కోలు పలికాడు. ఆసీస్ రెండో ఇన్నింగ్స్ లోనూ మరోసారి వికెట్ల మీద బెయిల్స్ మార్చిన బ్రాడ్.. కెరీర్ చివరి బంతికి వికెట్ ఖాతాలో వేసుకొని ఘనంగా రిటైర్మెంట్ తీసుకున్నాడు.
