Sourav Ganguly: అనుభవం లేకపోయినా నాలుగో స్థానానికి అతనే సరైనోడు: సౌరవ్ గంగూలీ

మరో రెండు నెలలో స్వదేశంలో వరల్డ్ కప్ జరగనున్న సంగతి తెలిసిందే. ఇందులో భాగంగా కీలక ప్లేయర్ల గాయాలు టీమిండియాని కలవరపెడుతున్నాయి. ముఖ్యంగా మిడిల్ ఆర్డర్ సమస్య జట్టుని బాగా వేధిస్తుంది. పంత్ దాదాపుగా వరల్డ్ కప్ రేస్ నుంచి నిష్క్రమించగా.. అయ్యర్, రాహుల్ గాయాల విషయంలో ఒక క్లారిటీ లేదు. ఇక కీలకమైన నాలుగో స్థానం కోసం మరోసారి యాజమాన్యానికి పెద్ద తలనొప్పిగా మారింది. ఇదిలా ఉండగా ఇటీవలే వెస్టిండీస్ పర్యటనలో భాగంగా తిలక్ వర్మ నాలుగో స్థానంలో అదరగొట్టిన సంగతి తెలిసిందే. ఈ నేపథ్యంలో తిలక్ నాలుగో స్థానానికి సరైనోడు అని అభిమానులతో పాటు ఎక్స్ పర్ట్స్ భావిస్తున్నారు. ఇదే విషయాన్ని ప్రస్తావిస్తూ మాజీ కెప్టెన్ సౌరవ్ గంగూలీ తిలక్ వర్మ నాలుగో స్థానానికి కరెక్ట్ అని చెప్పేసాడు.

వయసు 20 సంవత్సరాలే అయినా తిలక్ వర్మ బ్యాటింగ్ చూస్తే ప్రశంసించాల్సిందే. వచ్చిన ప్రతి అవకాశాన్ని రెండు చేతులా ఒడిసిపట్టుకుంటున్నాడు. ఫస్ట్ క్లాస్ క్రికెట్, ఐపీఎల్ తాజాగా అంతర్జాతీయ క్రికెట్ లో తన సత్తా చూపిస్తున్నాడు. ఇటీవలే విండీస్ పర్యటనలో టీ 20 ల ద్వారా అంతర్జాతీయ క్రికెట్ లో అడుగుపెట్టిన ఈ యంగ్ స్టర్ అక్కడ టాప్ స్కోరర్ గా నిలిచి ఏకంగా వరల్డ్ కప్ రేస్ లోకి వచ్చాడు. ఈ సమయంలో కొందరు తిలక్ వర్మను జట్టులోకి తీసుకోవద్దంటే చాలా మంది ఎక్స్ పర్ట్స్ అతనే నాలుగో స్థానానికి సరైనోడు చెప్పుకొస్తున్నారు. తాజాగా ఈ లిస్టులో గంగూలీ కూడా చేరిపోయాడు. అనుభవం పెద్ద సమస్య కాదు తిలక్ ని నాలుగో స్థానంలో ఆడించాలని ఈ సందర్భంగా సూచించాడు.

గంగూలీ మాట్లాడుతూ ” నెంబర్ 4 లో సరైన బ్యాటర్ లేరంటే నేను ఒప్పుకోను. ఎందుకంటే అనుభవం లేకపోయినా ఎంతోమంది ఆ స్థానంలో బ్యాటింగ్ చేయగలరు. నెంబర్ 4 స్పాట్‌కు ఓ లెఫ్టాండర్‌గా తిలక్ వర్మ సరైన ఆప్షన్. అతని ఫియర్‌లెస్ గేమ్.. పరిస్థితులకు తగ్గట్లు ఆడే పరణితి జట్టుకు కలిసొస్తుంది. జైస్వాల్ ని బ్యాకప్ ఓపెనర్ గా తీసుకోవాలి. ఇషాన్ కిషన్ లాంటి లెఫ్ట్ హ్యాండర్ ఉంటే జట్టుకి కలిసి వస్తుంది. ఈ ముగ్గురూ నిలకడగా బ్యాటింగ్ చేయడంతో పాటు ఫియర్ లెస్ గేమ్ ఆడతారు. సీనియర్లు, యువకులతో కూడిన ఒక జట్టుని ఎంపిక చేయాలి అప్పుడే జట్టు సమతూకంగా ఉంటుంది”. అని తెలిపాడు. మరి తిలక్ వర్మ నాలుగో స్థానానికి సరైనోడా? ఈ విషయంలో మీ అభిప్రాయాలను కామెంట్ల రూపంలో తెలపండి.