దుమ్మురేపుతున్న రుతురాజ్‌ గైక్వాడ్‌..! 6 మ్యాచ్‌ల్లో 5 సెంచరీలు

టీమిండియా యువ క్రికెటర్‌ రుతురాజ్‌ గైక్వాడ్‌ సెంచరీల మోత మోగిస్తున్నాడు. ఐపీఎల్‌తో భారీ క్రేజ్‌ సంపాదించుకున్న రుతురాజ్‌.. టీమిండియాకు కూడా ఆడాడు. ఒక వన్డే, 9 టీ20ల్లో టీమిండియాకు ఆడినా.. దేశవాళీ క్రికెట్‌లో మాత్రం రుతురాజ్‌ ఒక సూపర్‌స్టార్‌గా మారిపోయాడు. బరిలోకి దిగితే సెంచరీనే అనే రేంజ్‌లో రుతురాజ్‌ డామినేషన్‌ కొనసాగుతోంది. విజయ్‌ హజారే ట్రోఫీలో మహారాష్ట్ర కెప్టెన్‌గా ఉన్న రుతురాజ్‌.. అతను ఆడిన గత 6 ఇన్నింగ్స్‌ల్లో ఏకంగా 5 సెంచరీలు బాదాడు. ఐపీఎల్‌లో ధోని కెప్టెన్సీలో రాటుతేలిన రుతురాజ్‌.. ఐపీఎల్‌తో పాటు దేశవాళీ ట్రోఫీల్లో దుమ్మురేపుతున్నాడు. గత ఆరు మ్యాచ్‌ల్లో అతను చేసిన పరుగులు 727. ఈ ఒక్క నంబర్‌తో అతను ఎలాంటి ఫామ్‌లో ఉన్నాడో అర్థం చేసుకోవచ్చు.

ప్రస్తుతం విజయ్‌ హజారే ట్రోఫీ జరుగుతోంది. ఈ ట్రోఫీలో భాగంగా శనివారం రైల్వేస్‌-మహారాష్ట్ర మధ్య మ్యాచ్‌లో రైల్వేస్‌ జట్టు తొలుత బ్యాటింగ్‌ చేసి 50 ఓవర్లలో 8 వికెట్ల నష్టానికి 218 పరుగులు చేసింది. మహారాష్ట్ర 38.2 ఓవర్లలోనే 3 వికెట్ల కోల్పోయి లక్ష్యాన్ని ఛేదించింది. మహారాష్ట్ర కెప్టెన్‌ రుతురాజ్‌ గైక్వాడ్‌ 123 బంతుల్లో 8 ఫోర్లు, 7 సిక్సులతో 124 పరుగులు చేసి నాటౌట్‌గా నిలిచాడు. ఈ సెంచరీతో రుతురాజ్‌ గైక్వాడ్‌ దేశవాళీ టోర్నీల్లో 21వ సెంచరీని పూర్తి చేసుకున్నాడు. రుతురాజ్‌ ఆడిన చివరి 6 ఇన్నింగ్స్‌ల్లో 5 సెంచరీలు చేయడం విశేషం.

దేశవాళీ క్రికెట్‌లో అద్భుత ప్రతిభ కనబర్చడంతో 2019లో చెన్నై సూపర్‌ కింగ్స్‌ రుతురాజ్‌ను బేస్‌ ప్రైజ్‌ 20 లక్షలకు కొనుగోలు చేసింది. 2021 వరకు అదే ధరతో రుతురాజ్‌ చెన్నైకు ఆడాడు. 2022లో మాత్రం రూ.6 కోట్ల చెల్లించింది చెన్నై. 2019లో రుతురాజ్‌కు మ్యాచ్‌ ఆడే అవకాశం రాలేదు. కానీ.. 2020లో 6 మ్యాచ్‌లు ఆడిన రుతురాజ్‌ 204 పరుగులు చేశాడు. అందులో 3 హాఫ్‌ సెంచరీలు ఉన్నాయి. అలాగే 2021లో చెన్నై ఐపీఎల్‌ ఛాంపియన్స్‌గా గైక్వాడ్‌ కీలక పాత్ర పోషించాడు. 16 మ్యాచ్‌ల్లో 635 పరుగులు చేశాడు. అందులో ఒక సెంచరీ, 4 హాఫ్‌ సెంచరీలు ఉన్నాయి. ఇక గత సీజన్‌లోనూ 14 మ్యాచ్‌ల్లో 368 పరుగులు చేసి రాణించాడు. ఐపీఎల్‌లో ఇప్పటి వరకు మొత్తం 36 మ్యాచ్‌లు ఆడిన గైక్వాడ్‌ 1207 పరుగులు సాధించాడు. ఇక టీమిండియా తరఫున ఒక వన్డేలో 19 పరుగులు, 9 టీ20ల్లో 135 పరుగులు చేశాడు. అందులో ఒక హాఫ్‌ సెంచరీ కూడా ఉంది.

Unstoppable Ruturaj Gaikwad pic.twitter.com/k6VshZLrE1

— RVCJ Media (@RVCJ_FB) November 12, 2022

Ruturaj Gaikwad#VijayHazareTrophy #VijayHazare pic.twitter.com/jcqTXYxZqu

— RVCJ Sports (@RVCJ_Sports) November 12, 2022