జాంటీ రోడ్స్.. అతని ఫీల్డింగ్ చిరుతపులి వేట కన్నా భయంకరం!

అది 1992 వరల్డ్ కప్. దక్షిణాఫ్రికా టీమ్ లోకి “జాంటీ రోడ్స్” అనే ఓ కుర్రాడు సెలక్ట్ అయ్యాడు. లోయర్ మిడిల్ ఆర్డర్ లో బ్యాటింగ్. బౌలింగ్ కూడా రాదు. ఇంకా చెప్పాలంటే అతను ఓ సాధారణ బ్యాటర్ అంతే. ప్రపంచ కప్ లో మ్యాచులు ముందుకు వెళ్తున్నాయి. సౌత్ ఆఫ్రికా విజయాలు సాధిస్తుంది. కానీ.., ఆ కుర్రాడు మాత్రం అంత ప్రభావం చూపించడం లేదు. ఒక్కో మ్యాచ్ లో అతనికి అసలు బ్యాటింగ్ చేసే ఛాన్స్ కూడా రావడం లేదు. ఇంతలో దక్షిణాఫ్రికా జట్టు పాక్ తో తలపడాల్సి వచ్చింది. ఆ మ్యాచ్ లో మొదటగా బ్యాటింగ్‌ చేసిన దక్షిణాఫ్రికా జట్టు 50 ఓవర్లలో 211 పరుగులు చేసింది. అయితే పాక్ బ్యాటింగ్ చేస్తున్న సమయంలో మ్యాచ్ కి వర్షం అంతరాయం కల్గించడంతో టార్గెట్ 36 ఓవర్లకు 194 పరుగులకే కుదించారు. రెండు వికెట్ల నష్టానికి 135 పరుగులతో పాక్ పటిష్ట స్థితిలో నిలిచింది. ఇంకేముంది దక్షిణాఫ్రికా ఓటమి ఖాయమని అంతా ఫిక్స్ అయ్యారు. కెప్టెన్ ఇమ్రాన్ ఖాన్ తో పాటు ఇంజమామ్ (48) పాక్ ని విజయం దిశగా తీసుకెళ్తున్నారు. అయితే.. ఇక్కడే అసలు ట్విస్ట్ చోటు చేసుకుంది.

అలెన్ డోనాల్డ్ బౌలింగ్ లో ఇంజమామ్ షాట్ ఆడగా.. బాల్ ప్యాడ్స్ కు తగిలి పాయింట్ దిశగా వెళ్ళింది. యువకుడిగా మంచి ఊపు మీద ఉన్న ఇంజమామ్ పరుగు కోసం కాస్త ముందుకి వెళ్ళాడు. అంతే…ఆ బంతిని చురుగ్గా అందుకున్న జాంటీ రోడ్స్.. చిరుతలా పరిగెత్తి.. గాలిలోకి డైవ్ చేసి వికెట్లను గిరాటేసాడు. ఒక్క పాకిస్థాన్ జట్టు మాత్రమే కాదు, క్రికెట్ ప్రపంచం మొత్తం నివ్వెరపోయిన క్షణాలు అవి. “ఆ రనౌట్ చేసే సమయంలో.. ఆ కుర్రాడి నరం, రక్తం, వేగం, వాడి, విసురు, చురుకుదనం, పరుగు, ఏకాగ్రత” అంతా ఒక అద్భుతం. నిజానికి అతను గాలిలో ఎగిరాడా? గాలి కన్నా వేగంగా దూసుకొచ్చాడా కూడా తెలియని అయోమయం అందరిది. ఆ రనౌట్ తరువాత ఒత్తిడిలోకి వెళ్లిన పాకిస్థాన్ చివరకు 20 పరుగుల తేడాతో ఓడిపోయింది. ఆ ఒక్క రనౌట్ తో జాంటీ రోడ్స్ అంటే ఏమిటో మాత్రమే కాదు, అసలు క్రికెట్ లో ఫీల్డింగ్ కి ఎంతటి ప్రాధాన్యత ఉంటుందో అందరికీ తెలిసి వచ్చింది. క్రికెట్ లో జాంటీ రోడ్స్ చేసిన ఈ రనౌట్ ఆల్ టైం బెస్ట్ రానౌట్ గా ఇప్పటికీ పరిగణిస్తారు. ఒక ఫీల్డర్ చేసిన రనౌట్ క్రికెట్ ప్రపంచాన్ని విస్తుగొలిపింది. రోడ్స్ ఎలాంటి ఫీల్డరో చెప్పడానికి ఈ ఒక్క రనౌట్ చూస్తే అర్ధం అవుతుంది. అప్పట్లో ఐసీసీ ఈ రనౌట్ ని ఫీట్‌ను స్నో స్టాపింగ్‌ మూమెంట్‌ పేరుతో షేర్‌ చేయడం విశేషం.

అప్పటివరకు ఫీల్డింగ్ అంటే మూస ధోరణిలో ఉండే రోజుల్లో ఫీ​ల్డింగ్‌కు కొత్త అర్ధం చెప్పిన రోడ్స్‌.. క్రికెట్‌ చరిత్రలోనే అత్యుత్తమ ఫీల్డర్‌గా గుర్తింపు తెచ్చుకున్నాడు. బ్యాటర్లు అతను ఫీల్డింగ్ చేస్తున్న వైపు ధైర్యంగా షాట్స్ ఆడలేకపోయే వారంటే రోడ్స్ ఫీల్డింగ్ ఏ రేంజ్ లో ఉండేదో అర్ధం చేసుకోవచ్చు. ఎంతో మంది గ్రేట్ బ్యాటర్లను కూడా తన ఫీల్డింగ్ విన్యాసాలతో బోల్తా కొట్టించి క్రికెట్ చరిత్రలోనే ఒక ట్రెండ్ సృష్టించాడు. అప్పట్లో గ్రేట్ బ్యాటర్లు, బౌలర్లు, ఆల్ రౌండర్లు చాల మంది ఉండేవారు. కానీ ఫీల్డింగ్ అంటే మాత్రం ఈ దక్షిణాఫ్రికా సంచలనమే గుర్తుకొచ్చేవాడు. దశాబ్దం పైగా దక్షిణాఫ్రికా జట్టుకు ఆడిన రోడ్స్ ఎన్నో డైవ్ క్యాచులు, మరెన్నో మెరుపు రనౌట్ లు కూడా చేసాడు. ఒకరకంగా రోడ్స్ క్రికెట్ లోకి అడుగుపెట్టిన తర్వాతే అన్ని జట్లు ఫీల్డింగ్ మీద దృష్టి సారించాయి. మైదానంలో పాదరసంలా కదులుతూ ఊహకు అందని విన్యాసాలు చేసేవాడు రోడ్స్. కొన్ని సార్లయితే కేవలం తన ఫీల్డింగ్ ప్రతిభతోనే మ్యాచులను గెలిపించిన సందర్భాలు ఉన్నాయి. నమ్మడానికి ఆశ్చర్యంగా ఉన్నా ఒక్కసారి యూట్యూబ్ లో జాంటీ రోడ్స్ ఫీల్డింగ్ వీడియోస్ చూస్తే మీరు షాక్ లోకి వెళ్లిపోవడం ఖాయం. ఓ సబ్ ట్యూట్ ఫీల్డర్ గా గ్రౌండ్ లోకి దిగి.. 7 క్యాచ్ లు అందుకుని, మ్యాన్ ఆఫ్ దా మ్యాచ్ అవార్డు అందుకున్న ఘనత ఈనాటికీ ఒక్క జాంటీ రోడ్స్ పేరు మీదే ఉంది.

జాంటీ రోడ్స్ మొదట్లో ఒక హాకీ ప్లేయర్. 1992 లో జరిగిన ఒలింపిక్స్ క్రీడల్లో రోడ్స్ జాతీయ జట్టుకి ఎంపికైన దురదృష్టవశాత్తు దక్షిణాఫ్రికా అర్హత సాధించలేకపోయింది. దీంతో క్రికెట్ లోకి అడుగుపెట్టి చాల తక్కువకాలంలోనే ఫీల్డింగ్ లో సంచలనాలు సృష్టించాడు. ఫీల్డింగ్ లో గంటలకొద్ది కష్టపడుతూ 10 మీటర్ల దూరం నుంచి క్యాచ్ అందుకునేందుకు ప్రయత్నించేవాడు. అతని ఫీల్డింగ్ దెబ్బకి బ్యాటింగ్ కూడా మరుగున పడిపోయింది. బ్యాటింగ్ కూడా చక్కగా చేసే రోడ్స్ రివర్స్ స్వీప్ లు అలవోకగా ఆడేసేవాడు. ఆంతేకాదు రివర్స్ స్వీప్ ఆడుతూ సిక్సర్లను కూడా బాదేసి తనలో ఈ టాలెంట్ కూడా ఉందని నిరూపించాడు.రికార్డుల పరంగా చూసుకుంటే వన్డేల్లో దక్షిణాఫ్రికా తరపున 100 క్యాచులు పట్టిన తొలి ఫీల్డర్ గా నిలిచాడు. ఇక 1993 లో ముంబైలో వెస్టిండీస్ తో జరిగిన మ్యాచులో ఏకంగా 5 క్యాచులు పట్టేసి ఔరా అనిపించాడు. ఇప్పటికీ ఈ రికార్డ్ జాంటీ రోడ్స్ పేరు మీద ఉండడం విశేషం. దక్షిణాఫ్రికా తరఫున 245 వన్డేల్లో 35.11 సగటుతో 5935 పరుగులు చేసిన రోడ్స్ భారీ సిక్స్ లు కొట్టడంలోనూ సిద్ధహస్తుడు.

అంతర్జాతీయ క్రికెట్ నుండి రిటైర్మెంట్ ప్రకటించిన తర్వాత కూడా జాంటీ రోడ్స్ ని ఫీల్డింగ్ కోచ్ గా నియమించుకునేందుకు చాల జట్లు ఆసక్తి చూపించాయి. ఐపీఎల్ లో ముంబై ఇండియన్స్, పంజాబ్ కింగ్స్ కి ఫీల్డింగ్ కోచ్ గా పని చేసాడు. ఇప్పుడంటే ప్రతి ఒక్కరు ఫీల్డింగ్ మీద దృష్టి పెడుతున్నారు కానీ ఈ అధ్యయనానికి శ్రీకారం చుట్టింది మాత్రం జాంటీ రోడ్స్. రోడ్స్ నుండి స్ఫూర్తి పొందాకనే చాలా దేశాలకు అద్భుతమైన ఫీల్డర్లు దొరికారు. ఆస్ట్రేలియా, న్యూజిలాండ్, సౌత్ ఆఫ్రికా, ఇంగ్లాండ్ వంటి దేశాలకు ఇలాంటి అద్భుతమైన ఫీల్డర్స్ దొరికారు. ఇక జాంటీ రోడ్స్ అనే సూర్యుడు.. క్రికెట్ గగనాన అస్తమిస్తున్న రోజుల్లో.. మన ఇండియాకి కూడా కైఫ్, యువరాజ్ వంటి మెరుపు ఫీల్డర్లు దొరికారు. అప్పట్లో కైఫ్, యువరాజ్ ఫీల్డింగ్ చూశాక కూడా.. ప్రేక్షకులు అంతా వారిని.. ఇండియన్ జాంటీ రోడ్స్ అని పోలుస్తూ వచ్చారు. బాగా బ్యాటింగ్ ఆడిన ప్రతి బ్యాటర్ కు సచిన్ స్ఫూర్తి కాకపోవచ్చు. బాగా బౌలింగ్ వేసే ప్రతి బౌలర్ కు వసీం అక్రమ్ ఇన్స్ ప్రేషన్ కాకపోవచ్చు. కానీ.., ఇప్పటికీ బాగా ఫీల్డింగ్ చేసే ప్రతి ఫీల్డర్ కు జాంటీ రోడ్స్ ఒక్కడు మాత్రమే స్ఫూర్తి.