follow us:
రాముడి వెంటే లక్ష్మణుడు అన్నట్లు.. మహేంద్ర సింగ్‌ ధోనీ క్రికెట్‌కు రిటైర్మెంట్‌ ప్రకటించిన రోజే అంతర్జాతీయ కెరీర్‌కు వీడ్కోలు పలికిన సురేశ్‌ రైనా.. తాజాగా మరోసారి ధోనీపై తనకున్న అభిమానాన్ని చాటుకున్నాడు.
భారత మాజీ కెప్టెన్‌ మహేంద్రసింగ్‌ ధోనీ, సురేశ్‌ రైనా మధ్య ఉన్న అనుబంధం గురించి కొత్తగా చెప్పాల్సిన పని లేదు! టీమిండియా తరఫున, చెన్నై సూపర్‌ కింగ్స్‌ తరఫున సుదీర్ఘ కాలం కలిసి ఆడిన వీరిద్దరినీ.. అభిమానులు ముద్దుగా ‘తలా’, ‘చిన్న తలా’ అని పిలుచుకుంటారనే విషయం తెలిసిందే. ధోనీ సారథిగా ఉన్నంత కాలం.. అతడికి వెన్నంట నిలుస్తూ.. బ్యాటింగ్‌, బౌలింగ్‌, ఫీల్డింగ్‌ ఇలా అవసరమైన ప్రతి బాధ్యతను భుజానెత్తుకున్న రైనా.. మహీ బాటలోనే ఆటకు వీడ్కోలు పలికిన విషయం తెలిసిందే. 2011 వన్డే ప్రపంచకప్‌ గెలిచిన భారత జట్టులో సభ్యుడైన రైనా తన కెరీర్‌లో 226 వన్డేలాడాడు. మిడిలార్డర్‌లో బ్యాటింగ్‌కు దిగే రైనా.. 35.31 సగటుతో 5615 పరుగులు చేశాడు. 78 టీ20ల్లో 29.18 సగటుతో 1605 పరుగులు రాబట్టాడు. సుదీర్ఘ ఫార్మాట్‌లో అవకాశాలు దక్కినా.. పెద్దగా ఆకట్టుకోలేకపోయిన ఈ ఆల్‌రౌండర్‌ 18 టెస్టుల్లో 768 పరుగులు చేశాడు. మూడు ఫార్మాట్లలో సెంచరీ చేసిన తొలి భారత క్రికెటర్‌గా సురేశ్‌ రైనా చరిత్రకెక్కాడు.
మైదానంలో తన అభిమాన ఆటగాడు ధోనీని అనుసరించే రైనా.. ఆటకు వీడ్కోలు పలకడంలోనూ అదే ప్రాముఖ్యత చూపించాడు. 2019 వన్డే ప్రపంచకప్‌ సెమీఫైనల్లో న్యూజిలాండ్‌ చేతిలో భారత్‌ పరాజయం అనంతరం జట్టుకు దూరమైన ధోనీ.. ఆ మరసటి ఏడాది ఆగస్టు 15న అంతర్జాతీయ క్రికెట్‌కు వీడ్కోలు పలుకుతున్నట్లు ప్రకటించాడు. మహీ నుంచి ఆ వార్త వెలువడ్డ కాసేపటికే.. అతడి అనుంగ శిష్యుడు సురేశ్‌ రైనా కూడా కెరీర్‌కు రిటైర్మెంట్‌ ప్రకటిస్తున్నట్లు వెల్లడించాడు. అంతకు రెండేళ్ల ముందు నుంచే జాతీయ జట్టులో చోటు కోల్పోయిన రైనా.. మహీ అడుగుజాడల్లోనే ఆట నుంచి నిష్క్రమించాడు.
అటు అంతర్జాతీయ క్రికెట్‌కు ఇటు ఐపీఎల్‌కు దూరమైన రైనా.. ప్రస్తుతం ఇతర వ్యాపకాలతో బిజీగా గడుపుతున్నాడు. ఐపీఎల్లో యాంకరింగ్‌ చేస్తున్న ఈ యూపీ ఆల్‌రౌండర్‌.. రెస్టారెండ్‌ బిజినెస్ ప్రారంభించాడు. అయితే కెరీర్‌ ఆసాంతం ధోనీని అనుసరించిన రైనా.. తన రెస్టారెంట్‌లో కూడా ‘తలా’ జెర్సీని ఫ్రెమ్‌ కట్టించి పెట్టాడు. మహీ సీఏస్కే తరఫున ఆడే ఏడో నంబర్‌ పసుపు రంగు జెర్సీని రెస్టారెంట్‌లో పెట్టాడు. దీంతో రైనా రెస్టారెంట్‌ సోషల్‌ మీడియాలో వైరల్‌గా మారగా.. అభిమానులు దీనిపై తమదైన శైలిలో స్పందిస్తున్నారు. ‘ఇంకా ధోనీ భజన చేయడం ఆపవా.. భజన అంటే ఎలా ఉండాలో ఎవరైనా రైనాను చూసి నేర్చుకోవాలి’ అని ఓ నెటిజన పేర్కొనగా.. ‘ఇదంగా మార్కెటింగ్‌ స్ట్రాటజీ గురూ’ అని మరో వ్యక్తి అభిప్రాయపడ్డాడు.
