follow us:
‘మెగాస్టార్ చిరంజీవి’ అది పేరు కాదు… మహా శిఖరం. కఠోర శ్రమ, ధృఢ సంకల్పంతో అసాధ్యాలను సుసాధ్యం చేసి చూపించిన మహోన్నత వ్యక్తి. ఓ మధ్యతరగతి కానిస్టేబుల్‌ కొడుకు నుంచి మహాశక్తిగా ఎదిగిన ఘనత ఆయనది. ఎంత ఎదిగినా ఒదిగి ఉండే మహా మనిషి. క్రమశిక్షణ, అంకితభావానికి మరో పేరు. ఆపదలో ఉన్నవాడికి అన్నయ్యగా, అవకాశం కోసం చూస్తున్న వాడికి ఆపద్బాంధవుడిగా ఆయన సేవలుకు అంతే లేదు. ఆయనను మనిషిగా కాదు.. దేవుడిగా కొలిచే వారికి లెక్కే లేదు. స్నితప్రజ్ఞతతో మెగాస్టార్ చిరంజీవుడిగా, పద్మభూషణుడిగా ఎదిగిన కొణిదెల శివశంకర వరప్రసాద్‌కు ఇవే మా హృదయపూర్వక జన్మదిన శుభాకాంక్షలు.
ఏం చేయాలో తెలీక సరాదాగా సినిమాల్లోకి రాలేదు. నటుడు కావాలనే కృతనిశ్చంతో మద్రాస్‌ ఫిల్మ్‌ ఇన్‌స్టిట్యూట్‌లో శిక్షణ పొంది వచ్చాడు. ఇండస్ట్రీలో తనకంటూ ఎవరూ లేకపోయినా నమ్ముకున్న ప్రతిభతోనే పైకొచ్చాడు. ‘పునాదిరాళ్లు’తో సినిమా కెరీర్‌కు పునాది వేసుకున్న మెగాస్టార్ ఇంతింతై వటుడింతై అన్నట్లుగా తెలుగు ఇండస్ట్రీకి పెద్దన్నగా ఎదిగాడు. అప్పటికే తెలుగు సినిమాకు మూల స్తంభాలుగా ఉన్న పెద్ద హీరోల పోటీని తట్టుకుని ‘స్వయంకృషి’తో ఎదిగాడు. ‘ఖైదీ’గా సినీ జీవితంలో మంచి గుర్తింపు సాధించారు. అప్పటి నుంచి కెరీర్‌లో తిరిగి చూసుకున్నది లేదు. కుప్పలు తెప్పలుగా అవకాశాలు. ఫ్యాన్స్‌లో ‘మాస్‌ హీరో’గా బ్రాండ్‌ ఇమేజ్‌ సంపాదిచారు. ఎప్పుడూ మాస్‌ హీరోగానే కాదు. ఆపద్బాంధవుడు, రుద్రవీణ, స్వయంకృషి వంటి ప్రయోగాలను కూడా చేసి మెప్పించారు.
ఆపద్బాంధవుడు సినిమాకి కోటీ 25 లక్షల రూపాయలు తీసుకుని ‘బిగ్గర్‌ దాన్‌ బిగ్‌ బి’ అని జాతీయ మీడియా ప్రస్తావించే స్థాయికి ఎదిగారు. ఎంత ఎదిగినా మూలాలను మర్చిపోలేదు. తాను పడ్డ కష్టాలు రాబోయే తరాలవారు పడకూడదని ఎప్పుడూ అనుకునేవారు. చిన్న, పెద్ద, గొప్ప అనే తారతమ్యాలు లేకుండా అన్నయ్యా అన్న ప్రతి ఒక్కరికి ఆపన్నహస్తం అందించారు.. అందరివాడయ్యారు.
చిరంజీవి సినిమాల్లోకి రాకముందు నుంచే అప్పటి హీరోలు వేసిన డ్యాన్సులను తనదైన శైలిలో వేసి స్నేహితులను అలరించేవాడు. ఫోక్‌, బ్రేక్‌, డిస్కో, క్లాసికల్‌ డ్యాన్స్‌ ఏదైనా చిరంజీవి తన స్టెప్పులతో అభిమానులను ఉర్రూతలూగించేవారు. భావితరం నటులకు స్ఫూర్తిగా నిలిచారు. ఆయనతో చేసిన డ్యాన్స్‌ మాస్టర్లు, హీరోయిన్లు ఎవరైనా ఆయన డ్యాన్సుకు ఫిదా అవ్వాల్సిందే. అలా ఎంతో మంది, ఎన్నో సందర్భాల్లో చిరంజీవి స్టెప్పులను గుర్తుచేసుకుంటూనే ఉంటారు.
ఇప్పుడున్న డైరెక్టర్లు, హీరోలు, క్యారెక్టర్‌ ఆర్టిస్టులు, కమెడియన్లు ఇలా ఎవరిని కదిపినా నేను చిరంజీవిని చూసే ఇండస్ట్రీకి వచ్చా అన్నమాట వినిపిస్తుందనడం అతిశయోక్తి కాదు. ఆయనను చూసి వచ్చిన వారు కొందరైతే ఆయన చేయూతతో పైకొచ్చిన వారు కొందరు. ఎందరో సినిమా ఇండస్ట్రీకి పరిచయం కావడంలో ప్రత్యక్షంగానో, పరోక్షంగానో చిరు పాత్ర ఉంది.
చిత్ర పరిశ్రమలో చిన్న, పెద్ద అన్న తారతమ్యం లేకుండా విజయం సాధించిన ప్రతిఒక్కరిని అభినందిస్తుంటారు చిరంజీవి. బొకే, మెసేజ్‌, ఫోన్‌ ఇలా ఏదోరకంగా యువ హీరోలను చిరు ప్రోత్సహిస్తూనే ఉంటారు. చిరంజీవి మెసేజ్‌ చూడగానే ఆశ్చర్యపోయాను. చిరంజీవి ఫోన్‌ చేయగానే షాక్‌ అయ్యాను ఈ మాటలు తరచూ వింటూనే ఉంటారు. అలా చిరు తనదైన శైలిలో యువతను ప్రోత్సహిస్తూనే ఉంటారు.
చిరంజీవి అనగానే నటన, డ్యాన్స్‌, ఫైట్స్‌ మాత్రమే కాదు… సమాజసేవ కూడా గుర్తొస్తుంది. సినీ పరిశ్రమలో ఆయన ఎంతమందిని ఆదుకున్నారో, ఎందరి జీవితాల్లో వెలుగులు నింపారో వారంతట వారు చెప్తేనే తెలుసుకోగలం. ఆయన చేసిన సాయం రెండో చేతికి కూడా తెలియకుండా చేసిన గుప్త ధానాలు ఎన్నెన్నో. చిరంజీవి బ్లడ్‌ అండ్‌ ఐ బ్యాంక్‌తో ఆయన నిలిపిన ప్రాణాలు ఎన్నో. కరోనా సమయంలో సినీ పరిశ్రమ కోసం ట్రస్టు ఏర్పాటు చేయడం. ఆక్సిజన్‌ అందక ప్రజలు పడుతున్న ఇబ్బందులు చూసి ఆక్సిజన్‌ బ్యాంక్‌లు ప్రారంభించడం. ఇవన్నీ చూస్తేనే అర్థమవుతుంది. చిరంజీవికి సమాజం పట్ల ఉన్న సేవాభావం ఎలాంటిదో. అంతటి మహోన్నత వ్యకి పద్మ భూషణుడు మెగాస్టార్ చిరంజీవికి మరోసారి జన్మదిన శుభాకాంక్షలు.
