follow us:
తెలుగు చిత్రపరిశ్రమలో మరో విషాదం చోటుచేసుకుంది. ఒకరి మరణవార్తను జీర్ణించుకునేలోపే మరో విషాదం చోటుచేసుకొని సినీ ప్రేక్షకులను కలచివేస్తుంది. ఇండస్ట్రీలో ట్రేడ్ గైడ్ మ్యాగజైన్ ప్రస్థానం అందరికీ తెలిసిందే. దాదాపు 5 దశాబ్దాల కాలంపాటు ఇండస్ట్రీకి సంబంధించిన సమాచారాన్ని నిరంతరం అందించింది. ఈ మ్యాగజైన్ అధినేత, సీనియర్ ఫిలిం క్రిటిక్ గంజి లక్ష్మీనారాయణ శనివారం(మార్చి 19న) ఉదయం తుదిశ్వాస విడిచారు.
లక్ష్మీనారాయణ మరణవార్త తెలియగానే ఫిలింక్రిటిక్ అసోసియేషన్ సంతాపం తెలుపుతూ.. ఆయన కుటుంబానికి ప్రగాఢ సానుభూతి తెలియజేసింది. సింప్లిసిటీకి మారుపేరుగా నిలిచిన ట్రేడ్ గైడ్ లక్ష్మీనారాయణ గారు.. చివరి వరకు మ్యాగజైన్ నిర్వాహకుడిగా పరిశ్రమతో కొనసాగారు. అలాగే ఎంతోమంది యువ జర్నలిస్టులను ప్రోత్సహించిన మనిషి కనుమూయడంతో అసోసియేషన్ సభ్యులు ఆవేదన వ్యక్తం చేశారు. అదేవిధంగా లక్ష్మీనారాయణ కుటుంబానికి రూ. 25 వేల ఆర్థిక సాయాన్ని ప్రకటించారు.
సినీ మ్యాగజైన్లు అంతరించిపోతున్న నేటి కాలంలోనూ ఇండస్ట్రీ తరపున ట్రేడ్ గైడ్ మ్యాగజైన్ విజయవంతంగా రన్ అవుతుండటం విశేషం అనే చెప్పాలి. చిత్రపరిశ్రమ మద్రాస్ నుండి హైదరాబాద్ కి షిఫ్ట్ అయ్యే సమయంలో ఎన్నో ట్రేడ్ వార్తలను సదరు మ్యాగజైన్ ప్రచురించినట్లు అసోసియేషన్ సభ్యులు తెలిపారు. ఆయన మరణం వరకూ ట్రేడ్ గైడ్ సినీ మ్యాగజైన్ ని ముందుకు నడిపించిన లక్ష్మీనారాయణ ఆత్మకు శాంతి చేకూరాలని అసోసియేషన్ వారు ప్రార్థించారు. లక్ష్మీనారాయణ మృతి పట్ల పలువురు సినీ సెలబ్రిటీలు సంతాపం తెలియజేస్తున్నారు.
