ఓటీటీని షేక్ చేస్తున్న మలయాళ సినిమాలు.. అవేంటో తెలుసా!

సినిమాల పరంగా చూసుకుంటే మన దేశంలో ఇప్పుడు దక్షిణాదిదే హవా. పాన్ ఇండియా హిట్లుగా నిలుస్తున్న చిత్రాల్లో దాదాపుగా అన్నీ సౌత్​ సినిమాలే. ముఖ్యంగా తెలుగు, కన్నడ సినిమాలు దేశవ్యాప్తంగా సంచలనం రేపుతున్నాయి. ‘బాహుబలి’, ‘పుష్ప’, ‘కేజీఎఫ్ 2’, ‘ఆర్ఆర్ఆర్’ మూవీస్ భారతీయ బాక్సాఫీస్ వద్ద కలెక్షన్ల సునామీని సృష్టించాయి. దీంతో టాలీవుడ్, కోలీవుడ్, శాండల్​వుడ్ మేకర్స్ పాన్ ఇండియా చిత్రాలను తీసే పనిలో బిజీగా ఉన్నారు. అయితే ఈ మూడు పరిశ్రమలకు భిన్నంగా మలయాళ మేకర్స్ విభిన్నమైన సినిమాలతో మంచి గుర్తింపు తెచ్చుకుంటున్నారు. వినూత్నమైన కథలతో, పకడ్బందీ స్క్రీన్​ప్లేతో ప్రేక్షకులను కళ్లుతిప్పుకోకుండా చేయడంలో మాలీవుడ్ మేకర్స్ ఆరితేరారు.

కరోనా టైమ్​లో ప్రేక్షకులు ఓటీటీలకు బాగా అలవాటు పడ్డారు. ఆ సమయంలో ఆడియెన్స్ ఎక్కువగా చూసిన సినిమాలుగా మలయాళ మూవీస్​ను చెప్పుకోవచ్చు. కొత్తదనం నిండిన కథలు, ఇంటెన్సివ్ యాక్టింగ్​, అద్భుతమైన మేకింగ్​తో భాషాభేదం లేకుండా ప్రేక్షకులను ఆకట్టుకున్నాయా సినిమాలు. అంతేకాకుండా డబ్బింగ్​ల రూపంలోనూ ఇతర భాషల్లోనూ స్ట్రీమింగ్ కావడంతో వీటికి పాపులారిటీ బాగా పెరిగింది. ముఖ్యంగా మలయాళ క్రైమ్ యాక్షన్ డ్రామాలకు మంచి ఫ్యాన్ బేస్ ఉంది. అలాంటి మలయాళం ఇండస్ట్రీ నుంచి రిలీజైన రెండు పెద్ద సినిమాలు ప్రముఖ ఓటీటీ ప్లాట్​ఫామ్స్​లో అందుబాటులోకి రానున్నాయి. అవే ‘థంకం’, ‘నాన్ పాకల్ నేరతు మయక్కమ్’. ఇందులో ‘థంకమ్’ చిత్రంలో బిజూ మీనన్, వినీత్ శ్రీనివాసన్ మెయిన్ రోల్స్​లో నటించారు.

క్రైమ్ డ్రామాగా తెరకెక్కిన ‘థంకమ్’ చిత్రం జనవరి 26న బిగ్ స్క్రీన్స్​లో రిలీజైంది. థియేటర్లలో మంచి ఆదరణ దక్కించుకోవడంతో పాటు విమర్శకుల ప్రశంసల్ని కూడా అందుకుంది. త్రిస్సూర్​లో గోల్డ్ ఏజెంట్స్​గా పనిచేసే కన్నన్, ముత్తు అనే ఇద్దరు వ్యక్తుల నేపథ్యంలో సాగే కథగా తెరకెక్కిన ఈ మూవీకి మంచి రేటింగ్స్ వచ్చాయి. ఈ చిత్రం అమెజాన్​ ప్రైమ్​లో స్ట్రీమ్ అవుతోంది. ఇక, మరో మూవీ ‘నాన్ పాకల్ నేరతు మయక్కమ్’. ఈ సినిమాను లిజో జోస్ పెల్లిసెరి డైరెక్ట్ చేశారు. ఈయన గతంలో తీసిన ‘జల్లికట్టు’కు జాతీయ స్థాయిలో అపూర్వ ఆదరణ దక్కింది. మమ్ముట్టి హీరోగా నటించిన ‘నాన్ పాకల్’ గతేడాది డిసెంబర్ 12న రిలీజైంది. నెట్​ఫ్లిక్స్​లో స్ట్రీమింగ్ అవుతున్న ఈ మూవీ స్ట్రీన్ ప్లే కాస్త స్లోగా సాగుతుంది. కానీ ఇందులో మమ్ముట్టి యాక్టింగ్​కు ప్రశంసలు దక్కుతున్నాయి. మరి.. ఈ రెండు సినిమాల్లో మీరు దేన్ని చూడబోతున్నారో కామెంట్ల రూపంలో తెలియజేయండి.