సరికొత్త లుక్ లో మార్కెట్లో రీ-ఎంట్రీ ఇస్తున్న టాటా నానో.. ఫీచర్స్, ధర విషయానికొస్తే?

ప్రస్తుతం ఈవీ లవర్స్ ఎక్కువైపోయారు. పర్యావరణం గురించి ఆలోచించి.. ఎలక్ట్రిక్ వాహనాల వైపు మొగ్గు చూపుతున్నారు. అయితే ఎలక్ట్రిక్ వాహనాల ధర చూస్తే చుక్కలు కనబడుతున్నాయి. ద్విచక్ర వాహనాలు కొనాలంటేనే లక్ష దాటి పోతుంది. లక్ష పెట్టి కొన్నా కూడా గట్టిగా 60 కిలోమీటర్లు ప్రయాణించలేము. ఒకసారి ఛార్జ్ చేస్తే 60 కిలోమీటర్లు వెళ్ళగలం. అది కూడా ఎకో మోడ్ లోనే. ఇక కార్లు కొనాలంటే 15 నుంచి 20 లక్షలు పెట్టాలి. అయితే అన్ని లక్షలు పెట్టకుండా తక్కువ డబ్బులతో ఎలక్ట్రిక్ వెహికల్ ని సొంతం చేసుకోవచ్చు. ఉందిగా టాటా. మధ్యతరగతి వాళ్ళ బడ్జెట్ కార్. మధ్యతరగతి వాళ్ళ కోసం ఆలోచించే రతన్ టాటా ఉండగా చింత ఏల? త్వరలోనే నానో ఈవీ వెర్షన్ ని తీసుకొస్తున్నారట.

అప్పటి నానో కారుని.. నేటి ట్రెండ్ కి తగ్గట్టు లుక్ ఛేంజ్ చేసి.. స్టైలిష్ డిజైన్ లో తీసుకొస్తున్నారట. 2025 నాటికి ముందుగా 10 టాటా నానో ఈవీ కార్లను విడుదల చేయాలని కంపెనీ నిర్ణయించుకున్నట్లు తెలుస్తోంది. దీంతో నానో ఈవీ 2025లో ఎంట్రీ ఇవ్వబోతోందని అర్థమవుతుంది. అయితే ప్రస్తుతం ఎలక్ట్రిక్ కార్లపై పెరుగుతున్న డిమాండ్ దృష్ట్యా ఇంకా ముందుగానే విడుదల చేసే అవకాశం కూడా లేకపోలేదని అంటున్నారు. ఫీచర్స్ విషయానికొస్తే.. 72 వోల్ట్స్ లిథియం అయాన్ బ్యాటరీతో ఈ కారుని తయారుచేస్తున్నట్లు తెలుస్తోంది. సింగిల్ ఛార్జ్ తో 160 కిలోమీటర్ల రేంజ్ ఇచ్చేలా దీన్ని రూపొందిస్తున్నట్లు సమాచారం. దీని టాప్ స్పీడ్ 110 కేఎంపీహెచ్ గా ఉంటుందని.. 10 సెకండ్లలో 0-60 కిలోమీటర్ల వేగం అందుకునే సామర్థ్యంతో తయారుచేస్తునట్లు తెలుస్తోంది.

గరిష్ట మోటార్ పవర్ 23 హెచ్పీగా ఉండగా.. గరిష్ట టార్క్ 85 ఎన్ఎం గా ఉంటుందని సమాచారం. గ్రౌండ్ క్లియరెన్స్ 180 ఎంఎం ఉండగా.. కెర్బ్ బరువు 800 కేజీలు ఉంటుందని ప్రచారం జరుగుతోంది. సీటింగ్ కెపాసిటీ వచ్చేసి నలుగురు కూర్చునేలా డిజైన్ చేసినట్లు తెలుస్తోంది. ఇంటీరియర్ డిజైన్ ని పాత నానో కంటే ఎక్కువ స్పేస్ ఉండేలా డిజైన్ చేస్తున్నారని, దీని ధర రూ. 2 లక్షల నుంచి 3 లక్షల మధ్య ఉండవచ్చునని ప్రచారం జరుగుతుంది. ఇదే నిజమైతే గనుక సామాన్యుల కలల ఎలక్ట్రిక్ కారుగా  నానో ఈవీ మరోసారి రికార్డు సృష్టిస్తుందనడంలో సందేహం లేదు. 2008లో లక్ష రూపాయలతో నానో కారు వచ్చింది. ప్రపంచంలోనే అత్యంత చౌకైన కారుగా సంచలనం సృష్టించింది.

ఏడాదికి 2,50,000 కార్లను విడుదల చేయాలని భావించిన టాటా మోటార్స్ కంపెనీ.. అనేక కారణాల వల్ల నిలిపివేయాల్సి వచ్చింది. టాటా నానో రిలీజ్ అయిన మొదటి సంవత్సరం 7 వేల కార్లను రిలీజ్ చేయగా.. 2016-2017 మధ్యలో 7,591 కార్లను విక్రయించింది. 2018లో ఒక కారును మాత్రమే ఉత్పత్తి చేసి.. ఆ తర్వాత కంపెనీని మూసేసింది. మళ్ళీ ఇన్నాళ్లకు సెకండ్ ఇన్నింగ్స్ ని స్టార్ట్ చేసింది. ఈసారి ఎలక్ట్రిక్ వెర్షన్ తో రాబోతుంది. రాబోతుందని అంటున్నారు. ఒకవేళ ఇదే నిజమైతే.. మునుపటి లోపాలను అనుభవంగా మార్చుకుని.. వాటిని సరిదిద్దుకుని మార్కెట్లో అడుగుపెడితే టాటా నానో ఈవీకి తిరుగుండదు. దీనిపై టాటా మోటార్స్ అధికారికంగా ఎలాంటి ప్రకటన ఇవ్వలేదు.

కానీ టాటా మోటార్స్ కంపెనీ.. నానో ఎలక్ట్రిక్ వేరియంట్ ని తీసుకొస్తున్నట్లు వార్తలు ఐతే వస్తున్నాయి. ఈ విషయంలో కంపెనీ వాళ్ళు ఎలాంటి సమాచారం లీక్ చేయడం లేదు. చాలా జాగ్రత్తగా ఉంటున్నారు. వార్తలని అబద్ధం అని ఖండించడం లేదు, అలా అని నానో ఎలక్ట్రిక్ కారు తీసుకొస్తున్నామనీ చెప్పడం లేదు. నానో ఫ్యాన్స్ మాత్రం ఎలక్ట్రిక్ వేరియెంట్ వస్తే బాగుంటుందని కోరుకుంటున్నారు. మరి దీనిపై మీ అభిప్రాయం ఏంటో కామెంట్ చేయండి.