follow us:
గ్యాస్ వినియోగదారులకు చమురు మార్కెటింగ్ కంపెనీలు శుభవార్త చెప్పాయి. సిలిండర్ ధరలపై దాదాపు రూ. 100 తగ్గించాయి.
ఆగస్టు 1 నుంచి గ్యాస్ సహా అనేక ఆర్థిక పరమైన విషయాల్లో కొత్త మార్పులు చోటు చేసుకుంటాయని తెలిసిందే. ఈ క్రమంలో గ్యాస్ సిలిండర్ ధరలు తగ్గుతాయా? పెరుగుతాయా? అన్న సందిగ్ధత నెలకొంది. ఈ నేపథ్యంలో చమురు కంపెనీలు కొత్త రేట్లను ప్రకటించాయి. చమురు మార్కెటింగ్ కంపెనీలు వాణిజ్య గ్యాస్ వినియోగదారులకు శుభవార్త చెప్పాయి. ఆగస్టు 1 నుంచి గ్యాస్ సిలిండర్ ధరను తగ్గించాయి. జూలై నెలలో స్వల్పంగా పెరిగిన వాణిజ్య గ్యాస్ సిలిండర్ ధర ఆగస్టు నెలలో భారీగా తగ్గింది. చమురు కంపెనీలు ఆగస్టు 1వ తేదీ ఉదయం నుంచి వాణిజ్య సిలిండర్లపై రూ. 99.75 తగ్గించాయి. గతంలో 19 కిలోల కమర్షియల్ ఎల్పీజీ సిలిండర్ ఢిల్లీ మార్కెట్లో రూ. 1780 ఉండగా.. ఇప్పుడు రూ. 1680 అయ్యింది.
అయితే డొమెస్టిక్ గ్యాస్ సిలిండర్ ధరలో ఎలాంటి మార్పు లేదు. మునుపటి ధరే కొనసాగుతుంది. కమర్షియల్ గ్యాస్ సిలిండర్ల కొత్త ధర ఇవాళ్టి నుంచి అంటే ఆగస్టు 1 నుంచి అమలులోకి వచ్చింది. 27 రోజుల తర్వాత వాణిజ్య సిలిండర్ ధర తగ్గింది. భారత్, ఇండేన్, హెచ్పీ సహా పలు కంపెనీలు 19 కిలోల వాణిజ్య సిలిండర్ ధరలను మాత్రమే తగ్గించాయి. ధర ఢిల్లీ మార్కెట్లో రూ. 1680 ఉండగా.. కోల్కతాలో రూ. 1802 పలుకుతోంది. ముంబైలో రూ. 1640 వద్ద ఉండగా.. చెన్నైలో రూ. 1852 వద్ద కొనసాగుతుంది. అయితే ఆయా ప్రాంతాలను బట్టి పన్నులు, కమిషన్లు వంటి వాటి వల్ల కమర్షియల్ సిలిండర్ ధరల్లో వ్యత్యాసం ఉంటుంది.
హైదరాబాద్ లో డొమెస్టిక్ గ్యాస్ సిలిండర్ ధర రూ. 1155 వద్ద ఉండగా.. ఆంధ్రప్రదేశ్ లో రూ. 1161గా ఉంది. 14.2 కిలోల డొమెస్టిక్ సిలిండర్ ధరలను కేంద్రం చివరి సారిగా 2023 మార్చి 1న సవరించింది. అయితే ప్రస్తుతం డొమెస్టిక్ గ్యాస్ సిలిండర్ ధరను అలానే ఉంచి.. వాణిజ్య గ్యాస్ సిలిండర్ ధరను మాత్రమే తగ్గించింది. ఆగస్టు 1న గ్యాస్ రేట్లు తగ్గుతాయని అనుకున్న సామాన్యులకు ఊహించని షాక్ ఎదురైంది. చమురు మార్కెటింగ్ కంపెనీలు ఈసారి గ్యాస్ వినియోగదారులకు మొండి చేయి చూపించాయి. అయితే ధరలు పెరగకపోవడంతో డొమెస్టిక్ గ్యాస్ సిలిండర్ వినియోగదారులకు మాత్రం ఊరట లభించింది.
Oil marketing companies have reduced the prices of commercial LPG gas cylinders. The rate of 19 KG commercial LPG gas cylinders has been slashed by Rs 99.75 with effect from today. Delhi retail sales price of 19kg commercial LPG cylinder is Rs 1,680 from today: Sources
No change…
— ANI (@ANI) August 1, 2023
