follow us:
మీకు కారు లేదా బైక్ ఉందా.. మీరు తరచుగా పెట్రోల్ కొట్టిస్తారా.. అయితే ఇక నుంచి పెట్రోల్ బంకుల్లో పెట్రోల్ కొనాల్సిన పనిలేదు. నగదుకు బదులు పాత సామాన్లు, పనికిరాని ఈ వేస్ట్ పరికరాలను అందించి పెట్రోల్ పొందవచ్చు. అదెలా అంటే?
పెట్రోల్ ధరలతో బెంబేలెత్తుతున్న వాహనదారులకు ఇండియన్ ఆయిల్ కంపెనీ గుడ్ న్యూస్ చెప్పింది. ఇండియన్ ఆయిల్ కార్పొరేషన్ లిమిటెడ్ తీసుకున్న ఆ నిర్ణయంతో బంకుల్లో పాత పేపర్లు, ప్లాస్టిక్ వ్యర్థాలు, కార్డ్‌బోర్డ్, పనికి రాని మొబైల్‌లు, ల్యాప్‌టాప్‌లు, నెట్‌వర్క్ పరికరాలు, కేబుల్‌స్ ను ఇచ్చి వాటికి బదులుగా పెట్రోల్ పోయించుకోవచ్చు. ఈ వేస్ట్, ఇతర ఉపయోగంలేని పాత వస్తువులను బంకుల్లో అందించి పెట్రోల్ ను తీసుకెళ్లే వినూత్న కార్యక్రమానికి ఐఓసీఎల్ శ్రీకారం చుట్టింది. ఇప్పటికే హైదరాబాద్ నగరంలోని ఆ ప్రాంతాల్లోని బంకుల్లో ఈ పథకం ద్వారా పెట్రోల్ అందిస్తున్నారు. మరి ఇంకెదుకు ఆలస్యం మీ ఇంట్లో వ్యర్థంగా పడిఉన్న పాత సామాన్లను తీసుకెళ్లి పెట్రోల్ తెచ్చుకోండి.
ఇంట్లో పాత సామాన్లు, పనికిరాని వస్తువులు ఉన్నట్లైతే వాటిని తీసుకెళ్లి స్క్రాప్ షాప్ లో అమ్మేస్తుంటాము. కానీ ఇప్పుడు అలా చేయాల్సిన పనిలేదు. ఆ పనికిరాని సామాన్లను పెట్రోల్ బంకుల్లో అందిస్తే వాటికి బదులుగా మీ వాహనాల్లో పెట్రోల్ పోయించుకోవచ్చు. ప్లాస్టిక్ వ్యర్థాలు, ఈ వేస్ట్ ను అరికట్టి పర్యావరణాన్ని రక్షించడంలో భాగంగా ఇండియన్ ఆయిల్ కార్పోరేషన్ లిమిటెడ్ ఈ వినూత్న పథకానికి తెరలేపింది. ఇండియన్ ఆయిల్ కార్పొరేషన్ లిమిటెడ్ రీసైకిల్ సంస్థలతో కలిసి హైదరాబాద్‌లో రీ ఫ్యుయల్ విత్ రీ సైకిల్ అనే కార్యక్రమాన్ని ప్రారంభించింది. నగరంలో ప్రయోగాత్మకంగా ఐదు పెట్రోల్ బంకుల్లో ఈ విధానాన్ని అమలు చేస్తున్నారు.
అవి హైటెక్ సిటీలోని లెమన్ ట్రీకి ఆపోసిట్ లో ఉన్న ఇండియన్ ఆయిల్ బంకులో, ఐకియా స్టోర్ కు అపోసిట్ లో ఉన్న బంకులో, జూబ్లీహిల్స్ రోడ్ నెం. 36 లో, సైబర్ ఫిల్లింగ్ స్టేషన్ మియాపూర్ దగ్గర, బేగం పేట్ రోడ్ లో ప్రకాశ్ నగర్ వద్ద ఉన్న బంకులో ఈ విధానం ద్వారా పెట్రోల్ అందిస్తున్నారు. ఈ ఐదు ఇండియన్ ఆయిల్ పెట్రోల్ బంకుల్లో పాత సామాన్లను అందించి ఇంధన క్రెడిట్లను పొందవచ్చు. ఈ ఇంధన క్రెడిట్లను వాహనంలో పెట్రోల్ పోయించుకునే సమయంలో రిడీమ్ చేసుకుని పెట్రోల్ పొయించుకోవచ్చు. ఒక వ్యక్తి పది కేజీల కన్నా ఎక్కువ పనికి రాని ప్లాస్టిక్, ఈ వేస్ట్ వస్తువులను తీసుకొస్తే వారికి అదనంగా లీటర్ పెట్రోల్ వరకు అందిస్తామని ఇండియన్ ఆయిల్ కార్పోరేషన్ పేర్కొంది. ఈ కార్యక్రమానికి వచ్చే స్పందనను బట్టి హైదరాబాద్ అంతటా ఉన్న ఇండియన్ ఆయిల్ పెట్రోల్ బంకుల్లో ఈ విధానాన్ని అమలు చేయనున్నట్లు తెలిపారు.
