Babar Azam: ఆ బౌలర్ దెబ్బకి వణికిపోతున్న బాబర్! చెప్పి మరీ అవుట్ చేస్తున్నాడు!

నిన్న మొన్నటి వరకు విరాట్‌ కోహ్లీతో పోల్చి ఆకాశానికి ఎత్తిన పాకిస్థాన్‌ కెప్టెన్‌ బాబర్‌ ఆజమ్‌.. టెస్టు క్రికెట్‌లో సంధి దశను ఎదుర్కొంటున్నాడు. ఈ ఏడాది ఇప్పటి వరకు 3 ఇన్నింగ్స్‌లు ఆడిన బాబర్‌ ఆజమ్‌ కేవలం 64 పరుగులు మాత్రమే చేశాడు. అది కూడా 21.3 సగటుతో కావడం గమనార్హం. మరి చిన్న జట్లపై పరుగుల వరద పారిస్తూ.. అంతర్జాతీయ క్రికెట్‌ మండలి (ఐసీసీ) ర్యాంకింగ్స్‌ టాప్‌-3లో నిలకడగా కొనసాగుతున్న బాబర్‌.. ప్రస్తుతం గడ్డు పరిస్థితులను ఎదుర్కొంటున్నాడు. గాలె వేదికగా శ్రీలంకతో జరుగుతున్న తొలి టెస్టులో 13 పరుగులకే ఆలౌటైన బాబర్‌.. అంతకుముందు స్వదేశంలో న్యూజిలాండ్‌తో సిరీస్‌లోనూ పెద్దగా ఆకట్టుకోలేకపోయాడు.

బ్యాటింగ్‌కు స్వర్గ ధామమైన కరాచీ పిచ్‌పై రెండో ఇన్నింగ్స్‌లో 14 పరుగులకే ఔటైన బాబర్‌.. ఆ తర్వాత రెండో టెస్టులోనూ అదే వైఫల్యం కొనసాగించాడు. తొలి ఇన్నింగ్స్‌లో 24 పరుగులు చేసిన పాకిస్థాన్‌ కెప్టెన్‌.. రెండో ఇన్నింగ్స్‌లో 27 పరుగులు చేసి వెనుదిరిగాడు. జింబాబ్వే, వెస్టిండీస్‌, అఫ్గానిస్థాన్‌, ఐర్లాండ్‌, నెదర్లాండ్స్‌, బంగ్లాదేశ్‌ వంటి జట్లపై భారీగా పరుగులు సాధించే బాబర్‌.. మేటి జట్ల విషయానికి వచ్చేసరికి నాసిరక ప్రదర్శన కనబరుస్తున్నాడు. ముఖ్యంగా శ్రీలంక పేసర్‌ ప్రభాత్‌ జయసూర్య బౌలింగ్‌ ఎదుర్కొనేందుకు బాబర్‌ తీవ్రంగా తడబడుతున్నాడు. గణాంకాలే ఈ విషయాన్ని స్పష్టం చేస్తున్నాయి.

5 ఇన్నింగ్స్‌ల్లో నాలుగు సార్లు ఔట్‌:
శ్రీలంకతో తొలి టెస్టు తొలి ఇన్నింగ్స్‌లో బాబర్‌.. ప్రభాత్‌ జయసూర్య చేతిలో ఔటై పెవిలియన్‌ చేరాడు. ఐదు ఇన్నింగ్స్‌ల్లో అతడి బౌలింగ్‌లో ఔటవడం బాబర్‌కు ఇది నాలుగోసారి. మిగిలిన బౌలర్లను సమర్థవంతంగా ఎదుర్కోగలుగుతున్న బాబర్‌.. జయసూర్య బౌలింగ్‌లో మాత్రం బిక్కచచ్చి పోతున్నాడు. వీరిద్దరూ ఎదురుపడ్డ 5 ఇన్నింగ్స్‌ల్లో జయసూర్య బౌలింగ్‌లో 143 పరుగులు సాధించిన బాబర్‌.. అందులో నాలుగు సార్లు అతడి బౌలింగ్‌లోనే పెవిలియన్‌ చేరాడు. ఒక్కసారి జయసూర్య బంతినందుకోగానే.. బాబర్‌ స్పీడ్‌కు బ్రేక్‌లు పడుతున్నాయనడానికి ఇదే నిదర్శనం.