Indian Cricket : బంగ్లాపై గెలవాల్సిన మ్యాచ్ భారత మహిళలు తడబాటు!

స్వల్ప లక్ష్యఛేదనలో లోయర్‌ ఆర్డర్‌ తడబడటంతో భారత జట్టు వన్డే సిరీస్‌ పంచుకుంది. బంగ్లాదేశ్‌ పర్యటనలో భాగంగా శనివారం జరిగిన ఆఖరిదైన మూడో వన్డేను హర్మన్‌ప్రీత్‌ కౌర్‌ నేతృత్వంలోని భారత మహిళల జట్టు ‘టై’ చేసుకుంది. ఈ సిరీస్‌లో ఇరు జట్లు చెరో మ్యాచ్‌ గెలిచి సమంగా నిలువగా.. ఆఖరి పోరు ‘టై’గా ముగియడంతో సిరీస్‌ను ఇరు జట్లు పంచుకున్నాయి. రెండు జట్లను ఉమ్మడి విజేతగా ప్రకటించారు. మొదట బ్యాటింగ్‌ చేసిన బంగ్లాదేశ్‌ నిర్ణీత 50 ఓవర్లలో 4 వికెట్ల నష్టానికి 225 పరుగులు చేసింది. ఫర్జానా హక్‌ (107) సెంచరీతో చెలరేగగా.. షమీమా సుల్తానా (52) అర్ధశతకంతో రాణించింది. భారత బౌలర్లలో స్నేహ్‌ రాణా 2 వికెట్లు పడగొట్టింది. అనంతరం లక్ష్యఛేదనలో భారత్‌ 49.3 ఓవర్లలో సరిగ్గా 225 పరుగులే చేసి ఆలౌటైంది. స్కోర్లు సమం కావడంతో మ్యాచ్‌ ‘టై’గా ముగిసింది.

లక్ష్యఛేదనలో స్టార్‌ ఓపెనర్‌ స్మృతి మంధన (59), హర్లీన్‌ డియోల్‌ (77) అర్ధశతకాలతో రాణించడంతో టీమిండియా సునాయాసంగా గెలిచేలా కనిపించింది. ఒక దశలో 191/4తో పట్టి స్థితిలో నిలిచిన భారత్‌.. విజయం ఖాయమే అనుకుంటున్న దశలో బంగ్లా బౌలర్లు గొప్పగా పోరాడారు వరుస విరామాల్లో వికెట్లు తీసి జట్టును ఇబ్బందుల్లోకి నెట్టారు. యువ ఓపెనర్‌ షఫాలీ వర్మ (4), యష్తిక భాటియా (5), కెప్టెన్‌ హర్మన్‌ప్రీత్‌ కౌర్‌ (14), దీప్తి శర్మ (1) విఫలమయ్యారు. టీమిండియా విజయానికి 24 బంతుల్లో 14 పరుగులు అవసరమైన దశలో జోరుమీదున్న జెమీమా రోడ్రిగ్స్‌ (33 నాటౌట్‌) క్రీజులో ఉండటంతో చేతిలో 4 వికెట్లు ఉండటంతో ఛేదన పెద్ద కష్టం కాదనిపించింది. అయితే మరో ఎండ్‌లో అమన్‌జ్యోత్‌ కౌర్‌ (10), స్నేహ్‌ రాణా (0), దేవిక వైద్య (0) వరుసగా పెవిలియన్‌ బాట పట్టారు. దీంతో ఒక్కసారిగా మ్యాచ్‌ ఉత్కంఠగా మారిపోయింది.

12 బంతుల్లో 9 పరుగులు రాబట్టాల్సిన సమయంలో చేతిలో ఒక్క వికెట్‌ మాత్రమే ఉన్న భారత్‌.. 49వ ఓవర్లో 6 పరుగులు చేసింది. దీంతో విజయసమీకరణం 6 బంతుల్లో 3 పరుగులకు చేరింది. చివరి ఓవర్‌ తొలి రెండు బంతులకు సింగిల్స్‌ రావడంతో మ్యాచ్‌ ‘టై’ అయింది. మూడో బంతికి మేఘన వికెట్‌ కీపర్‌కు క్యాచ్‌ ఇవ్వడంతో.. భారత్‌ ఇన్నింగ్స్‌ ముగిసింది. హర్లీన్‌ డియోల్‌కు ‘ప్లేయర్‌ ఆఫ్‌ ది మ్యాచ్‌’, ఫర్జానా హక్‌కు ‘ప్లేయర్‌ ఆఫ్‌ ది సిరీస్‌’ అవార్డులు దక్కాయి.