follow us:
అలాంటి కోళ్లు, బాతుల అమ్మకాలను అధికారులు ఆపేశారు. అలాంటి కోళ్లు, బాతుల మాంసాన్ని తినవద్దని హెచ్చరించారు. వేల సంఖ్యలో కోళ్లను, బాతులను చంపటానికి అధికారులు సిద్ధమయ్యారు. ఈ నేపథ్యంలోనే..
జార్ఖండ్‌ రాష్ట్రంలో బర్డ్‌ ఫ్లూ కలకలం సృష్టిస్తోంది. వేల సంఖ్యలో కోళ్లు, బాతులు బర్డ్‌ ఫ్లూ బారినపడుతున్నాయి. అది కూడా రాష్ట్ర ప్రభుత్వం నిర్వహిస్తున్న కోళ్ల ఫాంలలోని పక్షులే ఎక్కువగా వ్యాధి బారినపడుతున్నాయి. ఈ నేపథ్యంలో రాష్ట్ర ప్రభుత్వం చర్యలకు సిద్ధమైంది. బర్డ్‌ఫ్లూతో బాధపడుతున్న కోళ్లను, బాతులను చంపటానికి నిశ్చయించుకుంది. శనివారం సాయంత్రం నుంచి బర్డ్‌ఫ్లూ బాధిత పక్షుల చంపివేత కార్యక్రమం మొదలైంది. ఇక, ప్రొటీన్‌ రిచ్‌ కోళ్లు అయిన కడక్‌నాథ్‌ పక్షుల్లో హెచ్‌5ఎన్‌1 రకంలోని ఏవియన్‌ ఇన్‌ఫ్లుయెన్జా వైరస్‌ కనిపిస్తోంది. దీని కారణంగా 800 పక్షులు చనిపోయాయి. 103 పక్షుల్ని చంపటానికి ఆదేశాలు జారీ అయ్యాయి.
ఫిబ్రవరి 2 నుంచి బర్డ్‌ ఫ్లూ వ్యాధి లక్షణాలతో పక్షులు చనిపోవటం మొదలైంది. దీంతో వాటి శాంపిల్స్‌ను నేషనల్‌ ఇన్‌స్టిట్యూట్ ఆఫ్‌ హై సెక్యూరిటీ అనిమల్‌ డిసీజ్‌కు పంపారు. పరీక్షల్లో అది బర్డ్‌ ఫ్లూగా తేలింది. చంపివేతకు గురవుతున్న పక్షుల యజమానులకు పరిహారం ఇస్తామని అధికారులు స్పష్టం చేశారు. జిల్లాలోని కోళ్లు, బాతుల అమ్మకాలను నిషేదించారు. జిల్లా అధికారులు పక్షులతో పాటు మనుషులనుంచి కూడా శాంపిల్స్‌ సేకరించారు. బర్డ్‌ ఫ్లూ బారిన పడిన వారిని సర్ధార్‌ హాస్పిటల్‌కు తరలించి చికిత్స అందిస్తున్నారు. బర్డ్‌ ఫ్లూ వచ్చిన కోళ్ల మాంసాన్ని తినొద్దని అధికారులు హెచ్చరికలు జారీ చేశారు. జిల్లాలో కోళ్ల, బాతుల అమ్మకాలను ఆపేశారు.
చనిపోయిన కోళ్లు, ఇతర పక్షులు కనిపిస్తే తమకు సమచారం అందించాలని కోరారు. బర్డ్‌ ఫ్లూ బారిన పడిన వారిలో విపరీతమైన నడుం నొప్పి, జ్వరం, దగ్గు, ఊపిరి తీసుకోవటంలో ఇబ్బంది, జలుబు, లాలాజలంతో పాటు రక్తం పడటం వంటి లక్షణాలు ఉంటాయని తెలిపారు. ఈ లక్షణాలు ఉన్న వారు వెంటనే వైద్య సహాయం తీసుకోవాలని చెప్పారు. మరి, జార్ఖండ్‌ రాష్ట్రంలో బర్డ్‌ ఫ్లూ కారణంగా వేల సంఖ్యలో కోళ్లు, బాతులు చంపివేతకు గురవుతున్న ఈ సంఘటనపై మీ అభిప్రాయాలను కామెం‍ట్ల రూపంలో తెలియజేయండి.
