కూతురిగా నటించిన హీరోయిన్‌తో రొమాన్స్ కి నో చెప్పిన విజయ్ సేతుపతి

విజయ్ సేతుపతి ఈ పేరు కొత్తగా పరిచయం చేయాల్సిన అవసరం లేదు. పాన్ ఇండియా నటుడిగా తనకంటూ ప్రత్యేక ఇమేజ్ సొంతం చేసుకున్నాడు విజయ్ సేతుపతి. కోలీవుడ్ లో వచ్చిన ‘తెన్మెర్కు పరువాకత్రు’ సినిమా ద్వారా హీరోగా పరిచయమయ్యాడు. అంతకు ముందు చిన్నచిన్న పాత్రల్లో నటించినా పెద్దగా గుర్తింపు సంపాదించుకోలేకపోయాడు. విజయ్ సేతుపతి రీల్ లైఫ్ లోనే కాదు.. రియల్ లైఫ్ లో కూడా విలువలతో కూడిన వ్యక్తి అని సహనటులు అంటుంటారు. తాజాగా ఓ స్టార్ హీరోయిన్ తో రొమాన్స్ ఛాన్స్ వచ్చినా సున్నితంగా తిరస్కరించాడు. వివరాల్లోకి వెళితే..

పాన్ ఇండియా లెవెల్ లో గుర్తింపు తెచ్చుకొని బిజీ నటుడిగా కొనసాగుతున్నాడు విజయ్ సేతుపతి. పిజ్జా మూవీతో మంచి విజయం అందుకున్న విజయ్ సేతుపతి తర్వాత తెలుగు, తమిళ, మళియాళ, హిందీ భాషల్లో వరుసగా నటిస్తున్నాడు. 2019 చిరంజీవి నటించిన సైరా నరసింహారెడ్డి మూవీలో నటించాడు.. 2021 లో ఉప్పెన్ మూవీలో విలన్ గా నటించి మంచి గుర్తింపు తెచ్చుకున్నాడు. విజయ్ సేతుపతి రీల్ లైఫ్ లోనే కాదు.. రియల్ లైఫ్ లో తనదైన విలువలతో కూడిన కెరీర్ కొనసాగిస్తున్నాడు. నటనకు ప్రాధాన్యత ఉన్న ఎలాంటి పాత్ర అయినా నటించేందుకు సిద్దంగా ఉన్నారు. సాధారణంగా రెమ్యూనరేషన్ కి తగ్గట్టు పాత్ర వస్తే ఎవరైనా నటిస్తారు. కొన్నిసార్లు కథ వినకుండా.. పాత్రతో సంబంధం లేకుండా నటించడానికి ఒప్పుకుంటారు.

విజయ్ సేతుపతి మాత్రం వీటికి కాస్త విరుద్దమనే చెప్పాలి. టాలీవుడ్ సూపర్ హిట్ చిత్రం ఉప్పెన. ఈ మూవీలో విజయ్ సేతుపతి కి కూతురిగా కృతి శెట్టి నటించింది. ఈ మూవీ తర్వాత కృతి శెట్టికి వరుసగా ఆఫర్లు వచ్చినా తెలుగు లో పెద్దగా సక్సెస్ సాధించలేకపోయింది. దీంతో ఈ అమ్మడు కోలీవుడ్ పై కన్నేసింది. అందుకు తగ్గట్టుగానే ఛాన్సులు దక్కించుకుంటుంది. ఈ క్రమంలోనే కృతి శెట్టికి విజయ సేతుపతి హీరోగా నటిస్తున్న ఓ చిత్రంలో హీరోయిన్ గా నటించే ఛాన్స్ వచ్చింది. కానీ విజయ్ సేతుపతి మాత్రం కృతి శెట్టితో నటించే ప్రసక్తే లేదని చెప్పాడు.. ఉప్పెన మూవీలో ఆమెకు తండ్రిగా నటించానని.. అలాంటిది కూతురు లాంటి అమ్మాయితో రొమాన్స్ చేయడం తనకు ఇష్టం లేదని చెప్పినట్లు సమాచారం. మరోవైపు తనకు అలాంటి అభ్యంతరాలు ఏమీ లేవని కృతి శెట్టి చెప్పిట్లు ఇండస్ట్రీలో టాక్ వినిపిస్తుంది.