ఇండస్ట్రీలో విషాదం.. ఆత్మహత్య చేసుకున్న నేషనల్ అవార్డు విన్నింగ్ ఆర్ట్ డైరెక్టర్!

ఈ మద్య పలు సినీ ఇండస్ట్రీలో వరుస విషాదాలు చోటు చేసుకుంటున్నాయి. సినీ రంగం అంటే రంగుల ప్రపంచం అనుకుంటారు.. కానీ నిజ జీవితంలో సెలబ్రెటీలకు కష్టాలు.. కన్నీళ్లు ఉంటాయని తమ అనుభవాలు మీడియా వేధికగా వెల్లడించారు. ఎన్నో ఆశలతో ఇండస్ట్రీలోకి అడుగు పెట్టి కెరీర్ సాఫీగా సాగని వారు డిప్రేషన్ లోకి వెళ్లి ఆత్మహత్యలు చేసుకున్న సందర్భాలు ఉన్నాయి. ఆర్థిక ఇబ్బందులు పడుతూ ఎవరికీ చెప్పుకోలేక బలవన్మరణాలకు పాల్పపడినవారు ఉన్నారు. తాజాగా సినీ ఇండస్ట్రీలో మరో విషాదం చోటు చేసుకుంది. ప్రముఖ ఆర్ట్ డైరెక్టర్ నితిన్ దేశాయ్ ఆత్మహత్య చేసుకొని చనిపోయారు. వివరాల్లోకి వెళితే..

మారాఠీ ఇండస్ట్రీలో తీవ్ర విషాదం చోటు చేసుకుంది. ప్రముఖ ఆర్ట్ డైరెక్టర్ నితిన్ దేశాయ్ (58) బుధవారం, ఆగస్టు 2న ఆత్మహత్య చేసుకున్నారు. ముంబైకి 80 కి.మీ దూరంలోని కర్జాత్‌లో ఉన్న తన స్టూడియోలో ఆయన బలవన్మరణాలకు పాల్పపడినట్టు తెలుస్తుంది. నితిన్ చంద్రకాంత్ దేశాయ్ ఆర్ట్ డైరెక్టర్, చిత్ర దర్శకుడు, నిర్మాతగా కొనసాగారు. హిందీ, మరాఠీ చిత్రాలకు ఆర్ట్ డైరెక్టర్ గా అశుతోష్ గోవారికర్, విధు వినోద్ చోప్రా, రాజ్‌కుమార్ హిరానీ, సంజయ్ లీలా బన్సాలీ వంటి ప్రముఖ చిత్రనిర్మాతలతో కలిసి పనిచేశాడు. ఆర్ట్ డైరెక్టర్‌గా నితిన్ దేశాయ్ చివరి ప్రాజెక్ట్ అశుతోష్ గోవారికర్ దర్శకత్వం వహించిన పానిపట్.. ఈ మూవీ 2019లో విడుదలైంది. సినిమా రంగంలోకి రాక ముందు నితిన్ దేశాయ్ ముంబైలో సర్ జె.జె. ఆర్ట్ స్కూల్ నుండి ఫోటోగ్రఫీలో శిక్షణ పొందారు. 1987 నుండి సినిమా జీవితం ప్రారంభించారు.

నితిన్ దేశాయ్ హమ్ దిల్ దే చుకే సనమ్, లగాన్, దేవదాస్ చిత్రాలతో గొప్ప పేరు సంపాదించారు. ఇందుకు గాను ఉత్తమ కళా దర్శకుడిగా అనేక జాతీయ అవార్డులను పొందాడు. ఆగస్ట్ 9న ఆయన 58వ పుట్టినరోజు జరుపుకోవడానికి కొన్ని రోజుల ముందే ఆయన బలవన్మరణానికి పాల్పడటంతో సినీ ఇండస్ట్రీ ఒక్కసారిగా షాక్ కి గురైంది. పోలీసు వర్గాల సమాచారం ప్రకారం.. కర్జాత్‌లోని తన స్టూడియోలో ఆర్ట్ డైరెక్టర్ నితిన్ దేశాయ్ మృతదేహం కనిపించింది. సెట్‌లోని ఓ కార్మికుడు పోలీసులకు సమాచారం అందించాడు. పోలీసు బృందం స్టూడియోకి చేరుకున్నప్పుడు అతని మృతదేహం వేలాడుతూ కనిపించింది. ఈ ఘటనపై కేసు నమోదుచేసుకొని దర్యాప్తు చేస్తున్నామని రాయగడ ఎస్పీ తెలిపారు.

Noted art director Nitin Desai found dead at his studio in Maharashtra’s Raigad district: Official

— Press Trust of India (@PTI_News) August 2, 2023