MS Dhoni: ధోనీకి అవంటే మరీ ఇంత పిచ్చా..కలెక్షన్ చూస్తే మైండ్ బ్లాంక్ అవ్వాల్సిందే

దేశానికి రెండు ప్రపంచకప్ లు అందించిన మాజీ కెప్టెన్ మహేంద్ర సింగ్ ధోనీకి బైక్ లంటే ఎంత పిచ్చో అందరికీ తెలిసిందే. మైదానంలో వికెట్ల మధ్య చిరుతల పరిగెత్తే మహీ.. స్టేడియం బయట తనకిష్టమైన బైక్ లను అంతే ఇష్టంగా పరుగులెత్తిస్తాడు. ఇప్పటి వరకు లెక్కలేనన్ని కార్లు కొనుగోలు చేసిన ధోనీ.. వాటి కోసం రాంచీలోని తన ఫామ్ హౌజ్ లో ప్రత్యేకంగా ఓ ఏర్పాటు చేశాడు. వాటిని చూసిన వారికెవరికైనా.. మహీకి వాహనాలపై ఎంత పిచ్చి ఉందో అర్థమవుతుంది. అవకాశం దొక్కినప్పుడల్లా తనకు ఇష్టమైన బైక్ లపై షికారుకు వెళ్లడాన్ని అమితంగా ఇష్టపడే ధోనీ వద్ద కేవలం టూ విలర్సే కాకుండా.. ఫోర్ విలర్స్ కూడా ఉన్నాయి.

భారత మాజీ పేసర్ వెంకటేశ్ ప్రసాద్ వాటిని చూసి ఆశ్చర్యం వ్యక్తం చేశాడు. రాంచీలోని ధోనీ ఫామ్ హౌస్ కు వెళ్లిన వెంకీ అక్కడి వాహనాలను చూసి అవాక్కైనట్లు సోషల్ మీడియాలో పేర్కొన్నాడు. ఓ మనిషికి బైక్ లపై ఇంత ఇష్టం ఉంటుందని అనుకోలేదని ప్రసాద్ అన్నాడు. ‘ఒక అంశంపై ఇంత ఉత్సాహం ఉన్న వ్యక్తిని నేనెప్పుడూ చూడలేదు. మైదానంలో మహీ మంచి ప్లేయర్ గానే తెలుసు.. బయట కూడా అతడో అద్భుతం. అతడి చర్యలు ప్రతి ఒక్కరినీ ఉత్సాహ పరుస్తాయి. రాంచీ ఫామ్ హౌస్ లో అతడి బైక్ ల కలెక్షన్ చూశాక నాకు మాటలు రాలేదు. అందులో అన్ని వెరైటీలు ఉన్నాయి. వాటితో ఓ అత్యాధునిక షోరూం ఏర్పాటు చేయవచ్చు’ అని ప్రసాద్ ట్వీట్ చేశాడు.

మహీకి మ్యాన్ ఆఫ్ ది మ్యాచ్ గా వచ్చిన బైక్ లు సైతం అందులో ఉన్నాయి. సునీల్ జోషితో కలిసి రాం చీ వెళ్లిన వెంకటేశ్ ప్రసాద్.. ధోనీతో బైక్ ల గురించి సరదాగా మాట్లాడిన వీడియో సోషల్ మీడియాలో వైరల్ గా మారింది. గతంలో తనతో పాటు జట్టులోని ఎవరికి మ్యాన్ ఆఫ్ ది మ్యాచ్ గా బైక్ గిఫ్ట్ వచ్చినా దాన్ని మహీనే పరుగులు పెట్టించిన సందర్భాలు కోకొల్లలు. ప్రస్తుతం అంతర్జాతీయ క్రికెట్ కు రిటైర్మెంట్ ప్రకటించిన మహీ.. ఐపీఎల్లో చెన్నై సూపర్ కింగ్స్ కు సారథిగా వ్యవహరిస్తున్నాడు. ఖాళీ సమయాల్లో రాంచీ లోని తన వ్యవసాయ క్షేత్రంలో ట్రాక్టర్ నడిపే ధోనీ వీడియోలు గతంలో వైరల్ అయిన విషయం తెలిసిందే..

One of the craziest passion i have seen in a person. What a collection and what a man MSD is . A great achiever and a even more incredible person. This is a glimpse of his collection of bikes and cars in his Ranchi house.
Just blown away by the man and his passion @msdhoni pic.twitter.com/avtYwVNNOz

— Venkatesh Prasad (@venkateshprasad) July 17, 2023