follow us:
అమ్మ.. ప్రపంచంలో ఇంతకు మించిన బలమైన మాట లేదు. ప్రాణాలు పోయే అంత నరకం అనుభవించి.. బిడ్డకి ప్రాణాలు పోస్తుంది అమ్మ. అందుకేనేమో ఆ పేగు బంధం ముందు.. ఏదీ సరితూగదు. పుట్టకముందు మాత్రమే కాదు, పుట్టాక కూడా కడుపులో పెట్టుకుని సాకడం ఒక్క అమ్మకే సాధ్యం. కానీ ఇక్కడ ఒక తల్లి తన 8 ఏళ్ల బాబుని వదిలించుకోవాలని చూసింది. దూరంగా పోయి బతకరా అంటూ దగ్గరుండి మరీ రైలు ఎక్కించింది. అమ్మ అనే పదానికే మాయని మచ్చ తెచ్చిన ఈ ఘటన తెలంగాణలోని జనగామ జిల్లాలో చోటు చేసుకుంది. రామాంతపూర్ కి చెందిన జోగు అంబికకు, జోగు కన్నప్ప అనే వ్యక్తితో వివాహం జరిగింది. వీరి వివాహ బంధానికి ప్రతిరూపంగా మణికంఠ అనే బాబు పుట్టాడు. అయితే మణికంఠ తన తండ్రిని కోల్పోయాడు. దీంతో అంబిక.. శ్రీను అనే వ్యక్తిని వివాహం చేసుకుంది. వీరికి ఒక పాప పుట్టింది. అయితే తండ్రి లేని లోటుని తీర్చాల్సిన శ్రీను.. సవతి తండ్రి బుద్ధి చూపించాడు.
తమకి పుట్టిన పాప చాలు, వీడు మనకి అవసరమా అని బాబుని వదిలించుకునేందుకు తెగించాడు. అల్లరి చేస్తున్నాడన్న సాకుతో బాలుడి తల్లి అంబిక, సవతి తండ్రి శ్రీను ఇద్దరూ కలిసి బాబుని సికింద్రాబాద్ స్టేషన్ కి తీసుకెళ్లి.. భద్రాచలం వెళ్లే కాకతీయ ఫాస్ట్ ప్యాసింజర్ రైలు ఎక్కించారు. “పోయి ఎక్కడైనా బతుకు.. పెరిగి పెద్దయ్యాక తిరిగి రా” అంటూ చెప్పి మరీ రైలు ఎక్కించారు. ఇంతకంటే ఘోరం ఇంకెక్కడా ఉండదు. చిన్న పిల్లలన్నాక అల్లరి చేయడం మామూలే. ఆ వయసులో అల్లరి చేయకపోతే ఆడికి ఏదో రోగం ఉన్నట్టు. పిల్లల అల్లరిని కూడా భరించలేని పెంపకం ఏం పెంపకం? చదువుకునే వయసు, ఆడుకునే వయసులో కన్నవారికి దూరంగా బతకడం సాధ్యమా? పైగా పెద్దయ్యాక తిరిగి రావాలని చెప్పడం ఒకటి. ఏమై తిరిగి రావాలి? కలెక్టరై రావాలా? పోలీసై రావాలా? ఇదేమైనా సినిమానా? రెండున్నర గంటల్లో అనుకున్నది అయిపోవడానికి.
అరె ఎనిమిదేళ్ల వయసులో ఏ బాలుడైనా తల్లి, తండ్రి వెంట లేకుండా ప్రయాణం చేయగలడా? అది కూడా బంధువుల తోడు లేకుండా. రైలులో ఒంటరిగా ప్రయాణించే వయసా అది. పాపం ఆ బాబు ఎంత బాధపడి ఉంటాడు. బాబుని చూస్తుంటేనే గుండె తరుక్కుపోతుందే. అలాంటి బాబుని వదిలించుకోవాలని ఎలా అనిపించిందో ఆ మహా తల్లికి. అమ్మ చెప్పింది కాబట్టి ఏం మాట్లాడకుండా రైలు ఎక్కేసాడు. కనీసం ఏడవను కూడా ఏడవలేదంటే అమ్మ మాటకు ఎంత విలువ ఇచ్చాడో కుర్రాడు. ఆ వయసులో అంత మెచ్యూరిటీ ఉందంటేనే అర్ధం చేసుకోవాలి, ఆ మెచ్యూరిటీ ముందు అల్లరి అన్న పదం కూడా చిన్నదే అని. కోపంలో ఏ తల్లైనా, తండ్రైనా పిల్లల్ని కొట్టడం, వదిలేస్తా అని బెదిరించడం లాంటివి చేస్తారు. అంత మాత్రాన నిజంగా వదిలేస్తారా? పోనీ రైల్వేస్టేషన్ దాకా వెళ్లినా ఆ మాతృ హృదయం ద్రవించలేదు. బాబు తిరిగొచ్చిన తర్వాత పోలీస్ స్టేషన్ లో అయినా మనసు కరగాలిగా. అయినా కరగలేదు మహా తల్లి మనసు. మొదటి భర్తకు పుట్టడమే ఆ బాబు చేసిన శాపం అయ్యింది.
అదే తండ్రి ఉంటే అమ్మ ఇలా చేస్తుంటే సూపర్ మ్యాన్ లా అడ్డుకునేవాడు కదా అని ఆ బాబు ఆలోచిస్తూ ఉంటాడు. సవతి తండ్రి కాబట్టి, తన కొడుకు కాదు కాబట్టి పోతే పోనీ అని అడ్డు చెప్పలేదు. ఇది కదా అమానవీయం అంటే. ఇది కదా పాపమంటే. పాపం బాబు ఒక్కడే రైలులో బిక్కుబిక్కుమంటూ తిరుగుతుంటే చూసి చలించిన ప్రయాణికులు ఘన్ పూర్ పోలీసులకు అప్పగించారు. వారు బాబు చెప్పిన ఇంటి అడ్రస్, ఫోన్ నంబర్ ఆధారంగా తల్లి, సవతి తండ్రిని పిలిపించారు. కౌన్సిలింగ్ ఇచ్చి బాబుని తీసుకెళ్లమని అన్నారు. అయినప్పటికీ ఆ తల్లి హృదయం కరగలేదు. మనసులో కల్మషం, కర్కశం అనే కరగనటువంటి ఘన పదార్థాలను పెట్టుకుంటే ఏ కర్కశ తల్లి హృదయం మాత్రం కరుగుద్ది? అమ్మా తీసుకెళ్ళు అని అన్నా కూడా ఆ బాబుని తీసుకెళ్ళలేదంటే.. ఆ తల్లి ఎంతలా కళ్ళు మూసుకుపోయి ఉన్నదో అర్ధమవుతోంది. మాకొద్దు ఈ బాబు అని ఖరాకండిగా చెప్పేయడంతో.. పోలీసులు బాబుని చైల్డ్ లైన్ ప్రతినిధులకు అప్పగించి అనాథాశ్రమంలో చేర్పించారు. బాలుడికి మంచి చదువు అందేలా చూస్తామని అన్నారు.
పిల్లల్ని కన్నది ఎందుకు? నచ్చలేదని, అల్లరి చేస్తున్నాడని వదిలేయడానికా? ఇలా వదిలేయడం వల్లే కదా.. పిల్లలు దారి తప్పి పెద్దయ్యాక దొంగలుగా, నేరస్తులుగా తయారవుతున్నారు. ఇలాంటి తల్లిదండ్రుల వల్లే కదా సమాజంలో నేరాలు ఎక్కువయ్యేది. ముందు అరెస్ట్ చేయాల్సింది వీళ్ళని. కానీ అంత దూరం ఆలోచించే అవకాశం మనకి ఆ బాబు ఇవ్వలేదు. “ఏరా నాన్న.. పెద్దయ్యాక ఏమవుతావ్? అని బాబుని పోలీసాయన అడిగితే.. తడబడకుండా పోలీస్ అవుతా” అని చెప్పాడు. బాబు మెచ్యూరిటీ లెవల్స్ కి మాత్రం కళ్ళమ్మట నీళ్లు వస్తున్నాయి. అమ్మని వదిలేసిన కొడుకుల్ని చూశాము గానీ అమ్మే కొడుకును వద్దు అని వదిలేయడం ఇదే మొదటిసారి ఏమో, చరిత్రలో ఇదే తొలిసారి ఏమో. ఈ హృదయవిదారకర ఘటన చూసి నెటిజన్లు చలించిపోతున్నారు. బాబుని చూస్తుంటే మాకే జాలి వేస్తుంది, మాకే పెంచుకోవాలనిపిస్తుంది. అలాంటిది నీకేం మాయరోగమమ్మ అని నెటిజన్లు ఆమెను తిడుతున్నారు. ప్రస్తుతం దీనికి సంబంధించిన వీడియో సోషల్ మీడియాలో వైరల్ అవుతోంది. మరి తన బిడ్డను వదిలేసిన ఈ కన్న తల్లిపై మీ అభిప్రాయమేంటో కామెంట్ చేయండి.
