follow us:
టీమిండియా క్రికెట్ లో ప్రతిభ ఉన్న యువ ఆటగాళ్లకి కొదవ లేదు. కానీ వారికి సరైన అవకాశాలు రావడంలేదు. దానికి కారణం జట్టులోని అందరు నైపుణ్యం గల ఆటగాళ్లే కావడం. దీంతో ఎవరిని సెలక్ట్ చేయాలో సెలక్టర్లకు అంతుపట్టడం లేదు. ఈ క్రమంలోనే ఓ యువ ఆటగాడు టీమిండియాలో చోటు కోసం తీవ్రంగా శ్రమిస్తున్నాడు. భారీ షాట్లు కొట్టడంలో అతడికి అతడే సాటి.. ఇక అతడు సిక్స్ లు కొడితే.. ఇలా కూడ సిక్స్ లు కొడతారా అని ఆశ్చర్యపోతూంటారు. అతడెవరో కాదు గతంలో ఐపీఎల్ లో అత్యంత భారీ ధరకు అమ్ముడై రికార్డు సృష్టించిన ఇషాన్ కిషన్. ఇషాన్ తాజాగా దక్షిణాఫ్రికాతో జరిగిన రెండో వన్డేలో ప్రత్యర్థి పై సిక్స్ ర్లతో విరుచుకుపడ్డాడు. మ్యాచ్ అనంతరం తన సిక్సర్ల సీక్రెట్ గురించి పలు ఆసక్తికర వ్యాఖ్యలు చేశాడు. మరిన్ని వివరాల్లోకి వెళితే..
ఇషాన్ కిషన్.. ఐపీఎల్ ద్వారా భారీ షాట్లు కొట్టగల ఆటగాడిగా పేరొందాడు. ఇక ముంబాయి ఇండియన్స్ తరపున మెరుపు ఇన్నింగ్స్ లు ఆడి ఒక్క సారిగ క్రికెట్ ప్రపంచాన్ని ఆకర్షించాడు. దాంతో టీమిండియా సెలక్టర్ల దృష్టిలో పడ్డాడు. తాజాగా జరుగుతున్న దక్షిణాఫ్రికా వన్డే సిరీస్ లో అతడికి స్థానం లభించింది. మెుదటి వన్డేలో ఎక్కువ బాల్స్ లో తక్కువ రన్స్ చేశాడని నెటిజన్స్ విమర్శించారు. వారి విమర్శలకు రెండో వన్డేలోనే తన బ్యాట్ తో సమాధానం ఇచ్చాడు. ఈ మ్యాచ్ లో 84 బంతుల్లో 4 ఫోర్లు, 7 సిక్సర్లతో 93 పరుగులు చేసి.. కొద్దిలో శతకం చేజార్చుకున్నాడు. ఈ క్రమంలోనే మ్యాచ్ అనంతరం జరిగిన విలేకర్ల సమావేశంలో మాట్లాడుతూ..”నాకు సిక్స్ లు కొట్టడం వెన్నతో పెట్టిన విద్య.. చిన్నప్పటి నుంచి నాకు భారీ షాట్లు ఆడటమే ఇష్టం . అలాంటప్పుడు నేను సింగిల్స్ ఎందుకు తియ్యాలి? అని అన్నాడు.
ఈ క్రమంలోనే ఓ జర్నలిస్ట్.. సింగిల్స్ తీస్తూ.. సెంచరీ పూర్తి చేయోచ్చు కదా? అని ప్రశ్నించగా..”చాలా మంది ఆటగాళ్లు ఇదే చేస్తారు. కానీ నేను అలా కాదు. నా స్ట్రెంత్ సిక్సర్లు బాదడం.. ఇది నాకు చాలా ఈజీ పని, అందుకే నేను నా పద్దతినే ఫాలో అవుతా. నాకు సిక్స్ లు కొట్టే దమ్మున్నప్పుడు.. ఇక సింగిల్స్ తీయడం ఎందుకు? అయితే ఇది ప్రతీ సారి వర్కౌట్ కాదు సుమీ అని అన్నాడు. ఇక తన సెంచరీ మిస్ గురించి వివరిస్తూ.. నేను శతకం కోసం చూస్తూ.. ఉంటే జట్టుకు అన్యాయం చేసిన వాడిని అవుతాను. అలాగే మ్యాచ్ చూసే ప్రేక్షకులను కూడా నేను మోసం చేసిన వాడిని అవుతాను. నేను పరిస్థితికి తగ్గట్లుగానే ఆడతాను, దేశం తరపున ఆడుతున్నప్పుడు వ్యక్తిగత రికార్డులను నేను పట్టించుకోనని ఇషాన్ కిషన్ తెలిపాడు. ఈ క్రమంలోనే బీ టీమ్ అంటూ వస్తున్న విమర్శలపై అసంతృప్తి వ్యక్తం చేశాడు. మమ్మల్ని బీ టీమ్ గా పిలవడం నాకు నచ్చదు. ఆటను బట్టే ఆటగాళ్లు ఉంటారు అంతేగానీ బీ, ఏలు అనే పేర్లను మేం పట్టించుకోం. ఈ మ్యాచ్ లో మేం సమష్టిగా ఆడి రాణించాం” అంటూ పేర్కొన్నాడు.
