follow us:
ప్రతిష్టాత్మక టీ20 వరల్డ్‌ కప్‌ 2022కు ముందు టీమిండియాకు షాకులమీద షాకులు తగులుతున్నాయి. ఇప్పటికే స్టార్‌ పేసర్‌ జస్ప్రీత్‌ బుమ్రా గాయం కారణంగా వరల్డ్‌ కప్‌ టోర్నీకి దూరమైన విషయం తెలిసిందే. ఇంతవరకు బుమ్రా స్థానాన్ని భర్తీ చేసేందుకే సరైన బౌలర్‌ దొరకని పరిస్థితుల్లో మరో స్టార్‌ ప్లేయర్‌ గాయపడటంతో టీమిండియా కష్టాలు మరింత ఎక్కువయ్యాయి. టీ20 వరల్డ్‌ కప్‌ 2022కు టీమిండియా స్టాండ్‌బై ప్లేయర్‌గా ఉన్న దీపక్‌ చాహర్‌ గాయపడ్డాడు. సౌతాఫ్రికాతో వన్డే సిరీస్‌కు ఎంపికైన దీపక్‌ చాహర్‌.. అంతకంటే ముందు సౌతాఫ్రికాతో జరిగిన మూడు టీ20ల సిరీస్‌లో కూడా ఆడాడు. బుమ్రా గాయంతో వరల్డ్‌ కప్‌ దూరమవ్వడంతో అతని స్థానానికి దీపక్‌ చాహర్‌ కూడా పోటీదారుగా ఉన్నాడు.
కానీ.. ఇప్పుడు గాయం కారణంగా సౌతాఫ్రికాతో మిగిలిన రెండు వన్డేలతో పాటు వరల్డ్‌ కప్‌కు దూరమయ్యే ప్రమాదంలో పడ్డాడు. సౌతాఫ్రికాతో మిగిలిన రెండు వన్డేలకు పూర్తిగా దూరమైన దీపక్‌.. తిరిగి కోలుకునేందుకు వెంటనే బెంగుళూరులోని నేషనల్‌ క్రికెట్‌ అకాడమీకి చేరుకున్నట్లు సమాచారం. కాలి గజ్జల్లో గాయం కారణంగా దీపక్‌ వన్డే సిరీస్‌కు దూరమయ్యాడు. ఆ గాయం మరింత తీవ్రమైనా.. వరల్డ్‌ కప్‌ సమయానికి కల్లా కోలుకోకపోయినా.. దీపక్‌ కూడా బుమ్రా లానే ప్రతిష్టాత్మక టీ20 వరల్డ్‌ కప్‌ 2022కు దూరం అవ్వక తప్పదు.
కాగా.. బుమ్రా స్థానంలో టీమిండియా సీనియర్‌ పేసర్‌ మొహమ్మద్‌ షమీని ఫైనల్‌ చేసే అవకాశం ఉంది. షమీ కూడా టీ20 వరల్డ్‌ కప్‌ స్టాండ్‌బై ప్లేయర్‌గా ఉన్న నేపథ్యంలో అతన్ని బుమ్రా స్థానంలో తీసుకోవాలని బీసీసీఐ భావిస్తున్నట్లు వార్తలు వస్తున్నాయి. కాగా.. షమీకి పోటీగా మొహమ్మద్‌ సిరాజ్‌ సైతం బుమ్రా స్థానానికి పోటీ పడుతున్నాడు. బీసీసీఐ దృష్టిలో అతను కూడా ఉన్నాడు. ఆస్ట్రేలియా పిచ్‌లపై సిరాజ్‌ కూడా మంచి ఎఫెక్టివ్‌ బౌలర్‌. ఇక షమీ, సిరాజ్‌తో పాటు పరిశీలనలో ఉన్న దీపక్‌ చాహర్‌ గాయం కారణంగా గోల్డెన్‌ ఛాన్స్‌ మిస్‌ అయ్యాడనే చెప్పాలి.
Deepak Chahar has a stiff back, and not a twisted ankle, because of which he has been ruled out of the last two ODIs against SA. He has moved to NCA in Bangalore and is likely to fly to Australia with Mohd Shami on October 16.
— Rahul Rawat (@rawatrahul9) October 7, 2022
