follow us:
సోషల్‌ మీడియాలో మంచు కుటుంబం మీద ట్రోలింగ్‌ కాస్త ఎక్కువగానే సాగుతుంది. మరీ ముఖ్యంగా మోహన్ బాబు, విష్ణు, లక్ష్మి వీరు ఎక్కువగా ట్రోలింగ్‌కు గురవుతారు. ఇక తమ గురించి తామే గొప్పగా ప్రచారం చేసుకుంటారని విమర్శలు చేస్తారు. ఈ క్రమంలో నటుడు మోహన్‌బాబు.. సొంత డబ్బా కొట్టుకోవడం తప్పేమి కాదు అని తెలిపారు. రామాయణంలో హనుమంతుడు కూడా ఇదే చేశాడని పేర్కొన్నారు. ప్రస్తుతం ఆయన మాట్లాడిన వీడియో నెట్టింట వైరలవుతోంది. మంచు విష్ణు సారథ్యంలోని మూవీ ఆర్టిస్ట్ అసోసియేషన్ కొత్త గవర్నింగ్ బాడీ ఏడాది పూర్తి చేసుకున్న సందర్భంగా నిర్వహించిన మీడియా సమావేశంలో మోహన్ బాబు పాల్గొన్నారు. ఈ సందర్భంగా ఆయన చేసిన వ్యాఖ్యలు వైరలవుతున్నాయి.
ఈ సందర్భంగా మోహన్‌బాబు మాట్లాడుతూ.. ‘‘ఇండస్ట్రీలో నేను బ్రదర్ అని పిలిచే అత్యంత ఆత్మీయుడు కృష్ణంరాజు నేడు మన మధ్యన లేకపోవడం చాలా విచారకరం. కృష్ణంరాజు విష్ణుని ఎంతో ప్రోత్సహించేవారు. తనకు ఎన్నో మంచి విషయాలు చెప్పేవారు. అలాంటి వ్యక్తి నేడు మన మధ్యన లేకపోవడం నిజంగా మనసుకు కష్టంగా ఉంది. ప్రస్తుతం ఏర్పాటు చేసిన మూవీ ఆర్టిస్ట్ అసోసియేషన్ గవర్నింగ్ బాడీ అద్భుతంగా పనిచేస్తోంది. జీవితంలో గెలుపు ఓటములు అనేవి సహజం. అలానే ఓ సినిమా విజయం సాధించడం, ఫ్లాప్‌ అవ్వడం కూడా సహజమే. కానీ, రమణ మహర్షి గారు చెప్పినట్టు.. భూమ్మీద ఎన్ని దుర్గుణాలు ఉన్నాయో అవన్నీ కలబోసి ఒక మిక్సర్‌లో వేస్తే తయారయ్యేవాడే మనిషి. పాములకు కోరల్లో విషం.. తేలుకు తోకలో విషం.. కానీ మనిషికి మాత్రం.. నిలువెల్ల విషమే అన్నాడు. అలా, ఓటమిని సహించలేక ఎవరు ఏం చేశారు అనేది మీ అందరికీ తెలుసు. వాళ్లు కూడా బాగుండాలి అని కోరుకుంటున్నాను’’ అన్నారు మోహన్ బాబు.
‘‘నేను మూవీ ఆర్టిస్ట్ అసోసియేషన్ ప్రెసిడెంట్‌గా చేసినప్పుడు ఇలాంటి మీటింగ్‌లు ఎప్పుడూపెట్టలేదు. ఇలా డిన్నర్లు కూడా ఇవ్వలేదు. మొదటిసారి ఇలా చేశాను. ఇక చాలా మంది సెల్ఫ్ డబ్బాలు కొట్టుకున్నారురో అంటారు. కానీ నేటి కాలంలో అది అవసరం. మన పురాణలు.. భారత, భాగవత, రామాయణాల్లో చూసుకుంటే.. హనుమంతుడు లంకకు వెళ్లినప్పుడు సీతాదేవి దగ్గర.. అమ్మా నేను 100 మంది కోతుల్లో ఒక కోతిని అని చాలా వినయంగా చెప్పాడు. రావణుడి దగ్గరకు వెళ్లిన తరవాత తనకు కుర్చీనే వేయొద్దని చెప్తే.. తానెంతటివాడినో చూపిస్తానని చెప్పి లంకా దహణమే చేసి తిరిగి వచ్చాడు. ఎక్కడ వినయంగా ఉండాలి.. ఎక్కడ విశ్వరూపం చూపించాలి అన్నది అక్కడే ఉంది’’ అన్నాడు.
‘‘కాబట్టి మనం ఏం చేశామనే విషయాన్ని 10 మందికి తెలియజేయడం అనేది చాలా సద్గుణం. అది సెల్ఫ్ డబ్బా కాదు. మాటలు చెప్పి.. చేతల్లో చేయనప్పుడు అది సెల్ఫ్ డబ్బా’’ అన్నాడు మోహన్ బాబు. అలానే విష్ణు మాటిచ్చాడు కాబట్టి కచ్చితంగా మూవీ ఆర్టిస్ట్ అసోసియేషన్ కొత్త భవనాన్ని నిర్మిస్తాడని మోహన్ బాబు మరోసారి స్పష్టం చేశారు. ప్రస్తుతం ఈ వీడియో నెట్టింట వైరల్‌గా మారింది.
