follow us:
కరోనా తర్వాత నుంచి దేశంలో డిజిటల్‌ పేమేంట్స్‌ విపరీతంగా పెరిగాయి. ఆన్‌లైన్‌ షాపింగ్‌, బిల్‌ పేమెంట్స్, బయట మార్కెట్‌లో ఏం కొన్నా.. ఆన్‌లైన్‌ పేమెంట్‌ చేస్తున్నారు. ప్రస్తుతం ఏటీఎం సర్వీసులపై ఒక లిమిట్‌ దాటిన తర్వాత చార్జీలు వసూలు చేస్తున్న సంగతి తెలిసిందే. ఈ క్రమంలో యూపీఐ చెల్లింపుల కూడా చార్జీలు వసూలు చేసే అవకాశం ఉందనే వార్తలు గత కొన్ని రోజులుగా ఎక్కువగా వినిపిస్తున్నాయి. ఈ క్రమంలో యూపీఐ చెల్లింపులపై చార్జీలు విధించే ఆలోచన లేదని కేంద్ర ఆర్థిక శాఖ వెల్లడించింది. యూపీఐ అనేది ప్రజలకు మేలు చేకూర్చేందుకు ఉద్దేశించిన డిజిటల్‌ ప్రయత్నం మాత్రమేనని పేర్కొంది. సర్వీస్‌ ప్రొవైడర్లు ఇతరత్రా మార్గాల ద్వారా తమ ఖర్చులను రాబట్టుకోవాల్సి ఉంటుందని తెలిపింది. ఈ మేరకు ఆర్థిక శాఖ ట్వీట్‌ చేసింది.
డిజిటల్‌ చెల్లింపులు, పేమెంట్‌ ప్లాట్‌ఫాంలను ప్రోత్సహించడం కోసం డిజిటల్‌ పేమెంట్‌ వ్యవస్థకు ప్రభుత్వం గతేడాది ఆర్థిక సహకారం అందించిందని, ఈ ఏడాది కూడా దాన్ని కొనసాగించనున్నట్లు కేంద్రం ప్రకటించిందని.. ఈ సందర్భంగా ఆర్థిక శాఖ తెలిపింది. ఇక ఐఎంపీఎస్‌ తరహాలోనే యూపీఐ కూడా నిధుల బదలాయింపు వ్యవస్థ కాబట్టి ఈ విధానంలోనూ చార్జీలను వర్తింపచేసే అంశంపై రిజర్వ్‌ బ్యాంక్‌ కొన్ని రోజుల క్రితం చర్చాపత్రం విడుదల చేసిన సంగతి తెలిసిందే. ఈ నేపథ్యంలో ఆర్థిక శాఖ యూపీఐ సేవలపై చార్జీల విధింపు ఉండదు అంటు వివరణ ఇవ్వడం ప్రాధాన్యత సంతరించుకుంది.
UPI is a digital public good with immense convenience for the public & productivity gains for the economy. There is no consideration in Govt to levy any charges for UPI services. The concerns of the service providers for cost recovery have to be met through other means. (1/2)
— Ministry of Finance (@FinMinIndia) August 21, 2022
