వీడియో: బ్రెట్‌లీ సూపర్‌ ఔట్‌ స్వింగర్‌కు ట్రేడ్‌ మార్క్‌తో బదులిచ్చిన సచిన్‌

క్రికెట్‌ గాడ్‌ సచిన్‌ టెండూల్కర్‌ తన సుదీర్ఘ కెరీర్‌లో ఉన్నతమైన ఫామ్‌లో ఉన్న సమయంలో అతన్ని అవుట్‌ చేస్తే చాలు జన్మ ధన్యమైందనుకునే బౌలర్లు చాలా మందే ఉండేవారు. కానీ.. చాలా మంది బౌలర్లకు అది కలగానే మిగిలిపోయింది. కానీ.. కొంతమంది దిగ్గజ బౌలర్లతో సచిన్‌కు గట్టి పోటీ ఎదురయ్యేది వారిలో షేన్‌ వార్న్‌, షోయబ్‌ అక్తర్‌, బ్రెట్‌ లీ లాంటి స్టార్లు ముందు వరుసలో ఉంటారు. రెండు దశాబ్దాల క్రితం సచిన్‌-అక్తర్‌, సచిన్‌-వార్న్‌, సచిన్‌-బ్రెట్‌లీ మధ్య పోటీని క్రికెట్‌ అభిమానులు తెగ ఎంజాయ్‌ చేసేవారు. చాలా సార్లు సచిన్‌ ఈ పోటీల్లో విజయం సాధిస్తే.. మరికొన్ని సార్లు సచిన్‌ను త్వరగా అవుట్‌ చేసి బౌలర్లు పైచేయి సాధించేవారు. అప్పటి హోరాహోరీ పోటీని మరోసారి అభిమానులకు చూసే భాగ్యం దక్కింది. రోడ్‌ సేఫ్టీ వరల్డ్‌ సిరీస్‌ 2022లో భాగంగా సచిన్‌-బ్రెట్‌లీ ఫైట్‌ మరోసారి ఆవిష్కృతమైంది.

రోడ్‌ సేఫ్టీ వరల్డ్‌ సిరీస్‌ 2022 సందర్భంగా ఇండియా లెజెండ్స్‌-ఆస్ట్రేలియా లెజెండ్స్‌ మధ్య సెమీ ఫైనల్‌ మ్యాచ్‌ జరిగింది. ఈ మ్యాచ్‌లో బ్రెట్‌లీ తన తొలి ఓవర్‌ చివరి బంతిని అద్భుతమైన అవుట్‌ స్వింగర్‌గా వేశాడు. స్ట్రైక్‌లో ఉన్న సచిన్‌ అంతే అద్భుతంగా తన ట్రేడ్‌ మార్క్‌ కవర్‌ షాట్‌తో బౌండరీకి తరలించాడు. ఇప్పటికే ఈ సిరీస్‌లో తన ట్రేడ్‌ మార్క్‌ షాట్లతో అలరిస్తున్న సచిన్‌.. మరోసారి అద్భుతమైన బంతికి అద్భుతమైన షాట్‌ ఆడి వింటేజ్‌ సచిన్‌ను అభిమానులకు చూపించాడు. ఈ షాట్‌ చూసిన పాత తరం క్రికెట్‌ అభిమానులు రెండు దశాబ్దాల క్రికెట్‌ సచిన్‌ ఆడిన ఆటను మళ్లీ చూసినట్లు ఉందని అంటున్నారు. అలాగే బ్రెట్‌లీ వేసిన అవుట్‌ స్వింగర్‌ను కూడా మెచ్చుకుంటున్నారు. వీడియోను సోషల్‌ మీడియాలో షేర్‌ చేస్తూ.. సచిన్‌ పవర్‌ ఏ మాత్రం తగ్గలేదంటూ పేర్కొంటున్నారు.

ఇక మ్యాచ్‌ విషయానికి వస్తే.. ఈ మ్యాచ్‌లో తొలుత బ్యాటింగ్‌ చేసిన ఆస్ట్రేలియా లెజెండ్స్‌ నిర్ణీత 20 ఓవర్లలో 5 వికెట్లు కోల్పోయి 171 పరుగులు చేసింది. బెన్‌ డంక్‌ 26 బంతుల్లో 5 ఫోర్లు, 2 సిక్సులతో 46 పరుగులతో అదరగొట్టాడు. కెప్టెన్‌ వాట్సన్‌(30), అలెక్స్ డూలన్(35) పరుగులతో రాణించారు. టీమిండియా బౌలర్లలో మిథున్‌ 2, యూసుఫ్‌ పఠాన్‌ 2, రాహుల్‌ శర్మ ఒక వికెట్‌ తీసుకున్నారు. లక్ష్యఛేదనకు దిగిన ఇండియా లెజెండ్స్‌ 19.2 ఓవర్లలో 5 వికెట్లు కోల్పోయి టార్గెట్‌ను ఛేదించింది. నమన్‌ ఓజా 62 బంతుల్లో 7 ఫోర్లు, 5 సిక్సులతో 90 పరుగులు చేసి దుమ్మురేపాడు. సచిన్‌(10), యువరాజ్‌(18), యూసుఫ్‌ పఠాన్‌(1) పరుగులు చేసి త్వరగానే అవుటైనా.. చివర్లో ఇర్ఫాన్‌ పఠాన్‌ కేవలం 12 బంతుల్లోనే 2 ఫోర్లు, 4 సిక్సులతో 37 పరుగులు చేసి ఇండియా లెజెండ్స్‌ను ఫైనల్‌కు తీసుకెళ్లాడు.

Sachin punching it 🆚 Binga 😎🔥

Kuch yaad aya, Paltan? 08′ 👀#OneFamily @sachin_rt @BrettLee_58pic.twitter.com/zyORi8Ms6f

— Mumbai Indians (@mipaltan) September 29, 2022

ఇది కూడా చదవండి: టీ20 వరల్డ్‌ కప్‌ ముందు ద్రవిడ్‌ ప్లాన్‌ రివర్స్‌! బుమ్రాతో పాటు..