follow us:
జబర్దస్త్‌ షో.. ఎంతో మంది కళాకారులకి గుర్తింపు ఇవ్వడమే కాక వారి జీవితాల్లో వెలుగులు నింపింది. జబర్దస్త్‌ ద్వారా వచ్చిన గుర్తుంపుతో.. ప్రస్తుతం పలువురు కమెడియన్లు.. సినిమాల్లో కూడా నటిస్తూ.. గుర్తింపు తెచ్చుకున్నారు. వీరిలో సుడిగాలి సుధీర్‌, గెటప్‌ శ్రీను, చమ్మక్‌ చంద్ర, హైపర్‌ ఆది వాంటి వారు.. ప్రస్తుతం సినిమాల్లో కమెడియన్లుగా రాణిస్తున్నారు. ఇక జబర్దస్త్‌ ద్వారా విపరీతమైన గుర్తిపు తెచ్చుకున్న వారిలో రాకింగ్ రాకేష్ ఒకరు. ప్రారంభంలో సాధారణ కమెడియన్‌గా ఎంట్రీ ఇచ్చి.. ఆ తర్వాత తన టాలెంట్‌తో టీమ్‌లీడర్‌గా గుర్తింపు తెచ్చుకున్నాడు. మరీ ముఖ్యంగా చిన్న పిల్లలతో కలిసి.. రాకేష్ చేసిన స్కిట్స్‌.. ప్రేక్షకులను ఎంతో అలరించాయి.
ఈ నేపథ్యంలో తాజాగా రాకేష్ తన సక్సెస్‌ గురించి మాట్లాడుతూ.. ‘‘నేడు నేను అనుభవిస్తోన్న ఈ స్టార్‌ హోదా ఓవర్‌నైట్‌లో దక్కలేదు. ఎన్నో కష్టాలను దాటుకుని.. ఈ స్టేజ్‌కు వచ్చాను. ఇండస్ట్రీలో రాణించాలని కలలు కన్నాను. అవకాశాల కోసం వరంగల్ నుంచి హైదరాబాద్ వచ్చాను.. దాదాపు 11 ఏళ్ల పాటు ఎన్నో ఆఫీసుల చుట్టూ తిరిగాను. ఓ వైపు అవకాశాల కోసం ప్రయత్నిస్తూనే.. మరో వైపు.. బతుకుదెరువు కోసం మిమిక్రీ ప్రోగ్రామ్‌లు చేసేవాడిని. ఈవెంట్లలో చిన్న చిన్న స్కిట్స్‌ చేసేవాడిని. కార్యక్రమం పూర్తయ్యాక.. పేమెంట్‌ ఇచ్చే దాకా చేతులు కట్టుకుని నిలబడి ఉండేవాడిని. వాళ్లు.. వచ్చి నేను బాగా చేయలేదని చెప్తూ.. 500 రూపాయలు ఇచ్చే వారు. అదే మహాభాగ్యమని సరిపెట్టుకునేవాడిని’’ అని చెప్పుకొచ్చాడు.
‘‘ఆ తర్వాత ధనరాజ్‌ అన్న నన్ను గుర్తించి.. నాకు అవకాశం ఇవ్వడంతో.. నా జీవితం మలుపు తిరిగింది. ఆయన వల్లే.. నేనిప్పుడు మీ ముందు ఇలా నిలబడ్డాను. ప్రస్తుతం నాకు మంచి గుర్తింపు, డబ్బు అన్ని లభిస్తున్నాయి. కానీ ఒకప్పుడు తినడానికి తిండి కూడా లేని పరిస్థితులు చూశాను. ఒక్కోసారి అమ్మ పస్తులుండి.. మాకు అన్నం పెట్టేది. అలాంటి కష్టాలను ఎన్నో దాటుకుని ఈ రోజు ఈ స్టేజ్‌కు చేరుకున్నాను. ఇప్పుడు కూడా నేను అప్పుడప్పుడూ శ్మశనానికి వెళ్లి అక్కడ పడుకుంటాను. అక్కడ నాకు మానసిక ప్రశాంతత లభిస్తుంది’’ అని చెప్పుకొచ్చాడు.
‘‘మొదట్లో నాకు పెళ్లి మీద ఆసక్తి లేదు. ఆ విషయం ఇంట్లో చెప్పినప్పుడు.. మా అమ్మ నన్ను బెదిరించింది. ఇంట్లో నుంచి వెళ్లిపోతానన్నది. కానీ సుజాతతో పరిచయం అయ్యాక నా అభిప్రాయం మారింది. ముందుగా ఆమె నన్ను ఇష్టపడింది. తను మా ఫ్యామిలీకి కూడా బాగా నచ్చింది. అలా మా ప్రేమకు పునాది పడింది’’ అని చెప్పుకొచ్చాడు. రాకేష్ చేసిన వ్యాఖ్యలు ప్రస్తుతం నెట్టింట వైరల్‌గా మారాయి.
