follow us:
కొన్ని నెలలుగా బాలీవుడ్‌ సినిమాలు వివాదాస్పదం అవుతున్నాయి. అలాగే సోషల్‌ మీడియాలో సినిమాలను బాయ్‌కాట్‌ చేయాలనే ట్రెండ్‌ కూడా బాగా నడుస్తోంది. తాజాగా ఈ బాయ్‌కాట్‌ సెగ ప్రముఖ నటుడు షారుఖ్‌ ఖాన్‌, స్టార్‌ నటి దీపికా పదుకునె కలిసి నటించిన పఠాన్‌ సినిమాను తాకింది. యశ్‌రాజ్‌ ఫిలింమ్స్‌ సంస్థ నిర్మించిన ఈ సినిమా 2023 జనవరి 25వ తేదీన ప్రేక్షకుల ముందుకు రానుంది. అయితే.. సినిమా రిలీజ్‌కు ముందు చిత్ర యూనిట్‌ ఈ సినిమాలోని ఒక పాటను యూట్యూబ్‌లో విడుదల చేసింది. సినిమాపై ప్రేక్షకుల్లో ఆసక్తి రేపేందుకు విడుదల చేసిన ఈ పాట ప్రస్తుతం వివాదాస్పదం అవుతోంది. సినిమాకు బజ్‌ తెచ్చేందుకు రిలీజ్‌ చేస్తే.. సినిమాకే తలనొప్పిగా మారింది పఠాన్‌ మూవీలోని ‘బేషరమ్‌ రంగ్‌’ సాంగ్‌.
హిందీలో ‘బేషరమ్‌ రంగ్‌’గా రిలీజ్‌ అయిన ఈ పాట తెలుగులో ‘నా నిజం రంగు’గా విడుదలైంది. అయితే.. ఈ పాటలో దీపికా పదుకునె ఒక పార్టీలో డాన్స్‌ వేస్తూ ఉంటుంది. అయితే.. పాట చివర్లో దీపికా ధరించిన డ్రెస్‌ కలర్‌పై ప్రస్తుతం వివాదం రాజుకుంది. ఆరెంజ్‌ కలర్‌ డ్రెస్‌ ధరించిన దీపికాను షారుఖ్‌.. వెనుక నుంచి గట్టిగా హత్తుకున్న దృశ్యాలు పాటలో చూడొచ్చు. అయితే.. పాటకు బేషరమ్‌ రంగ్‌ అని పేరు పెట్టి.. దీపిక కాషాయం రంగు దుస్తులు ధరించడంపై కొంతమంది అభ్యంతరం వ్యక్తం చేస్తున్నారు. ఆ రంగును అసభ్యకరంగా ధరించడంతో పాటు, పాటకు బేషరమ్‌ రంగ్‌ (సిగ్గులేని రంగు) పేరు పెట్టి హిందువుల మనోభావాలను దెబ్బతీశారంటూ.. కొంతమంది సోషల్‌ మీడియాలో ఆగ్రహం వ్యక్తం చేస్తున్నారు.
సినిమా నటుడు షారుఖ్‌ ఖాన్‌ క్షమాపణ చెప్పి.. సినిమాలోని బేషరమ్‌ రంగ్‌ పాటలో ఆరెంజ్‌ కలర్‌ డ్రెస్‌ వేసుకున్న దృశ్యాలను తొలగించాలని కొన్ని హిందు సంఘాలు డిమాండ్‌ చేస్తున్నాయి. అలాగే కొన్ని ప్రాంతాల్లో షారుఖ్‌తో పాటు దీపికా దిష్టిబొమ్మలను సైతం దహనం చేశారు. అయితే.. పాటలో పలు రకాల రంగుల డ్రెస్సులను దీపికా ధరించినా.. ఆరెంజ్‌ కలర్‌పై మాత్రం చాలా మంది అభ్యంతరం వ్యక్తం చేస్తున్నారు. సినిమాలో ఆ దృశ్యాలు తొలగించకుంటే.. సినిమా విడుదలను అడ్డుకుంటామని హెచ్చరిస్తున్నారు. ట్విట్టర్‌లో ‘బాయ్‌కాట్‌ పఠాన్‌’ హ్యాష్‌ట్యాగ్‌ను సైతం ట్రెండింగ్‌ చేస్తున్నారు. మరి ఈ వివాదం నుంచి పఠాన్‌ సినిమా ఎలా బయటపడుతుందో చూడాలి. మరి ఈ వివాదంపై మీ అభిప్రాయాలను కామెంట్ల రూపంలో తెలియజేయండి.
