స్టార్ హీరోయిన్​ను అవమానించిన నెట్​ఫ్లిక్స్.. లీగల్ నోటీసులు జారీ!

బాలీవుడ్ సీనియర్ హీరోయిన్లలో ఒకరైన మాధురీ దీక్షిత్​కు ప్రేక్షకుల్లో ఎంత క్రేజ్ ఉందనేది ప్రత్యేకంగా చెప్పనక్కర్లేదు. వయసు పెరుగుతున్నా ఇప్పటికీ వన్నె తగ్గని అందంతో అభిమానులను ఆకట్టుకుంటున్నారామె. పలు టెలివిజన్ డ్యాన్స్​ షోల్లో జడ్జిగా వ్యవహరిస్తున్న మాధురి.. అడపాదడపా సినిమాల్లో నటిస్తున్నారు. అలాంటి మాధురీ దీక్షిత్​ను ప్రముఖ ఓటీటీ సంస్థ నెట్​ఫ్లిక్స్ అవమానించిందని తెలుస్తోంది. నెట్​ఫ్లిక్స్​లో టెలికాస్ట్ అవుతున్న అమెరికన్ సిట్​కామ్ ‘ది బిగ్ బ్యాంగ్ థియరీ’లోని ఒక ఎపిసోడ్​పై ఇప్పుడు దుమారం రేగుతోంది.

‘ది బిగ్ బ్యాంగ్ థియరీ’లోని ఒక ఎపిసోడ్​లో మాధురీ దీక్షిత్​ను సూచించేందుకు ఒక ‘అవమానకరమైన పదాన్ని’ వినియోగించారని రాజకీయ విశ్లేషకుడు మిథున్ విజయ్ కుమార్ అంటున్నారు. ఈ మేరకు నెట్​ఫ్లిక్స్​పై ఆయన దావా వేశారు. ‘ది బిగ్ బ్యాంగ్ థియరీ’ సీజన్-2కు సంబంధించిన ఎపిసోడ్​ను తొలగించాలని లీగల్ నోటీసులో మిథున్ విజయ్ కుమార్ పేర్కొన్నారు. ఇక వివాదం విషయానికొస్తే.. ‘ది బిగ్ బ్యాంగ్ థియరీ’ రెండో సీజన్​లో షెల్డన్ కూపర్ పాత్రధారి మాజీ మిస్ వరల్డ్ ఐశ్వర్యారాయ్​ను మాధురీ దీక్షిత్​తో పోలుస్తాడు.

ఒక సన్నివేశంలో ఐశ్వర్యను పేదోడి ‘మాధురీ దీక్షిత్’ అని పేర్కొంటాడు. దీనికి మరో పాత్రధారి రాజ్ కూత్రపల్లి క్యారెక్టర్​ను పోషించిన కునాల్ నయ్యర్.. కుష్టురోగి వంటి మాధురీ దీక్షిత్​తో పోలిస్తే ఎలా? ఐశ్వర్య ఒక దేవత’ అని బదులిస్తాడు. అయితే, ఈ కామెంట్స్ మాధురీ దీక్షిత్​ను అగౌరవపరిచే విధంగా, ఆమెను అవమానపరిచేలా, పరువుకు భంగం కలిగించే విధంగా ఉన్నాయని మిథున్ విజయ్ కుమార్ చెప్పారు. ఎపిసోడ్​ను తొలగించాలని లేదా మహిళల మీద వివక్షతను ప్రోత్సహించినందుకు గానూ చట్టపరమైన చర్యలు తీసుకోవాలని విజయ్ కోరారు. ఈ వివాదంపై మీ అభిప్రాయాలను కామెంట్ల రూపంలో తెలియజేయండి.

Netflix Sued For Remark Against Madhuri Dixit In ‘The Big Bang Theory’ https://t.co/imN0QrM41g pic.twitter.com/8Kyd6sG5Z0

— NDTV News feed (@ndtvfeed) March 27, 2023