follow us:
రూపాయి, రూపాయి పోగేసి కొందరు, వ్యాపారంలో రాణించి మరికొందరు, వృద్ధాప్యంలో ఆసరా కోసం ఇంకొందరు.. ఇలా వారి వారి భవిష్యత్ ఆర్థిక అవసరాలకు తగ్గట్టు బ్యాంకుల్లో పొదుపు చేస్తుంటారు. ఇందులో డబ్బును.. వారి సేవింగ్స్ ఖాతాల్లో ఉంచేవారు కొందరైతే, టర్మ్‌ డిపాజిట్లలో పొదుపు చేసేవారు మరికొందరు. ఇలా మన దేశంలో ప్రజలు బ్యాంకుల్లో వివిధ రూపాల్లో దాచుకున్న సొమ్ము ఎంతో తెలుసా..? రూ.1,35,59,212 కోట్లు. అక్షరాల్లో చెప్పాలంటే.. కోటీ 35 లక్షల కోట్ల పైచిలుకే. రిజర్వు బ్యాంక్‌ ఆఫ్‌ ఇండియా (ఆర్‌బీఐ) తాజాగా విడుదల చేసిన నివేదికలో ఈ లెక్కలను వెల్లడించింది.
1983 నుంచి 2021–22 వరకు బ్యాంకుల్లో భారతీయులు డిపాజిట్‌ చేసిన సొమ్ము లెక్కలను ఆర్‌బీఐ తన తాజా నివేదికలో వెల్లడించింది. ఆ మొత్తం కోటీ 35 లక్షల కోట్లని పేర్కొన్న ఆర్‌బీఐ, ఆ డబ్బును మన దేశ జనాభాతో సగటున లెక్కిస్తే ఒక్కొక్కరి సొమ్ము సుమారు లక్ష రూపాయలు అని తెలిపింది. 140 కోట్ల దేశ జనాభాలో.. 70% నిరుపేదలే, వారి ఖాతాల్లో పది వేలకు మించి పొదుపు చేసే అవకాశం లేదు. మరి.. ‘ఒక్కొక్కరి సొమ్ము సుమారు లక్ష రూపాయలు’ అని తెలపడం ఏ లెక్కనో.
1983–84లో భారతీయులు దాచుకున్న సేవింగ్స్ డిపాజిట్ల విలువ రూ.17,811 కోట్లు. ఇందులో భారతీయ బ్యాంకుల్లో రూ.17,430 కోట్లు ఉండగా.. విదేశీ బ్యాంకుల్లో రూ.381 కోట్లు దాచుకున్నట్లుగా తెలిపింది. ఆ లెక్కలు.. పదేళ్ల తర్వాత అంటే 1993–94లో రూ.71,151 కోట్లకు చేరగా, విదేశీ బ్యాంకుల్లో చేసిన డిపాజిట్లు రూ.1,718 కోట్లకు పెరిగాయి. మరో పదేళ్ల తర్వాత అంటే.. 2003–04 నాటికి రూ.3.85 లక్షల కోట్లు దాటగా, విదేశీ బ్యాంకుల్లో భారతీయులు చేసిన డిపాజిట్లు రూ.12,232 కోట్లకు చేరాయి. ఇక 2013–14 నాటికి సేవింగ్స్ రూ.20 లక్షల కోట్లు దాటాయి. ఇందులో భారతీయ బ్యాంకుల్లో రూ.19.6 లక్షల కోట్లకుపైగా ఉండగా.. విదేశీ బ్యాంకుల్లో రూ.40,390 కోట్లకు చేరాయి.
2014 నుంచి సేవింగ్స్ డిపాజిట్ల లెక్కలు టేబుల్ ఫార్మాట్ లో.. (రూ.కోట్లలో)
ఏడాది భారత బ్యాంకుల్లో విదేశీ బ్యాంకుల్లో మొత్తం
2014–15 21,78,847 41,046 22,19,893
2015–16 24,92,846 43,698 25,36,544
2016–17 33,40,707 52,876 33,93,583
2017–18 35,99,341 55,896 36,55,237
2018–19 39,72,547 58,630 40,31,177
2019–20 42,85,362 65,384 43,50,746
2020–21 49,74,715 81,092 50,55,807
2021–22 55,94,034 87,284 56,81,318
2014 నుంచి టర్మ్‌ డిపాజిట్ల లెక్కలు టేబుల్ ఫార్మాట్ లో.. (రూ.కోట్లలో)
ఏడాది 90 రోజుల్లోపు 6 నెలలు–ఏడాది 5 ఏళ్లపైన
2014 3,64,909 7,34,703 7,73,620
2015 4,27,722 7,19,993 7,91,137
2016 4,35,318 5,55,536 8,47,659
2017 4,47,000 8,40,158 9,45,980
2018 4,25,420 8,05,586 10,00,865
2019 5,16,651 6,19,998 9,25,059
2020 10,84,623 4,58,797 9,93,286
2021 13,02,760 7,96,325 7,47,654
ఇక 2021-22 నాటికి, ఆరు నెలల లోపు, ఏడాది నుంచి రెండేళ్ల మధ్య, రెండేళ్ల నుంచి మూడేళ్ల మధ్య, మూడేళ్ల నుంచి ఐదేళ్ల మధ్య.. ఇలా అన్నిరకాల టర్మ్‌ డిపాజిట్లు కలిపి షెడ్యూల్డ్‌ బ్యాంకుల్లో ఉన్న సొమ్ము రూ.78,77,894 కోట్లు అని రిజర్వుబ్యాంకు తన నివేదికలో పేర్కొంది. ఆర్‌బీఐ నివేదిక బహిర్గతం చేసిన ఈ లెక్కలపై, మీ అభిప్రాయాలను కామెంట్ల రూపంలో తెలియజేయండి.
