follow us:
ఎలక్ట్రిక్ వాహన ప్రియులంతా ఎప్పుడెప్పుడా అని ఎదురు చూస్తున్న బడ్జెట్ ఎలక్ట్రిక్ కార్ మార్కెట్ లోకి వచ్చేసింది. దేశీయ కార్ల తయారీ సంస్థ టాటా మోటార్స్ విడుదల చేసిన ఈ కొత్త ఎలక్ట్రిక్ కార్(టాటా టియాగో ఈవీ) ప్రారంభ ధర రూ. 8.49 లక్షలు (ఎక్స్-షోరూమ్). అయితే.. మొదటి 10,000 యూనిట్లకు మాత్రమే ఈ ధరలు చెల్లుబాటు అవుతాయని టాటా సంస్థ ప్రకటించింది. వచ్చే నెల 10 నుంచి బుకింగ్‌ ప్రారంభం కానున్నాయి.
భారతీయ మార్కెట్లో బడ్జెట్ ధర కార్లకు డిమాండ్ ఎక్కువుగా ఉంటుంది. దీన్ని దృష్టిలో పెట్టుకొని టాటా ఈ కారును తీసుకొచ్చింది. టియాగో ఈవీని రెండు వేరు వేరు బ్యాటరీ సైజులు కలిగిన వేరియంట్లలో తీసుకొచ్చింది. ఇందులో 19.2kWh బ్యాటరీ సామర్థ్యం కలిగిన కారు ధర రూ.8.49 లక్షల నుంచి ప్రారంభం కానుండగా, 24 kWh బ్యాటరీ సామర్థ్యం కలిగిన కారు ధర రూ.9.09 లక్షలు నుంచి మొదలవుతుంది. అయితే, తొలి 10 వేలమంది కస్టమర్లకే ఈ ధర అని పేర్కొంది. ఆ తర్వాత ధర ఎంత ఉంటుందనేది కంపెనీ వెల్లడించలేదు. వీటిలో 2,000 యూనిట్లు ప్రస్తుతమున్న టాటా ఈవీ యజమానులకు అందుబాటులో ఉంచినట్లు తెలిపింది.
Say hello to the most affordable electric car in India! Tata Tiago EV, priced from ₹8.49 lakhs (ex-showroom & introductory). Claimed range of 315 km on a single charge. Bookings open on 10th October, deliveries commence from January 2023. #Tiagoev #TataTiagoEV pic.twitter.com/iUry8D8smq
— AARIZ RIZVI (@AarizRizvi) September 28, 2022
ఇక కారు స్పెసిఫికేషన్స్ విషయానికొస్తే.. 19.2kWh బ్యాటరీతో వస్తున్న వేరియంట్ లో 3.3 kW ఏసీ ఛార్జర్ అందించారు. సింగిల్ ఛార్జ్ తో ఈ కారు 250 కిలోమీటర్ల రేంజ్ ప్రయాణిస్తుందని కంపెనీ చెబుతోంది. అలాగే.. 24 kWh బ్యాటరీ వేరియంట్ కారులో 7.2 kW ఏసీ ఛార్జర్ అందించారు. ఇది బ్యాటరీని 3.36 గంటల్లోనే ఫుల్ ఛార్జ్ చేయనుండగా, సింగిల్ ఛార్జ్ తో 315 కిలోమీటర్లు ప్రయాణించొచ్చని కంపెనీ పేర్కొంది. ఇక, స్పీడ్ విషయానికొస్తే.. కేవలం 5.7 సెకన్లలోనే 60 కిలోమీటర్ల వేగాన్ని అందుకుంటుందని తెలిపింది. టచ్ స్క్రీన్ ఇన్ఫోటైన్మెంట్ సిస్టమ్, స్టార్ట్/ స్టాప్ పుష్ బటన్, లెదర్ సీట్స్, ఆటో హెడ్ ల్యాంప్స్ వంటి ఫీచర్లు ఇందులో ఉన్నాయి.
ప్రస్తుతం ఏడు రకాల ఈవీ వేరియంట్లు అందుబాటులో ఉన్నాయని టాటా మోటార్స్ సంస్థ తెలిపింది. విద్యుత్ కార్ల తయారీలో ముందు నుంచి దూకుడుగా ఉన్న టాటా మోటార్స్ ప్రత్యేకంగా ఫ్యాన్స్‌ బేస్‌ ఉందని చెప్పొచ్చు. ఇప్పటికే నెక్సాన్‌ ఈవీ, టైగోర్‌ ఈవీ, నెక్సాన్‌ ఈవీ మాక్స్‌, నెక్సాన్‌ ఈవీ ప్రైమ్‌ మోడల్‌ కార్లతో తనకంటూ ప్రత్యేక గుర్తింపు తెచ్చుకుంది. ఇప్పుడు తీసుకొచ్చిన టియాగో ఈవీ మన దేశంలో విక్రయిస్తున్న అత్యంత చవకైన ఎలక్ట్రిక్ కారుగా గుర్తింపు పొందింది.
