follow us:
2003 వరల్డ్‌ కప్‌ ఫైనల్లో టీమిండియాను ఓడించి విశ్వవిజేతగా అవతరించిన ఆస్ట్రేలియా.. కరేబియన్‌ గడ్డపై 2007లో జరిగిన వన్డే వరల్డ్‌ కప్‌లో డిఫెండింగ్‌ ఛాంపియన్‌గా అడుగుపెట్టింది. రికీ పాంటింగ్‌ కెప్టెన్సీలో ప్రపంచ క్రికెట్‌ను శాసిస్తున్న ఆస్ట్రేలియా.. ఆ వరల్డ్‌ కప్‌లోనూ ఫైనల్‌కు దూసుకెళ్లింది. ఫైనల్లో శ్రీలంకతో టైటిల్‌ పోరుకు సిద్ధమైంది. టాస్‌ గెలిచిన ఆసీస్‌ కెప్టెన్‌ పాంటింగ్‌.. బ్యాటింగ్‌ ఎంచుకున్నాడు. మ్యాథ్యూ హేడెన్‌తో కలిసి ఇన్నింగ్స్‌ ఆరంభించిన ఆడమ్‌ గిల్‌క్రిస్ట్‌.. లంక బౌలర్లపై విరుచుకుపడ్డాడు. ఇప్పటికీ ప్రపంచ అత్యుత్తమ వికెట్‌ కీపర్‌ కమ్‌ బ్యాటర్లలో ఆడమ్‌ గిల్‌క్రిస్ట్‌ ముందు వరుసలో ఉంటాడు. అలాంటి ఆటగాడు.. ఫైనల్లో జూలువిదిల్చిన సింహంలా రెచ్చిపోయాడు.
చమిందా వాస్‌, లసిత్‌ మలింగా, ముత్తయ్య మురళీధరణ్‌ లాంటి హేమాహేమీ బౌలర్లకు సైతం చుక్కలు చూపిస్తూ.. ఫోర్లు, సిక్సర్ల వర్షం కురిపించాడు. కేవలం 104 బంతుల్లో 13 ఫోర్లు, 8 సిక్సులతో ఏకంగా 149 పరుగులు భారీ స్కోర్‌ చేశాడు. గిల్‌క్రిస్ట్‌ విధ్వంసంతో 38 ఓవర్లలోనే ఆస్ట్రేలియా 281 పరుగుల భారీ స్కోర్‌ చేసింది. వర్షం కారణంగా మ్యాచ్‌ను కుదించారు. ఆ తర్వాత లంకకు 36 ఓవర్లలో 269 పరుగుల టార్గెట్‌ను ఇచ్చారు. లంక 36 ఓవర్లలో 8 వికెట్ల నష్టానికి 215 పరుగులు చేసి ఓటమి పాలైంది. ఆస్ట్రేలియా వరుసగా వన్డే వరల్డ్‌ కప్‌ను సాధించి.. మరోసారి ఛాంపియన్‌గా నిలిచింది. ఈ విజయంలో కీలక పాత్ర పోషించింది.. ఆడమ్‌ గిల్‌క్రిస్ట్‌. తన అద్భుతం బ్యాటింగ్‌తో ఆసీస్‌కు భారీ స్కోర్‌ అందించాడు, సెంచరీతో కదంతొక్కాడు. అయితే.. సెంచరీ పూర్తి చేసుకున్న గిల్‌క్రిస్ట్‌.. తన ఎడమచేతి గ్లౌజ్‌ను చూపించాడు. అది మధ్యలో కాస్త ఉబ్బి ఉంది. అప్పట్లో అది సంచలనంగా మారింది.
దానిపై వివాదం కూడా చెలరేగింది. గిల్‌క్రిస్ట్‌ నిబంధనలు అతిక్రమించి.. గ్లౌజ్‌లో ఏదో పెట్టుకుని బ్యాటింగ్‌ చేశాడని, ఆస్ట్రేలియా చీటింగ్‌ చేసి వరల్డ్‌ కప్‌ గెలిచిందంటూ క్రికెట్‌ అభిమానులు మండిపడ్డారు. అయితే.. గిల్‌క్రిస్ట్‌ తన ఎడమ చేతి గ్లౌజ్‌లో స్క్వాష్‌ బాల్ పెట్టుకుని బ్యాటింగ్‌ చేశాడనే విషయం కొన్ని రోజులకు బయటకొచ్చింది. అయితే.. అసలు గిల్‌క్రిస్ట్‌ ఆ బాల్‌ను ఎందుకు తన గ్లౌజ్‌లో పెట్టుకున్నాడు? అలా పెట్టుకోవడం వల్ల అతనికి ఏంటి ఉపయోగం? అనే విషయాలను స్వయంగా గిల్‌క్రిస్ట్‌ వివరించాడు. ఆ స్క్వాష్‌ బాల్ విశేషాలు, దాని వెనుకున్న మిస్టరీ ఏంటో? ఇప్పుడు తెలుసుకుందాం.
2007 వరల్డ్‌ కప్‌ కంటే ముందు గిల్‌క్రిస్ట్‌ తన బ్యాటింగ్‌ టెక్నిక్‌ విషయంలో కాస్త ఇబ్బంది పడుతుంటేవాడు. ఆ సమయంలో అతని బ్యాటింగ్‌ కోచ్‌ స్క్వాష్‌ బాల్‌ను గిల్‌క్రిస్ట్‌కు పరిచయం చేశాడు. అతని ఎడమ చేతి గ్లౌజ్‌లో అరచేతిలో ఆ బాల్‌ను పట్టుకుని బ్యాటింగ్‌ చేస్తుంటే.. గిల్‌క్రిస్ట్‌ బ్యాటింగ్‌లో ఇంప్రూమెంట్‌ గమనించాడు. ఆ బాల్ పెట్టుకోక ముందు.. తన రెండుచేతుల పది వేళ్లు, బ్యాట్‌ హ్యాండిల్‌ను బలంగా పట్టుకునేవి.. దీంతో టాప్ హ్యాండ్‌(కుడిచేయి) పవర్‌.. షాట్‌పై తక్కువ పడుతుండేది. దీంతో బ్యాట్‌లో స్విగ్‌ కూడా సరిగా ఉండకపోయేది. ఈ లోపాన్ని గమనించిన గిల్‌క్రిస్ట్‌ బ్యాటింగ్‌ కోచ్‌.. స్క్వాష్‌ బాల్‌ను గిల్‌క్రిస్ట్‌ ఎడమ చేతి గ్లౌజ్‌లో పెట్టాడు.
దాంతో గిల్‌క్రిస్ట్‌ ఎడమ చేతి చిటికెన వేలు, ఉంగరపు వేలు బ్యాట్‌ హ్యాండిల్‌ను జెస్ట్‌ అలా తాకి ఉండేవే తప్ప.. గట్టిగా పట్టుకునే వీలు లేకుండా ఉండేది. అలా ఉండటంతో.. షాట్‌ ఆడేటప్పుడు టాప్ హ్యాండ్‌ పవర్‌ ఎక్కువగా జనరేట్‌ అయ్యేది. బ్యాట్‌ స్వింగ్‌ కూడా అద్భుతంగా ఉండేది. బ్యాట్‌ పట్టుకునేటప్పుడు ఎడమ చేతి బోటన వేలు, చూపుడు వేలు, కుడి చేతి అన్ని వేళ్లతో గ్రిప్‌ దొరికేది. ఎడమ చేయి చివరి రెండు, మూడు వేళ్ల ఒదులుగా ఉండటంతో.. గిల్‌క్రిస్ట్‌ బ్యాటింగ్‌ చాలా సులువుగా చేసేవాడు. బాల్‌పై మంచి టైమింగ్‌తో బ్యాట్‌ స్వింగ్‌ అయ్యేది. స్టోక్‌ మేకింగ్‌ అద్భుతంగా ఇంప్రూవ్‌ అయ్యింది. కాగా.. ఆ స్క్వాష్‌ బాల్ కాస్త మెత్తగా ఉండటంతో అతనికి మంచి గ్రిప్‌ దొరికేది.
ఈ టెక్నిక్‌తోనే గిల్‌క్రిస్ట్‌ 2007 వరల్డ్‌ కప్‌ ఫైనల్లో 149 పరుగులతో చెలరేగి ఆడాడు. ఆ తర్వాత ఈ విషయంపై వివాదం చెలరేగినా.. అప్పటి శ్రీలంక జట్టు కెప్టెన్‌ మహేలా జయవర్దనే సైతం.. అతి తప్పు కాదని, టెక్నిక్‌ను మెరుగుపర్చుకోవాడనికి, గ్రిప్‌ కోసం గిల్‌క్రిస్ట్‌ స్క్వాష్‌ బాల్ గ్లౌజ్‌లో పెట్టుకుని ఆడాడని పేర్కొన్నాడు. కాగా.. గిల్‌క్రిస్ట్‌ విషయంలో సక్సెస్‌ అయిన ఈ స్క్వాష్‌ బాల్ టెక్నిన్‌ను మరికొంత మంది ఆస్ట్రేలియా క్రికెటర్లు సైతం ప్రయత్నించారు. కానీ.. వారి విషయంలో ఈ టెక్నిన్‌ బెడిసి కొట్టింది. మాజీ ఆస్ట్రేలియా కెప్టెన్‌ జార్జ్‌ బెల్లీ సైతం గిల్లీ(గిల్‌క్రిస్ట్‌) వాడిన స్క్వాష్‌ బాల్ టెక్నిన్‌ను బాది బొక్కబోర్లా పడ్డాడు. ఒక టెస్టు మ్యాచ్‌ సందర్భంగా గ్లౌజ్‌లో స్క్వాష్‌ బాల్ పెట్టుకుని ఆడిన బెల్లీ.. పుల్‌ షాట్‌ ఆడటంలో ఫెయిలై.. వికెట్‌ సమర్పించుకున్నాడు. అదోక చెత్త టెక్నిక్‌ అని బెల్లీ పేర్కొన్నాడు. కానీ.. ఇప్పటికీ కూడా 2007లో ఆస్ట్రేలియా వరల్డ్‌ కప్‌ గెలిచేందుకు గిల్‌క్రిస్ట్‌ చీటింగ్‌ చేశాడని చాలా మంది క్రికెట్‌ అభిమానులు అభిప్రాయపడుతుంటారు.
