follow us:
టీమిండియా క్రికెటర్‌ కేఎస్‌ భరత్‌ దేశవాళీ టోర్నీలో దుమ్మురేపుతున్నాడు. విజయ్‌ హజారే ట్రోఫీలో భాగంగా మంగళవారం అరుణాచల్‌ ప్రదేశ్‌తో జరిగిన మ్యాచ్‌లో సెంచరీతో కదంతొక్కిన భరత్‌.. కేవలం 84 బంతుల్లో 7 ఫోర్లు, 2 సిక్సులతో 100 పరుగులు చేసి నాటౌట్‌గా నిలిచాడు. అదే మ్యాచ్‌లో ఆంధ్రా ఓపెనర్‌ అభిషేక్‌ రెడ్డి కూడా సెంచరీతో మెరిశాడు. 133 బంతుల్లో 11 ఫోర్లు, 4 సిక్సులతో 136 పరుగులు చేసి రాణించాడు. కాగా.. కేఎస్‌ భరత్‌ విజయ్‌ హజారే ట్రోఫీలో ఆడిన చివరి ఐదు ఇన్నింగ్సుల్లో మూడు సెంచరీలు బాదడం విశేషం. అందులో రెండు సెంచరీల్లో 150 మార్క్‌ను దాటాడు. పైగా ఆ ఐదు ఇన్నింగ్స్‌ల్లో మూడు సార్లు నాటౌట్‌గా నిలిచాడు.
ఇలా దేశవాళీ టోర్నీల్లో అదరగొడుతున్నా.. కేఎస్‌ భరత్‌కు సరైన గుర్తింపు దక్కడం లేదనే విమర్శలు ఉన్నాయి. టీమిండియాలో చోటు దక్కాల్సిన ఆటగాడు కేఎస్‌ భరత్‌ అంటూ క్రికెట్ అభిమానులు భావిస్తున్నారు. అయితే ఐపీఎల్‌లో మంచి ప్రతిభ కనబర్చడంతో వృద్ధిమాన్‌ సాహా స్థానంలో టీమిండియాకు ఎంపికయ్యాడు. అయినా కూడా అతని మరిన్ని అవకాశాలు దక్కాల్సి ఉంది. ఐపీఎల్‌ 2021లో రాయల్‌ ఛాలెంజర్స్‌ బెంగుళూరుకు ఆడిన భరత్‌.. ఢిల్లీ క్యాపిటల్స్‌తో జరిగిన మ్యాచ్‌లో సంచలన ఇన్నింగ్స్‌ ఆడి ఆర్సీబీని గెలిపించాడు. 52 బంతుల్లోనే 3 ఫోర్లు, 4 సిక్సులతో 78 పరుగులు చేసి.. 66 పరుగులకే 3 వికెట్లు కోల్పోయిన ఆర్సీబీని మ్యాక్స్‌వెల్‌తో కలిసి.. అద్భుత ఇన్నింగ్స్‌తో గెలిపించాడు.
ఈ ఇన్నింగ్స్‌తో లైమ్‌లైట్‌లోకి వచ్చిన భరత్‌ను ఐపీఎల్‌ 2022లో ఢిల్లీ సొంతం చేసుకుంది. కానీ.. పెద్దగా మ్యాచ్‌లు ఆడే అవకాశం ఇవ్వలేదు. ఐపీఎల్‌ 2021లో మొత్తం 8 మ్యాచ్‌లు ఆడిన భరత్‌.. 7 ఇన్నింగ్స్‌ల్లో 191 పరుగులు చేశాడు. అందులో ఒక హాఫ్‌ సెంచరీ ఉంది. ఇక ఐపీఎల్‌ 2022లో ఢిల్లీ క్యాపిటల్స్‌ తరఫున ఆడినా.. కేవలం రెండు మ్యాచ్‌ల్లో మాత్రమే అవకాశం దక్కింది. దీంతో ఆ సీజన్‌లో భరత్‌ కేవలం 8 పరుగులు మాత్రమే చేశాడు. ఢిల్లీ క్యాపిటల్స్‌కు కెప్టెన్ రిషభ్‌ పంత్‌ ఉండటం.. అతను కూడా వికెట్‌ కీపరే కావడంతో భరత్‌కు పెద్దగా అవకాశాలు రాలేదు. అయితే.. ఐపీఎల్‌ 2023 కోసం భరత్‌ను ఢిల్లీ రిటేన్‌ చేసుకోకుండా.. రిలీజ్‌ చేసింది. దీంతో 2023 మినీ వేలం కోసం కేఎస్‌ భరత్‌ అందుబాటులో ఉండనున్నాడు.
#KSBharat continued his scoring ways in the #VijayHazareTrophy with his third hundred in five innings for Andhra.
Already part of #TeamIndia’s Test squad, is it time to take a look at him for ODIs too? pic.twitter.com/3DKWdaWrWt
— Circle of Cricket (@circleofcricket) November 15, 2022
