లెజెండ్స్‌ లీగ్‌ ఛాంపియన్‌గా.. గంభీర్‌ సేన! ఫైనల్లో పఠాన్‌ టీమ్‌ చిత్తు

ఆస్ట్రేలియా పేసర్‌ మిచెల్‌ జాన్సన్‌ బ్యాట్‌తో చెలరేగాడు. ఒక ప్రొఫెషనల్‌ బ్యాటర్‌ ఆడినట్లు.. ఫోర్లు, సిక్సులతో బౌలర్లపై విరుచుకుపడ్డాడు. కేవలం 35 బంతుల్లోనే 7 ఫోర్లు, 3 సిక్సుతో భిల్వారా కింగ్స్ బౌలర్లను చీల్చిచెండాడి 62 పరుగులు సాధించాడు. మరోవైపు కివీస్‌ మాజీ ఆటగాడు రాస్‌ టేలర్‌ 41 బంతుల్లోనే 4 ఫోర్లు, 8 సిక్సులతో వీరవిహారం చేసి 82 పరుగులు చేశాడు. దీంతో లెజెండ్స్‌ లీగ్‌ క్రికెట్‌ 2022లో భాగంగా భిల్వారా కింగ్స్‌తో జరిగిన ఫైనల్‌ మ్యాచ్‌లో టీమిండియా మాజీ ఓపెనర్‌ గౌతమ్‌ గంభీర్‌ సారథ్యంలోని ఇండియా క్యాపిటల్స్‌ ఘన విజయం సాధించింది. లెజెండ్స్‌ లీగ్‌ రెండో సీజన్‌ ఛాంపియన్‌గా అవతరించింది. ఈ విజయంలో తొలుత బ్యాటర్లు అదరగొడితే.. తర్వాత బౌలర్లు భిల్వారా పనిపట్టారు.

కాగా.. బౌలరైన మిచెల్‌ జాన్సన్‌ ఆడిన ఇన్నింగ్స్‌ ఈ మ్యాచ్‌కే హైలెట్‌గా నిలిచింది. ఈ మ్యాచ్‌ కంటే ముందు భిల్వారా కింగ్స్‌-ఇండియా క్యాపిటల్స్‌ మధ్య జరిగిన మ్యాచ్‌ సందర్భంగా భిల్వారా విధ్వంసకర బ్యాటర్‌, టీమిండియా మాజీ క్రికెటర్‌ యూసుఫ్‌ పఠాన్‌కు, మిచెల్‌ జాన్సన్‌కు మధ్య పెద్ద గొడవ జరిగింది. జాన్సన్‌.. పఠాన్‌ను తోసేశాడు కూడా.. ఈ ఘటన సంచలనంగా మారింది. కాగా.. ఈ గొడవను మనసులో పెట్టుకునే జాన్సన్‌ కసితో ఈ ఇన్నింగ్స్‌ ఆడినట్లు క్రికెట్‌ అభిమానులు సరదాగా పేర్కొంటున్నారు. తొలుత బ్యాటింగ్‌లో హాఫ్‌సెంచరీతో అదరగొట్టిన జాన్సన్‌.. బౌలింగ్‌లోనూ ఒక వికెట్‌ తీసుకున్నాడు. లీగ్‌ ఆసాంతం మంచి ప్రదర్శన కనబర్చిన భిల్వారా కింగ్స్‌ ఫైనల్లో మాత్రం చతికిలపడింది.

ఇక మ్యాచ్‌ విషయానికి వస్తే.. తొలుత బ్యాటింగ్‌ చేసిన ఇండియా క్యాపిటల్స్‌ నిర్ణీత 20 ఓవర్లలో 7 వికెట్ల నష్టానికి 211 పరుగుల భారీ స్కోర్‌ చేసింది. కెప్టెన్‌ గంభీర్‌(8), ఓపెనర్‌ స్మిత్‌(3), హామిల్టన్ మసకద్జా(1), రామ్‌దీన్‌(0) తక్కువ స్కోర్‌కే పెవిలియన్‌ చేరారు. కేవలం 21 పరుగులకే 4 వికెట్లు కోల్పోయిన క్యాపిటల్స్‌ను రాస్‌ టేలర్‌(82), మిచెల్‌ జాన్సన్‌(62) ఆదుకున్నారు. ఇద్దరూ దూకుడుగా ఆడుతూ.. 100కు పైగా భాగస్వామ్యం నెలకొల్పారు. ఆ తర్వాత యాష్లే నర్స్ 19 బంతుల్లో 6 ఫోర్లు, ఒక సిక్స్‌తో 42 పరుగులు చేసి నాటౌట్‌గా నిలవడంతో క్యాపిటల్స్‌ భారీ స్కోర్‌ చేయగలిగింది. భిల్వారా బౌలర్లలో రాహుల్‌ శర్మ 4, పనేసర్‌ 2, బ్రెనన్‌ ఒక వికెట్‌ పడగొట్టారు. 212 పరుగుల లక్ష్యఛేదనలో భిల్వారా బ్యాటర్లు దారుణంగా విఫలం అయ్యారు. 18.2 ఓవర్లలో 107 పరుగులకే ఆలౌట్‌ అయి..104 పరుగుల తేడాతో ఓడిపోయారు.

Outstanding innings from Ross Taylor and Mitchell Johnson comes to an end.#RossTaylor #MitchellJohnson #LegendsLeagueCricket #CricketTwiiter pic.twitter.com/rtFMQ76AsF

— CricTracker (@Cricketracker) October 5, 2022

सदिया बीत गी, पर या कंगारू कोना सुधरै।#MitchellJohnson #ICYMI pic.twitter.com/37odkCIbfC

— Atul Verma (@vermaji90) October 3, 2022

What a way to finish! @CapitalsIndia take a bow! A truly #legendary smack down this has been! Make way for the winners of the #LLCT20! #BossLogonKaGame #LegendsLeagueCricket #LLCT20 pic.twitter.com/YqvTM5IMGZ

— Legends League Cricket (@llct20) October 5, 2022

ఇది కూడా చదవండి: వరల్డ్‌ కప్‌ వేటకు బయల్దేరిన టీమిండియా! బుమ్రా ప్లేస్‌లో ఎవరు?