follow us:
మనిషిని మార్చే శక్తి, మనిషిని ఉన్నతమైన వ్యక్తిగా తీర్చిదిద్దే శక్తి ఒక మంచి మాటకి ఉంది. ఆ మాట ఒక స్టార్ స్టేటస్ ఉన్న వ్యక్తి నుంచి వస్తే.. దాని రీచ్ కొన్ని వేల, లక్షల కిలోమీటర్ల అవతల ఉన్న వాళ్ళ గుండెలోతుల్లోకి చొచ్చుకుపోతుంది. ఆపదలో ఉన్న వారిలో ఆత్మస్థైర్యాన్ని నింపుతుంది. అదే మంచి మాటకి, మోటివేషన్ కి ఉన్న పవర్. మరి అలాంటి పవర్ ఫుల్ పదాలు పవర్ స్టార్ పవన్ కళ్యాణ్ నోటి నుంచి వస్తే దాని ఇంపాక్ట్ ఇంకెంత తీవ్రంగా ఉంటుందో ఆలోచించుకోవచ్చు. స్టార్లు అయిపోతే సరిపోదు, ఎవరి బతుకు వాళ్ళు బతికేస్తే కాదు.. ఒక మంచి మాటతో సమాజాన్ని చైతన్యపరచడం, దేశాన్ని ముందుకు నడిపించే శక్తి ఉండి కూడా ఆసక్తి క్షీణించి ఆదిలోనే ఆగిపోతున్న యువ హృదయాల్లో ప్రేరణ, స్ఫూర్తి రగిలించాలి. అదే జీవిత పరమార్థం అని నమ్మినటువంటి వ్యక్తి పవన్ కళ్యాణ్.
నిజానికి పవన్ కళ్యాణ్ వ్యక్తి మాత్రమే కాదు, వ్యక్తులను కదిలించగల మహా శక్తి. ఈరోజుల్లో మోటివేషన్ అనేది లేకపోతే మనిషి ముందుకు పోలేరు. జీవితంలో ఏదో ఒక సమయంలో.. ఏదో ఒక సందర్భంలో ఆగిపోయే పరిస్థితి వస్తుంది. ఆరోజు, ఆ క్షణాన ప్రతీ మనిషికి ప్రేరణ అవసరమవుతుంది. సమాజాన్ని అత్యంత ప్రభావితం చేయగలిగే వ్యక్తుల అవసరం అప్పుడు ఉంటుంది. పవన్ కళ్యాణ్ లాంటి వ్యక్తి కొన్ని లక్షల మందిని ప్రభావితం చేయగలరు. ఆయన మాట్లాడితే క్లాస్ లో స్టూడెంట్ పాఠం వింటున్నంత శ్రద్ధగా వింటారు. అదే పవన్ లో ఉన్న మ్యాజిక్. ఆయన సైలెంట్ గా ఉంటే అరుస్తారు, మాట్లాడితే సైలెంట్ అయిపోతారు. ఏ హీరో అయినా చెప్తే అభిమానులు వింటారో లేదో గానీ పవన్ కళ్యాణ్ చెప్తే మాత్రం అభిమానులు ఆచరిస్తారు. అభిమానులు కాదు, పవన్ కళ్యాణ్ కి భక్తులే ఉంటారు.
ఆయన్ని దేవుడు అని పిలుచుకుంటారు. అంతలా ఆయన జనాన్ని ప్రభావితం చేయగలరు. ఆయన నిజ జీవితంలోనే కాదు, సినిమాల పరంగా కూడా సమాజాన్ని చెడగొట్టే అంశాలకు తావివ్వకుండా జాగ్రత్త వహిస్తారు. దాదాపు తన అన్ని సినిమాల్లో సమాజానికి పనికొచ్చే సందేశముంటుంది. అంతేకాకుండా దేశం మీద తనకి ఎంత ప్రేమ ఉందో అనేది కూడా తన సినిమాల్లో చూపిస్తూ వస్తారు. చిన్నప్పటి నుంచి సమాజం కోసం బతకాలి, ఈ దేశానికి ఏదో ఒకటి చేయాలి అని ఆలోచనలతో ఎదిగిన వ్యక్తి. ఇంగ్లీష్ రాని కారణంగా ఇంటర్ ఫెయిల్ అయిన పవన్ కళ్యాణ్.. ఇవాళ ఇంగ్లీష్ లో ఎంతోమంది యువకులకు లెక్చర్ ఇస్తున్నారు. ఇదే సక్సెస్ అంటే. ఓటమి గురించి భయపడని వ్యక్తి, సక్సెస్ వస్తే సెలబ్రేట్ చేసుకోని వ్యక్తి పవన్ కళ్యాణ్.
నిరాడంబరంగా, నిజాయితీగా జీవిస్తూ.. వ్యక్తిత్వంలో ఆకాశంలా, విపరీతమైన ఫ్యాన్ బేస్ ని ఆస్తిగా పొందినటువంటి అపర కోటీశ్వరుడుగా కీర్తి, క్రేజ్ సంపాదించుకున్నటువంటి వ్యక్తి పవన్ కళ్యాణ్. ఆయన మాట కొన్ని వందల, వేల మందిని కదిలించగలదు కాబట్టే ఆయన్ని అంతర్జాతీయ సదస్సులకు ముఖ్య అతిథిగా ఆహ్వానిస్తారు. గతంలో హార్వర్డ్ యూనివర్సిటీ సైతం పవన్ ని ఆహ్వానించింది. అది తెలుగు హీరోకి దక్కిన అరుదైన గౌరవం. తాజాగా మరోసారి పవన్ ప్రసంగం వినేందుకు సీఏ విద్యార్థులు ఉత్సాహం చూపించారు. పవన్ ప్రసంగం కోసం ఏకంగా లంచ్ కూడా స్కిప్ చేశారు. లంచ్ స్కిప్ చేసినందుకు పవన్ కళ్యాణ్ వారికి ధన్యవాదాలు తెలిపారు.
ఇన్స్టిట్యూట్ ఆఫ్ చార్టర్డ్ అకౌంటెంట్స్ ఆఫ్ ఇండియా నిర్వహించిన ఇంటర్నేషనల్ కాన్ఫిరెన్స్ ఆఫ్ సీఏ స్టూడెంట్స్ అంతర్జాతీయ సదస్సులో పవన్ కళ్యాణ్ పాల్గొన్న విషయం తెలిసిందే. సీఏ స్టూడెంట్స్ తో జరిగిన కాన్ఫిరెన్స్ లో భాగంగా సీఏ విద్యార్థులను ఉద్దేశించి ప్రసంగించారు. ఆకలితో ఉన్నవారికి అన్నం పెట్టడం ఎంత ముఖ్యమో.. ఆవేదనతో ఉన్నవారికి అక్షరాలతో కలిపిన మాటల చద్దిమూటను పెట్టి పంపించడం కూడా అంతే ముఖ్యమని నిరూపించారు పవన్ కళ్యాణ్. ఇంగ్లీష్ లో ఆయన ఇచ్చిన ప్రసంగానికి సీఏ స్టూడెంట్స్ అందరూ ఇంప్రెస్ అయిపోయారు.
