follow us:
సంగీత దర్శకుడిగా తెలుగు సినీ పరిశ్రమలో చెరగని ముద్ర వేసుకున్న చక్రి ఊబకాయ సమస్యతో డిసెంబర్ 2014లో మరణించారు. అయితే ఆయన మరణంపై అనుమానం ఉందని చక్రి కుటుంబ సభ్యులు వెల్లడించారు. ఆయనది సహజ మరణం కాదని, దీని వెనుక కుట్ర ఉందని చక్రి సోదరుడు మహిత్ నారాయణ్ అన్నారు.
పూరీ జగన్నాథ్ డైరెక్షన్ లో వచ్చిన బాచి సినిమాతో సంగీత దర్శకుడిగా కెరీర్ స్టార్ట్ చేసిన చక్రి.. ఇట్లు శ్రావణి సుబ్రమణ్యం, ఇడియట్, శివమణి, సత్యం, దేవదాసు, దేశముదురు సింహ ఇలా దాదాపు 85 చిత్రాలకు పని చేశారు. తన ట్యూన్స్ తో క్లాస్, మాస్ అని తేడా లేకుండా, చిన్న, పెద్ద తేడా లేకుండా అన్ని వర్గాల వారిని, అన్ని వయసుల వారిని ఆకట్టుకున్న చక్రి.. ఊబకాయ సమస్యతో 2014 డిసెంబర్ 15న తనువు చాలించారు. చక్రి తర్వాత ఆ కుటుంబం నుంచి వారసుడిగా ఆయన సోదరుడు మహిత్ నారాయణ్ సంగీత దర్శకుడిగా సినీ పరిశ్రమలో అడుగు పెట్టి రాణిస్తున్నారు. లవ్ యూ బంగారం, నేనో రకం, రామప్ప, పరారీ, రెడ్డిగారి ఇంట్లో రౌడీయిజం వంటి సినిమాలకు సంగీత దర్శకత్వం వహించారు.
ఇటీవల ఓ ఇంటర్వ్యూలో ఆయన చక్రి గురించి మాట్లాడుతూ భావోద్వేగానికి గురయ్యారు. తన అన్నయ్య మరణం జీవితంలో తీరని లోటు అని.. అమ్మ ఇంకా ఆ విషాదం నుంచి కోలుకోలేకపోతుందని, అన్నయ్య పోయారన్న బాధలోనే ఉందని అన్నారు. ఇంట్లో టీవీ పెట్టాలంటేనే భయం వేస్తుందని.. ఎప్పుడు అన్నయ్య పాట వస్తుందో తెలియదు.. ఆయన పాటలు వచ్చినప్పుడు అమ్మ వెక్కి వెక్కి ఏడుస్తుందని అన్నారు. అన్నయ్య భార్యతో జరిగిన గొడవల వల్ల తాము వేరే ఇంట్లోకి వెళ్లిపోయామని.. అన్నయ్య చనిపోయే ముందు రోజు రాత్రి తమ దగ్గరకు వచ్చి వెళ్లారని అన్నారు. తెల్లారి ఉదయం అన్నయ్య చనిపోయారన్న వార్త వచ్చిందని.. అయితే ఇప్పటికీ అన్న మరణంపై అనుమానం ఉందని మహిత్ అన్నారు.
ఆయనది సహజ మరణం కాదని.. సహజ మరణమే అయితే పోస్టుమార్టం చేయించడానికి ఎందుకు భయపడ్డారని మహిత్ వెల్లడించారు. చనిపోయే ముందు అన్నకు అమ్మ విషం పెట్టిందని పోలీసులకు ఫిర్యాదు చేశారు. కన్న తల్లికి తన కొడుకుకు విషం పెట్టి ఎందుకు చంపుతుందని ప్రశ్నించారు. అయితే తమ దురదృష్టం కొద్దీ అన్న ఎలా చనిపోయారనేది నిరూపించలేకపోయామని, అక్కడే తాను ఫెయిలయ్యానని అన్నారు. చక్రి చనిపోయాక ఆయన స్టూడియో మహిత్ కి వచ్చేసిందని ప్రచారం చేశారు. కానీ అందులో ఎలాంటి నిజం లేద అన్నారు. ఎవరో కావాలని స్టూడియో బయట సోఫాలు తగులబెట్టి ఆ నేరాన్ని తనపై మోపారని.. అన్నయ్య గుర్తులు ఏమీ లేకుండా పోయాయి అంటూ భావోద్వేగానికి గురయ్యారు. మరి చక్రి మరణంపై ఇప్పటికీ అనుమానం ఉందన్న మహిత్ నారాయణ్ పై మీ అభిప్రాయం ఏమిటో కామెంట్ చేయండి.
